ທັນທີທີ່ເຄື່ອງ SAMSUNG GALAXY S22 ທັງ 3 ລຸ້ນ ມາເຖິງ ອິນໄຊລາວ, ກອງບັນນາທິການພວກເຮົາກໍບໍ່ລໍຊ້າ ຟ້າວນຳທັງໝົດມາວາງແຜນທົດລອງໃຊ້ທັນທີ
ໂດຍນອກຈາກຈະເບິ່ງເລື່ອງຂະໜາດ ແລະ ນ້ຳໜັກກັນແລ້ວ ສິ່ງທຳອິດທີ່ເຮົາສົນໃຈທົດລອງກ່ອນໝູ່ ແມ່ນ ການຈັບໂທລະສັບແລ້ວຍ່າງອອກໄປບ່ອນທີ່ມີແສງແດດແຮງໆ ຍ້ອນວ່າ ໜຶ່ງໃນຄຸນສົມບັດເດັ່ນຂອງ ຊີຣີນີີ້ ແມ່ນໜ້າຈໍຄວາມສະຫວ່າງສູງເຖິງ 1750 nit ເຊິ່ງກໍໍ່ເອິ້ນໄດ້ວ່າ ບໍ່ຜິດຫວັງເລີຍ
1750 vs 1300 nit ຕ່າງກັນຢ່າງຊັດເຈນ
ຈາກການລອງຫຼິ້ນເບິ່ງກາງແດດຍາມທ່ຽງ ບອກໄດ້ເລີຍວ່າ ໜ້າຈໍໂທລະສັບລຸ້ນ S22+ ກັບ S22 Ultra ນັ້ນ, ສາມາດສູ້ກັບແສງແດດແຮງໆ ໄດ້ດີ. ໂດຍສະເພາະລຸ້ນ S22 Ultra ນັ້ນ ເຮົາພົບວ່າ ການປັບແສງເຮັດໄດ້ລະອຽດດີ ໂດຍພື້ນທີ່ມືດ ຍັງເບິ່ງມືດຄືເກົ່າ. ສ່ວນລຸ້ນ S22+ ກໍເຮັດໄດ້ດີເຊັ່ນກັນ.
ສຳລັບ S22 ໂຕນ້ອຍສຸດ ມີຄວາມແຈ້ງໜ້າຈໍໜ້ອຍກວ່າຄື 1300 nit ເມື່ອນຳມາທຽບໃນບ່ອນກາງແຈ້ງແລ້ວ ຈະເຫັນວ່າ 2 ລຸ້ນທີ່ໃຫຍ່ກວ່າ ສາມາດສະແດງຜົນໄດ້ດີກວ່າຫຼາຍ, ຢ່າງໃດກໍຕາມ ຖ້າເອົາສະເພາະການໃຊ້ງານທົ່ວໄປ ຕ້ອງເອິ້ນວ່າ ເຕັກໂນໂລຊີ Vision Booster ຂອງຊຳຊຸງໃນທຸກລຸ້ນ ເຮັດໄດ້ດີບໍ່ຕ່າງກັນຫຼາຍ.
ກ້ອງແຈ້ງ ໃຫ້ພາບງາມຍິ່ງກວ່າເກົ່າ
ລຳດັບຕໍ່ໄປ ທີ່ຈະບໍ່ລອງໃຊ້ບໍ່ໄດ້ເລີຍ ກໍຄືການຖ່າຍຮູປດ້ວຍເລນທັັ້ງ 3 ເລນ ໄດ້ແກ່ ເລນມຸມກວ້າງ, ເລນມຸມກ້ວາງຫຼາຍ ແລະ ເລນຊູມ (Telephoto). ພາບທີ່ໄດ້ຂອງແຕ່ລະເລນນັ້ນ ເອີ້ນໄດ້ວ່າ ຍັງຍອດຍ້ຽມສົມຄວາມເປັນ ຊຳຊຸງ, ໂດຍສະເພາະລຸ້ນ S22 Ultra ທີ່ຕ້ອງຍອມຮັບວ່າ ການນຳ AI ມາຊ່ວຍປະມວນຜົນພາບ ເຮັດໃຫ້ພາບມີຄວາມຄົມຊັດສູງກວ່າທຸກລຸ້ນຢ່າງເຫັນໄດ້ຊັດເຈນ ລວມເຖິງການຖ່າຍພາບແບບ Space Zoom ທີ່ປະສົມການຊູມແບບດິຈິຕອນຈົນໄດ້ເຖິງ 100 ເທົ່າ ກໍໃຫ້ພາບທີ່ແຈ້ງງາມກວ່າເກົ່າ ເຊິ່ງໝົດຄວາມກັງວົນໃນການຖ່າຍພາບໃນໄລຍະໄກ ແລະ ສະຖານທີ່ ທີ່ອັນຕະລາຍ ເຊິ່ງເຮົາບໍ່ສາມາດເຂົ້າໄປໃກ້ໆ ໄດ້.
