ໃນຍຸກທີ່ນ້ຳມັນແພງ ການຂີ່ລົດຖີບກໍເປັນອີກທາງເລືອກໜຶ່ງໃນການປະຢັດນ້ຳມັນໄດ້, ນອກຈາກນັ້ນແລ້ວ ການຂີ່ລົດຖີບ ຍັງເປັນການອອກກຳລັງກາຍອີກປະເພດໜຶ່ງທີ່ມີປະໂຫຍດກັບເຮົາຢ່າງຫຼວງຫຼາຍ ເຊິ່ງຈະມີຫຍັງແດ່ນັ້ນ ເຮົາມາເບິ່ງກັນນຳກັນເລີຍ.
- ເພີ່ມພະລັງສະໝອງ: ມີຜົນການວິໄຈຈາກ Dr Charles Hillman ພົບວ່າ ການອອກກຳລັງກາຍ ຊ່ວຍເພີ່ມພະລັງໃຫ້ກັບສະໝອງ ແລະ ຊ່ວຍປ້ອງກັນໂຣກອັນໄຊຣເມີຣ ແລະ ເຮັດໃຫ້ເດັກນ້ອງມີນິດໄສດ້ານບວກຫຼາຍຂຶ້ນ ເຊິ່ງເປັນຜົນຈາກການໄດ້ຂີ່ລົດຖີບ ແລະ ຜົນວິໄຈຍັງພົບອີກວ່າ ການອອກກຳລັງກາຍຈະສາມາດຄວບຄຸມອາການຂອງ ໂຣກສະມາທິສັ້ນໄດ້ອີກດ້ວຍ.
- ຊ່ວຍຟື້ນຟູຮ່າງກາຍໄດ້ໄວຂຶ້ນ: ຈາກການວິໄຈເມື່ອບໍ່ດົນມານີ້ພົບວ່າ ຜູ້ປ່ວຍສູງອາຍຸມີອາການເຈັບເຂົ່າ ແລະ ມີອາການຂໍ່ເຊື່ອມ ມີອາການດີຂຶ້ນຫຼັງຈາກທີໄດ້ຮັບການແນະນຳໃຫ້ຂີ່ລົດຖີບເປັນກິດຈະກຳປະຈຳວັນ ເຮັດໃຫ້ເຫັນວ່າ ເມື່ອເຮົາມີອາຍຸຫຼາຍຂຶ້ນ ການແບ່ງເວລາມາອອກກຳລັງກາຍບໍ່ວ່າຈະເປັນການປັ່ນລົດຖີບ ບໍ່ເທົ່າໃດນາທີ ກໍສາມາດສ້າງປະໂຫຍດໃຫ້ເຮົາໄດ້ຫຼາຍແລ້ວ.
- ຊ່ວຍໃຫ້ຫົວໃຈແຂງແຮງ: ຈາກຜົນການວິໄຈຫຼ້າສຸດ ເຊິ່ງໄດ້ໃຊ້ເວລາວິໄຈດົນເຖິງ 5 ປີ ການເຝົ້າສັງເກດຄົນເຖິງ 1.500 ຄົນ ພົບວ່າ ຄົນທີ່ອອກກຳລັງກາຍທຸກມື້ ໂດຍສະເພາະແມ່ນການປັ່ນລົດຖີບ ຈະມີໂອກາດເປັນຄວາມດັນສູງ ໜ້ອຍລົງ 31% ນອກຈາກນີ້ ຍັງມີຜົນການວິໄຈວາລະສານ British Journal of Sports Medicine ຄົ້ນພົບວ່າການອອກກໍາລັງກາຍຢ່າງໜັກ ຈະຊ່ວຍຫຼຸດຄວາມດັນເລືອດໄດ້ຫຼາຍພໍໆ ກັນກັບການກິນຢາຕາມໃບສັ່ງແພດ.
- ຊ່ວຍຫຼຸດໄຂມັນ: ບໍ່ແປກເລີຍ ຖ້າການຫຼຸດນ້ຳໜັກຈະເປັນອີກໜຶ່ງປະໂຫຍດທີເຮົາຈະໄດ້ຈາກການຂີ່ລົດຖີບ, ເຊິ່ງຜົນການວິໄຈຫຼ້າສຸດພົບວ່າ ແມ່ຍິງກຸ່ມທີ່ອາຍຸຫຼາຍທີ່ເປັນໂຣກເບົາຫວານ ສາມາດຫຼຸດໄຂມັນທີເກາະຢູ່ພາຍໃນຮ່າງກາຍໄດ້ດ້ວຍວິທີການອອກກຳລັງກາຍເທົ່ານັ້ນ ຄວບຄູ່ໄປກັບການຄວບຄຸມອາຫານຈົນເປັນກິດຈະກຳປະຈຳວັນ ແລະ ຜົນຮັບໃນການວິໄຈ ຈາກກຸ່ມແມ່ຍິງທີມີອາຍຸນ້ອຍກວ່າ ກໍໃຫ້ຜົນອອກມາແບບດຽວກັນ.
