ເຖິງແມ່ນວ່າຄວາມລັບຈະບໍ່ມີໃນໂລກແຕ່ເລື່ອງບາງເລື່ອງຂອງຄູ່ຜົວເມຍກໍອາດຖືກກຳນົດໄວ້ວ່າຈະຕ້ອງເປັນຄວາມລັບໃຫ້ດົນທີ່ສຸດ ໂດຍສະເພາະເລື່ອງທີ່ກ່ຽວຂ້ອງກັບຕົວເລກ.
ອິນໄຊລາວ ຈຶ່ງລວບລວມຄວາມເຫັນຂອງບັນດາເມຍທັງຫຼາຍ ແລ້ວນຳມາເຜີຍແຜ່ໃຫ້ບັນດາຜົວໆ ໄດ້ຮູ້ກັນ ແຕ່ມັນຈະແມ່ນຄວາມຈິງສຳລັບຄູ່ໃດແດ່ນັ້ນຜູ້ເປັນຜົວຄວນຕ້ອງຫາວິທີຊອກຮູ້ກັນເອງ.
- ກະເປົາ: ນັບເປັນສິນຄ້າທີ່ເວົ້າໄດ້ວ່າລາຍໃດລາຍນັ້ນ ຫາກບໍ່ຈຳເປັນແທ້ໆ ບໍ່ມີມື້ບອກຄວາມຈິງວ່າຊື້ມາລາຄາທໍ່ໃດ ໂດຍອາດຈະບອກລາຄາພຽງເຄິ່ງໜຶ່ງ ຫຼື ຕໍ່າກວ່ານັ້ນ ຫຼື ບາງເທື່ອກໍ່ບອກວ່າເປັນຂອງກັອບເກຣດເອໄປເລີຍ ເຊິ່ງສ່ວນໃຫຍ່ແລ້ວ ຢ່າວ່າແຕ່ລາຄາທີ່ແທ້ຈິງເລີຍ ແມ່ນແຕ່ລຸ້ນກະເປົາດັງໆ ຜູ້ຊາຍບາງຄົນກໍອາດບໍ່ຮູ້ຈັກຊ້ຳ.
- ຄ່າແຕ່ງຜົມ: ຜູ້ຊາຍບາງຄົນອາດບໍ່ຮູ້ວ່າຄ່າສະຜົມຜູ້ຍິງນັ້ນມີຕັ້ງແຕ່ເກືອບແສນ ຈົນບາງເທື່ອກໍສູງເກີນເຄິ່ງລ້ານ ເພາະສຳລັບຜູ້ຊາຍແລ້ວ ຍັງຊອກຫາຮ້ານຕັດຜົມລາຄາ 15.000 ກີບຢູ່ ໂດຍລາຄາທີ່ຜົວບໍ່ຮູ້ນັ້ນອາດມາຈາກລາຍການຕັ້ງແຕ່ຢາສະຜົມ, ຄຣີມນວດ, ອົບອາຍນ້ຳ, ສີຍ້ອມຜົມ, ຄ່າດັດຜົມ, ຄ່າຢືດຜົມ, ຄ່າເຮັດສະປາຜົມ ແລະ ອື່ນໆອີກຫຼາຍໆ ຢ່າງ.
- ເຄື່ອງນຸ່ງ ແລະ ເຄື່ອງສຳອາງ: ເມື່ອເອົາສອງສິນຄ້ານີ້ມາລວມກັນ ເພາະມີຄຸນລັກສະນະຄ້າຍຄືກັນສັ່ງງ່າຍ ແລະ ຈັດສົ່ງໄວເກັບເຊື່ອງໄດ້ງ່າຍຈົນບາງເທື່ອນອກຈາກຈະບໍ່ຮູ້ລາຄາແລ້ວ ຍັງບໍ່ຮູ້ປະລິມານນຳອີກ ເພາະໄດ້ມາທັງແບບໄປຊື້ເອງ ແລະ ສັ່ງມາຈາກອອນລາຍ ອີກທັງເຄື່ອງສຳອາງ ແລະ ເຄື່ອງນຸ່ງກໍມີຍີ່ຫໍ້ທີ່ຫຼາກຫຼາຍບໍ່ແພ້ກະເປົາ ພຽງແຕ່ເກັບງຽບໄດ້ແນບນຽນ ເຖິງແມ່ນວ່າສິ່ງເຫຼົ່ານີ້ຈະແພງສ່ຳໃດມັນກໍມີຂະໜາດນ້ອຍ ແລະ ນ້ຳໜັກເບົາຈົນບາງຄົນບອກຜົວວ່າ ຂອງແຖມກະຍັງເຊື່ອ ເຮັດໃຫ້ບາງລາຍການທີ່ຖີ້ມໄປແລ້ວຜົວກະຍັງບໍ່ເຄີຍຮູ້ຄວາມຈິງ.
- ເງິນເກັບຂອງຜົວ: ສຳລັບບາງເຮືອນທີ່ໃຫ້ເມຍເປັນຄົນເກັບເງິນ ເອີ້ນໄດ້ວ່າຕ້ອງໄດ້ລອງເຮັດບັນຊີລາຍຮັບລາຍຈ່າຍເອງ ຈຶ່ງຈະຮູ້ວ່າ ຕົວເລກທີ່ໃກ້ຄຽງເງິນເກັບແທ້ ເພາະຄ່າໃຊ້ຈ່າຍໃນເຮືອນນັ້ນອາດຈະຖືກແປຮູບເປັນເຄື່ອງປະດັບເຊັ່ນ: ເງິນ, ຄຳ ຫຼື ແມ່ນແຕ່ໃບເລກ. ແຕ່ກະຫັ້ນແຫຼະ ເພື່ອເມຍທີ່ຮັກແລ້ວເລື່ອງແບບນີ້ຜົວຄົງຈະບໍ່ເວົ້າຫຍັງລະເນາະ.
ເມື່ອເຮົາໄດ້ຮູ້ຄວາມລັບຂອງຕົວເລກແມ່ຍິງໄປແລ້ວ ໂພສໜ້າ ເຮົາລອງມາເບິ່ງຕົວເລກທີ່ເມຍບໍ່ເຄີຍຮູ້ມາກ່ອນ ວ່າຜົວຂອງເຮົາກໍເກັບຄວາມລັບເກັ່ງບໍ່ແພ້ກັນເລີຍ.
