Saturday, July 20, 2024
Lenovo

ນ້ຳຕົກຕາດຊາຍ ແຂວງ ບໍລິຄຳໄຊ

ນ້ຳຕົກຕາດຊາຍ ຕັ້ງຢູ່ເຂດປ່າສະຫງວນແຫ່ງຊາດ ພູເຂົາຄວາຍ, ບ້ານ ຫາດໄຄ້, ເມືອງ ທ່າພະບາດ, ແຂວງ ບໍລິຄຳໄຊ ຫ່າງຈາກ ເທດສະບານເມືອງ ທ່າພະບາດ 19 ກິໂລແມັດ, ເຊິ່ງໄດ້ເລີ່ມເປີດເປັນແຫຼ່ງທ່ອງທ່ຽວຕັ້ງແຕ່ປີ 2004 ເປັນຕົ້ນມາ ແຕ່ກໍຍັງຮັກສາຄວາມເປັນທຳມະຊາດທີ່ອຸດົມສົມບູນໄວ້ໄດ້ໂດຍບໍ່ມີການດັດແປງແຕ່ຢ່າງໃດ.

ຕາດຊາຍ ເປັນນ້ຳຕົກຕາດ ທີ່ຕັ້ງຢູ່ບໍລິເວນປ່າສະຫງວນແຫ່ງຊາດ, ເຊິ່ງອ້ອມຮອບໄປດ້ວຍປ່າໄມ້ນາໆ ພັນ ຈຶ່ງເຮັດໃຫ້ມີຄວາມຊຸ່ມເຢັນພ້ອມທັງມີນ້ຳໄຫຼຕະຫຼອດປີແບບບໍ່ເຫືອດແຫ້ງ, ສິ່ງດັ່ງກ່າວຖືໄດ້ວ່າເປັນຄວາມມະຫັດສະຈັນທາງທຳມະຊາດອີກຢ່າງໜຶ່ງທີ່ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ໄປທ່ຽວຊົມ. ນອກຈາກນີ້, ຍັງເປັນນ້ຳຕົກຕາດທີ່ມີຫຼາຍຊັ້ນ ໃນລະດູຝົນນ້ຳຈະຫຼາຍ ແລະ ງາມເປັນພິເສດ, ເຊິ່ງນັກທ່ອງທ່ຽວສາມາດຊົມນ້ຳຕົກໄດ້ສອງຈຸດຄື: ຈຸດທີ່ເປັນນ້ຳຕົກໄຫຼລົງມາຕາມພະລານຫີນທີ່ຄ້າຍຄືກັບຂັ້ນໄດໄຫຼລົງສູ່ວັງນ້ຳທີ່ມີຄວາມເຢັນ, ໃສ ໂດຍນັກທ່ອງທ່ຽວສາມາດລົງຫຼິ້ນນ້ຳໄດ້ ແລະ ອີກຈຸດໜຶ່ງນັກທ່ອງທ່ຽວສາມາດເບິ່ງເຫັນສາຍນ້ຳຕົກຕາດຊາຍທີ່ຕົກລົງມາຈາກຜາຫີນສູງທີ່ມີຄວາມງາມບໍ່ໜ້ອຍໄປກວ່າຈຸດທຳອິດເຊິ່ງເປັນຈຸດທີ່ນັກທ່ອງທ່ຽວ, ຊ່າງພາບຫຼາຍທ່ານມັກໃຊ້ເປັນບ່ອນຖ່າຍຮູບ.

ເພື່ອສ້າງຄວາມສະດວກໃຫ້ກັບນັກທ່ອງທ່ຽວ ແມ່ນສາມາດນັ່ງກິນເຂົ້າຕາມພະລານຫີນທີ່ຢູ່ແຄມນ້ຳເພື່ອສຳຜັດກັບບັນຍາກາດ ແລະ ອາຍນ້ຳທີ່ເຢັນສະບາຍໄດ້ ແຕ່ຕ້ອງຢູ່ພາຍໃຕ້ກົດລະບຽບຂອງແຫຼ່ງທ່ອງທ່ຽວ ຫຼື ຈະນັ່ງພັກຜ່ອນເທິງສາລາທີ່ເປັນທັງຈຸດຊົມນ້ຳຕົກ ແລະ ພັກຜ່ອນ, ພ້ອມທັງມີຮ້ານອາຫານໄວ້ໃຫ້ບໍລິການກັບນັກທ່ອງທ່ຽວນຳອີກ, ນອກຈາກນີ້ ຍັງມີຫ້ອງພັກສໍາລັບນັກທ່ອງທ່ຽວທີ່ຢາກສໍາຜັດກັບທໍາມະຊາດແບບເຕັມອິ່ມໃນການນອນແຮມຄືນທ່າມກາງປ່າໄມ້ ແລະ ສາຍນ້ຳ.