ດ້ານຄວາມໂດດເດັ່ນ ການຖ່າຍພາບຂອງ S22 ນັ້ນ ອາດບໍ່ຕ່າງກັນຫຼາຍ ທັງບ່ອນທີ່ແຈ້ງ ແລະ ບ່ອນຮົ່ມ ແຕ່ໃນບ່ອນທີ່ມີແສງໜ້ອຍ ຫຼື ຕອນກາງຄືນ ລະບົບກ້ອງຂອງ S22 ຈະຊ່ວຍໃຫ້ພາບທີ່ໄດ້ ມີຄວາມຄົມຊັດຂຶ້ນ ຍິ່ງເປັນລຸ້ນ S22 Ultra ທີ່ມີ AI ເຂົ້າມາຊ່ວຍ ໃນການປະມວນຜົນພາບດ້ວຍແລ້ວ ຍິ່ງເຮັດໃຫ້ພາບທີ່ຖ່າຍອອກມາມີຄວາມງາມ, ຄົມແຈ້ງ ແລະ ສົມຈິງ.
ໃນເລື່ອງຂອງການຖ່າຍ ວີດີໂອ ໃຜທີ່ມີບັນຫາໃນການຖ່າຍວີດີໂທດ້ວຍມືຖື ແລ້ວພາບອອກມາສັ່ນ ຖ້າໄດ້ GALAXY S22 Ultra ໄປໃຊ້ງານແລ້ວ ທ່ານຈະບໍ່ກັງວົນກັນເລື່ອງນີ້ີເລີຍ, ເພາະໃນມືຖືໜ່ວຍນີ້ ມີລະບົບເລນກັນສັ່ນໃນໂຕ ແລະຍັງມີລະບົບກັນສັ່ນແບບ ດິຈິຕອນ ທີ່ນຳພາບມາຄຳນວນດ້ວຍ AI ອີກເທື່ອໜຶ່ງ ຈຶ່ງເຮັດໃຫ້ທ່ານສາມາດຖ່າຍວີດີໂອໄດ້ຂະນະທີ່ທ່ານກຳລັງແລ່ນອອກກຳລັງກາຍ, ຍ່າງຂຶ້ນຂັ້ນໄດ ຫຼື ເຮັດກິດຈະກຳເຄື່ອນໄຫວອື່ນໆ ທ່ານຈະໄດ້ພາບອອກມາທີ່ມີຄວາມນຸ້ມນວນ ຄືກັບໄດ້ໃຊ້ອຸປະກອນເສີມເພື່ອບໍ່ໃຫ້ພາບສັ່ນ.
ນອກຈາກນີ້ ຍັງມີໂໝດ ວີດີໂອ ຟັງຊັນຕ່າງໆ ໄວ້ໃຫ້ໃຊ້ອີກຫຼາຍໂໝດ ເປັນຕົ້ນແມ່ນ ໂໝດ Video Portrait ທີ່ສາມາດປັບໜ້າຊັດ ຫຼັງມົວ ໄດ້ຄືກັບເລນກ້ອງມືອາຊີບ ເຮັດໃຫ້ງານຖ່າຍວີດີໂອ ຂອງທ່ານເປັນເລື່ອງງ່າຍໄປເລີຍ. ຫຼື ຫາກມີອຸປະກອນກັນສັ່ນດີໆ ຢູ່ໃນມືນຳແລ້ວ ກໍສາມາດປິດ Super Steady ແລ້ວອັດເຕັມຄຸນສົມບັດທີ່ມີຄືຄວາມລະອຽດ 8K ໃຊ້ເປັນກ້ອງຫຼັກ ຫຼື ກ້ອງສຳຮອງໄດ້ແບບສະບາຍໆ.
ໄປໃຫ້ສຸດດ້ວຍ S Pen
ຕ້ອງບອກກ່ອນວ່າ ຄວາມຮູ້ສຶກຂອງເຮົາຕອນທີ່ເຫັນ S21 Ultra ສາມາດໃຊ້ປາກກາ S Pen ໄດ້ນັ້ນ, ເປັນຄວາມຮູ້ສຶກເຖິງຄວາມມີລະດັບໃນໂຕຜະລິດຕະພັນ ຂະນະທີ່ການໄດ້ເຫັນ S22 Ultra ທີ່ມີຊ່ອງສຽບປາກກາ S Pen ຄືການໄດ້ເຫັນ ການກັບຄືນມາຂອງ Galaxy Note ໃນຊື່ Ultra ເຊິ່ງໃຫ້ຄວາມຮູ້ສຶກໃນການໃຊ້ງານແບບ Note ຫຼາຍກວ່າ.
ສຳລັບສິ່ງທີ່ປ່ຽນໄປໃນການໃຊ້ S Pen ຂອງລຸ້ນ S22 Ultra ຄື ການເອົາ AI ມາຊ່ວຍຄຳນວນທິດທາງການຂຽນ ເຮັດໃຫ້ປາກກາ S-Pen ສາມາດໃຊ້ງານໄດ້ໄວ ຄືກັບ ການໃຊ້ປາກກາຂຽນເຈ້ຍ. ນອກເໜືອໄປຈາກນັ້ນ ຖືວ່າບໍ່ມີຫຍັງປ່ຽນໄປ ທັງຄວາມຍາວ, ຂະໜາດ ແລະ ປຸ່ມເທິງປາກກາ ທີ່ໃຊ້ເປັນປຸ່ມກົດຊັດເຕີ ໃນເວລາທີ່ເຮົາຖ່າຍຮູບເຊວຟີ້ ຫຼື ການຖ່າຍໃນສະຖານະການອື່ນໆ ທີ່ບໍ່ຈຳເປັນຕ້ອງເອົາມືໄປກົດທີ່ໜ້າຈໍເພື່ອຖ່າຍ.