- ຫຼຸດໂອກາດປ່ວຍເປັນມະເຮັງ: ການຄວບຄຸມນ້ຳໜັກ, ການອອກກຳລັງກາຍເປັນປະຈຳ, ການເລືອກກິນອາຫານທີມີປະໂຫຍດ ມີສ່ວນຊ່ວຍໃນການປ້ອງກັນໂຣກມະເຮັງໄດ້. ມີຜົນການວິໄຈຈາກວາລະສານ Journal of the American Medical Association ຈາກການເຝົ້າສັງເກດເບິ່ງຜູ້ຊາຍ 14.000 ຄົນ ສະຫຼຸບໄດ້ວ່າ ຜູ້ຊາຍໃນໄວກາງຄົນທີມີສຸຂະພາບແຂງແຮງ ຈະຊ່ວຍຫຼຸດໂອກາດໃນການເປັນມະເຮັງປອດ ແລະ ມະເຮັງລຳໄສ້ໃຫຍ່.
- ມີຄວາມເຄົາລົບຕົວເອງຫຼາຍຂຶ້ນ: ການອອກກຳລັງກາຍທົ່ວໄປລວມທັງການຂີ່ລົດຖີບ ສາມາດເພີ່ມລະດັບຄວາມເຄົາລົບຕົນເອງ (Self-Esteem) ໄດ້, ການອອກກໍາລັງກາຍໜັກ ຈະຊ່ວຍໃຫ້ຮ່າງກາຍຫຼັ່ງຮໍໂມນທີ່ເຮັດໃຫ້ຮູ້ສຶກດີອອກມາຫຼາຍຊະນິດ ໃຜທີມີບັນຫາເລື່ອງຄວາມໝັ້ນໃຈໃນຕົວເອງ ການອອກກຳລັງກາຍຊ່ວຍໄດ້ແນ່ນອນ.
- ມີອາຍຸທີຍືນຍາວຂຶ້ນ: ຈາກຜົນວິໄຈຄົນຂີ່ລົດຖີບ Tour de France ການຂີ່ລົດຖີບ ເຮັດໃຫ້ຜູ້ທີມັກຂີ່ລົດຖີບມີອາຍຸຍືນຂຶ້ນໄດ້ແທ້ ໂດຍອາດິດນັກຂີ່ລົດຖີບມືອາຊີບ ມີອາຍຸໄດ້ເຖິງ 81,5 ປີ ໃນຂະນະທີປະຊາຊົນທົ່ວໄປມີອາຍຸປະມານ 73,5 ປີ ເຊິ່ງມັນຫຼາຍກວ່າກັນເຖິງ 17% ເລີຍ ຜົນການວິໄຈຍັງພົບອີກວ່າ ແມ່ນແຕ່ການຂີ່ລົດຖີບໃນລະດັບທົ່ວໂລກ ກໍຍັງເຮັດໃຫ້ອາຍຸຍືນຂຶ້ນໄດ້ ຄົນທີ່ປ່ຽນຈາກການໃຊ້ລົດໃຫຍ່, ລົດຈັກ ໄປຂີ່ລົດຖີບ ຈະມີອາຍຸຍືນຂຶ້ນ 3-14 ເດືອນ ແລະ ການຂີ່ລົດຖີບພຽງ 1-60 ນາທີຕໍ່ອາທິດ ຈະຊ່ວຍຫຼຸດໂອກາດເສຍຊີວິດກ່ອນໄວ ເຖິງ 23%.
- ຊ່ວຍຫຼຸດຄວາມຄຽດ: ເຮົາທຸກຄົນກໍຮູ້ຢູ່ແລ້ວວ່າການອອກກຳລັງກາຍນັ້ນຊ່ວຍຫຼຸດຄວາມຄຽດ ແຕ່ຜົນການວິໄຈລ່າສຸດຈາກວາລະສານ Lancet ພົບວ່າອາສາສະໝັກນັບລ້ານຄົນ ຢືນຢັນວ່າການຂີ່ລົດຖີບຄືໜຶ່ງໃນກິດຈະກຳຫຼຸດຄວາມຄຽດທີດີທີສຸດ ເປັນອັນດັບຕົ້ນໆ ນັກຂີ່ລົດຖີບຈະມີມື້ທີສູນເສຍສຸຂະພາບຈິດໜ້ອຍກວ່າຄົນທົ່ວໄປເຖິງ 21,6% ຮອງລົງມາຈາກການຫຼີ້ນກິລາເປັນທີມ 22,3% ແລະ ຫຼາຍກວ່າການຫຼີ້ນກິລາແອໂຣບິກຊະນິດອື່ນໆ.
Hits: 14
