ເມືອງງອຍ, ແຂວງ ຫຼວງພະບາງ ເປັນອີກເມືອງໜຶ່ງທີ່ມີແຫຼ່ງທ່ອງທ່ຽວຫຼາຍແຫ່ງ ເປັນຕົ້ນແມ່ນຖ້ຳ ແລະ ຈຸດຊົມວິວເທິງພູ ທີ່ສາມາດດຶງດູດນັກທ່ອງທ່ຽວໄດ້ເປັນຢ່າງດີ.
ຜາຊົມນາງ ກໍເປັນອີກສະຖານທີ່ທ່ອງທ່ຽວຂອງ ເມືອງງອຍ ແລະ ກໍເປັນອີກໜຶ່ງຈຸດຊົມວິວ ໜອງຂຽວ ທີ່ກຳລັງໄດ້ຮັບຄວາມນິຍົມຈາກນັກທ່ອງທ່ຽວ ໃນປັດຈຸບັນ ໂດຍສະຖານທີ່ດັ່ງກ່າວແມ່ນຢູ່ຫ່າງຈາກ ນະຄອນ ຫຼວງພະບາງ ປະມານ 140 ກິໂລແມັດ.
ອາກາດທີ່ແສນບໍລິສຸດ ບວກກັບວິວງາມໆທີ່ ຜາຊົມນາງ ແຫ່ງນີ້ ຖືວ່າເປັນຈຸດເດັ່ນສຳຄັນທີ່ເຮັດໃຫ້ນັກທ່ອງທ່ຽວໃຫ້ຄວາມສົນໃຈຢາກຂຶ້ນສຳພັດກັບບັນຍາກາດດັ່ງກ່າວແບບຟິນໆ ອີກຢ່າງຜາແຫ່ງນີ້ກໍບໍ່ສູງຫຼາຍ ໃຊ້ເວລາພຽງແຕ່ 10 ກວ່ານາທີກໍຮອດຈຸດຊົມວິວແລ້ວ ແລະ ຜາຊົມນາງ ແຫ່ງນີ້ກໍຢູ່ກ້ອງ ຜາແດງ ທີ່ເປັນຈຸດຊົມວິວສູງສຸດຂອງ ເມືອງງອຍ.
ຜາຊົມນາງ ຖືວ່າເປັນສະຖານທີ່ ທີ່ຫາກໍບຸກເບີກໃໝ່ ແລະ ໄດ້ເປີດໃຫ້ບໍລິການໃຫ້ກັບນັກທ່ອງທ່ຽວເມື່ອບໍ່ດົນມານີ້ ເຊິ່ງເປັນບ່ອນສຳລັບນັກທ່ອງທ່ຽວທີ່ມັກຮັກໃນການທ່ອງທ່ຽວແບບພະຈົນໄພທຳມະຊາດ. ໂດຍສະເພາະແມ່ນໄລຍະລະດູໜາວນີ້ ແມ່ນຈະມີທະເລໝອກໃຫ້ເຫັນໃນຕອນເຊົ້າເຊິ່ງຈະເຮັດໃຫ້ທ່ານອົດໃຈບໍ່ໄດ້ທີ່ຈະເກັບພາບງາມໆໄວ້ເບິ່ງ ແລະ ຊົມຕາເວັນຕົກດິນໃນຕອນຄ້ອຍຄ່ຳຍາມແລງກໍງາມໄປອີກແບບໜຶ່ງ. ໂດຍທາງສະຖານທີ່ຈະມີບໍລິການໃຫ້ເຊົ່າເຕັ້ນສຳລັບນັກທ່ອງທ່ຽວຜູ້ທີ່ຕ້ອງການຢາກສຳພັດກັບບັນຍາກາດຕອນກາງຄືນຢູ່ເທິງ ຜາຊົມນາງ.
ທ່ານໃດສົນໃຈຢາກໄປສຳພັດກັບບັນຍາກາດຢູ່ທີ່ສະຖານທີ່ຊົມວິວ ຜາຊົມນາງ ກໍເຂົ້າໄປເບິ່ງໄດ້ທີ່ Facebook page: NongKhiaw View ຜາຊົມນາງ
Hits: 0