ຖ້າຫາກນັກທ່ອງທ່ຽວທ່ານໃດກຳລັງຊອກຫາສະຖານທີ່ພັກຜ່ອນທ່າມກາງທຳມະຊາດ, ອາກາດບໍລິສຸດທີ່ຢູ່ບໍ່ໄກຈາກເມືອງໃຫຍ່ກໍຢ່າລືມໄປພັກຜ່ອນຢູ່ທີ່ນ້ຳຕົກຕາດຊາຍແຫ່ງນີ້, ເຊິ່ງເໝາະສຳລັບນັກທ່ອງທ່ຽວທຸກເພດ, ທຸກໄວສາມາດໄປທ່ຽວໄດ້ທຸກລະດູ, ສຳລັບການເດີນທາງໄປ-ມາກໍສະດວກສະບາຍທັງລົດໂດຍສານ ຫຼື ລົດສ່ວນຕົວກໍສາມາດເດີນທາງໄປໄດ້.

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

ປະຫວັດບຸນເຂົ້າພັນສາ

ວັນບຸນເຂົ້າພັນສາ ໃນປີນີ້ ແມ່ນກົງກັບ ວັນທີ 20 ກໍລະກົດ 2024 ຫຼື ຂຶ້ນ 15 ຄໍ່າ ເດືອນ 8 ລາວ ຊຶ່ງເປັນມື້ທີ່ຊາວພຸດທະສາສະໜາ ຈະໄດ້ພ້ອມກັນນຳພາຄອບຄົວອອກໄປຟັງທຳມະເທສະໜາ ແລະ ໄດ້ມີການກະກຽມສິ່ງຂອງຕ່າງໆ ເພື່ອໄປທຳບຸນໃນມື້ເຂົ້າພັນສາ

“ອົດອາຫານ” ບໍ່ຊ່ວຍໃຫ້ຫຼຸດນຳ້ໜັກ

ການອົດອາຫານນັ້ນ ສຳພັນກັບການຈຳກັດ ແຄລໍຣີ່ ຂອງອາຫານທີ່ເຮົາກິນໃນແຕ່ລະມື້, ການນັບ ແຄລໍຣີ່ ເປັນວິທີທີ່ໄດ້ຮັບຄວາມນິຍົມຫຼາຍ ຊຶ່ງມີທີມນັກວິໄຈດ້ານໂພຊະນາການ ໃນ ສະຫະລັດ ອາເມຣິກາ ໄດ້ລາຍງານລົງໃນວາລະສານ ການແພດ ເຈເອເອັມເອ (JAMA International Medicine) ເຖິງຜົນການລົງເລິກກວດຜູ້ໃຫຍ່ ທີ່ລະບຸວ່າ ອ້ວນເຖິງ 100 ຄົນ ໂດຍແບ່ງຈາກພຶດຕິກຳການກິນເປັນ 3 ກຸ່ມ ຊຶ່ງເປັນເວລາ 1 ປີ.

ຈົບມໍປາຍ ຈະຮຽນຕໍ່ສາຍໃດດີ?

ເມື່ອກ່ອນ ການສຶກສາຖືໄດ້ວ່າມີບັນຍາກາດຄຶກຄື້ນ ແລະ ເປັນຂະບວນການ ຫຼາຍຄົນແຂ່ງກັນຮຽນ ແຂ່ງກັນເສັງເພື່ອຈະໄດ້ເຂົ້າຮຽນສາຍທີ່ຕົນເອງມັກ ແຕ່ຕົກມາຍຸກປັດຈຸບັນນີ້ ດ້ວຍສະພາບເສດຖະກິດ ສະພາບແວດລ້ອມ ແລະ ຫຼາຍຢ່າງໃນສັງຄົມທີ່ຜັນແປໄປ ເດັກນ້ອຍສ່ວນໃຫຍ່ບໍ່ຢາກທີ່ຈະຮຽນຕໍ່, ບາງຄົນກໍຈຳເປັນຕ້ອງອອກໄປເຮັດວຽກເພື່ອຫາເງິນຊ່ວຍຄອບຄົວ, ຫຼາຍຄົນກໍອອກມາປະກອບກິດຈະການເຮັດທຸລະກິດ ເປັນນາຍຂອງຕົນເອງ ແຕ່ບໍ່ວ່າຈະຢ່າງໃດກໍຕາມ ຖ້າຄົນທີ່ມີເງືອນໄຂກໍຍັງສະໜັບສະໜູນໃຫ້ຮຽນຕໍ່ສາຍວິຊາຊີບໃຫ້ຈົບຈະເປັນການດີທີ່ສຸດ.