ເຖິງວ່າ ຈະບໍ່ເຫັນຫຍັງປ່ຽນແປງໄປຫຼາຍພໍເທົ່າໃດ ແຕ່ຕ້ອງຍອມຮັບວ່າ ການທີ່ນຳເອົາຮູບແບບຂອງ Note ມາໃສ່ໃນ S22 Ultra ເຮັດໃຫ້ S22 Ultra ສົມບູນໄປເຖິງຂັ້ນສຸດຍອດຂອງຊີຣີ ນີ້ເລີຍລະ!
ໃນດ້ານການທົດສອບການໃຊ້ງານຈິງ ເຄື່ອງສີ ເບີກັນດີ (Burgundy) ທີ່ເຮົາໄດ້ມາທົດສອບ ມີປາກກາສີດຳແບບດ້ານ ທີ່ສຳພັດຕົວດ້າມແລ້ວ ຊ່ວຍໃຫ້ການຈັບຖະນັດມືດີ ອີກທັງຮູບຊົງຂອງດ້າມ ທີ່ປັບໃຫ້ນູນມົນ ກໍຊ່ວຍໃຫ້ການໃຊ້ງານດົນບໍ່ເມື່ອຍນິ້ວຫຼາຍ, ສ່ວນຄວາມໄວໃນການຕອບສະໜອງມີເຖິງ 0.28ms ນັ້ນ, ຖ້າບໍ່ແມ່ນນັກຈົດມືໄວຂັ້ນເທບ ຮັບຮອງວ່າ ແຍກການໃຊ້ງານແບບ Note ລຸ້ນເກົ່າບໍ່ອອກເລີຍ ໂດຍສະເພາະ ຄົນທີ່ບໍ່ເຄີຍໃຊ້ Note ມາກ່ອນ ເຊື່ອວ່າຈະບໍ່ຮູ້ສຶກເຖິງຄວາມໄວນີ້ ແຕ່ນ່າຈະມັກຄວາມສະດວກໃນການເອົາປາກກາອອກຈາກເຄື່ອງແລ້ວຈົດເທິງໜ້າຈໍໄດ້ເລີຍ ຫຼາຍກວ່າ.
ຢາກໄດ້? ເອົາລຸ້ນໃດດີ!
ເຮົາບໍ່ອາດບອກໄດ້ ວ່າລຸ້ນໃດຈະເໝາະສົມກັບຜູ້ໃຊ້ງານ ຍ້ອນແຕ່ລະຄົນກໍຈະມີເງື່ອນໄຂໃນການໃຊ້ໂທລະສັບຢູ່ແລ້ວ ແລະ ນີ້ເປັນພຽງສ່ວນໜຶ່ງເທົ່ານັ້ນທີ່ ກອງບັນນາທິການ ອິນໄຊລາວ ເຮົາໄດ້ທົດລອງໃຊ້ ແລະ ເຫັນເຖິງຄວາມພິເສດຂອງໂທລະສັບ GALAXY S22 Ultra ແຕ່ບອກໄດ້ວ່າ ຄວນໄປສຳພັດດ້ວຍຕົວເອງທີ່ຮ້ານ ກ່ອນຕັດສິນໃຈ ໂດຍສະເພາະ ໃຜທີ່ເຮັດວຽກໃນສາຍຖ່າຍພາບນິ້ງ ແລະ ວີດີໂອ ແລະ ຍັງບໍ່ໄດ້ຕັດສິນໃຈຊື້ Note 20 ໃນປີ 2018 ກໍບໍ່ຄວນພາດ ທີ່ຈະມາທົດລອງໃຊ້ງານຕົວຈິງ.
ສ່ວນໃຜທີ່ບໍ່ຕ້ອງການໃຊ້ປາກກາ S Pen ແລະ ເລນຊູມ ອອບຕິຄອລ (optical) 10 ເທົ່າ ແຕ່ພຽງຕ້ອງການໄດ້ເຄື່ອງໃໝ່ມາແທນ S10 ຫຼື ເກົ່າກວ່ານັ້ນ, ຂໍແນະນຳໃຫ້ລອງສຳພັດ S22+ ເຊິ່ງລາຄາຕ່ຳກວ່າ S22 Ultra ຢູ່ພໍສົມຄວນ ແຕ່ມີປະສິດທິພາບໃນການໃຊ້ງານ ແອັບພິເຄຊັນ ເພື່ອການສື່ສານ ແລະ ບັນເທີງໄດ້ ບໍ່ຕ່າງກັນເລີຍ.
