ວັດວິຊຸນ ຕັ້ງຢູ່ຂອບເຂດຕົວເມືອງຫຼວງພະບາງ ເຊິ່ງສ້າງຂຶ້ນໃນໄລຍະຊຸມປີ 1515 ພໍເມື່ອມາເຖິງຊຸມປີ ຄ.ສ 1800 ບັນດາພວກໂຈນທຸງດຳ ທະຫານຂ້າເສີກ ພາຍໃຕ້ການບັງຄັບບັນຊາຂອງຫໍ້ (ຈີນ) ເຊິ່ງໄດ້ເຂົ້າມາບຸກໂຈມຕີ ຮຸກຮານປຸກລະດົມ ເຮັດໃຫ້ສະຖານທີ່ແຫ່ງນີ້ຖືກທຳລາຍສ່ວນໜຶ່ງ ຈົນມາເຖິງປີ ຄ.ສ 1898 ຈຶ່ງໄດ້ມີການປະຕິສັງຂອນສະຖານທີ່ດັ່ງກ່າວສຳເລັດ ກໍໄດ້ມີການອັນເຊີນພະບາງມາປະດິດສະຖານໃນວັດແຫ່ງນີ້ ສະຖານທີ່ແຫ່ງນີ້ຈຶ່ງກາຍເປັນທີ່ປະທັບຂອງພະບາງ
ສຳລັບເອກະລັກຂອງວັດດັ່ງກ່າວແມ່ນ ສັງເກດເຫັນໄດ້ຈາກປະຕູໄມ້ ທີ່ມີການຂວັດລາຍຢ່າງສວຍງາມ ແລະປ່ອງຢ້ຽມທີ່ເປັນສະຖາປັດຕະຍາກຳແບບຂອນ, ທີ່ບໍ່ມີວັດແຫ່ງໃດຄື ເພາະໄດ້ເອົາແບບມາຈາກ ວັດພູຈຳປ່າສັກ ທີ່ຕັ້ງຢູ່ພາກໃຕ້ຂອງລາວ, ສ່ວນທາງດ້ານໃນຂອງວັດ ມີພະພຸດທະຮູບເກົ່າແກ່ ແລະຫີນສີລາຈາລືກ ຮູບແບບຕ່າງໆແຈກຢາຍເປັນຈຳນວນຫຼາຍ, ອີກດ້ານໜຶ່ງກໍສືມເນື່ອງມາຈາກ ມະເຫສີ (ເມຍ) ຂອງ ພະເຈົ້າ ວິຊຸນນະລາດ ເປັນຜູ້ນຳພາໃຫ້ມີການສ້າງພະທາດຂຶ້ນ ເຊິ່ງເປັນທາດທີ່ແຕກຕ່າງກັບທາດແຫ່ງອື່ນໆ ເພາະມີລັກສະນະເປັນຮູບຊົງກົມຕັດເຄີ່ງ ເບີ່ງແລ້ວຄືກັບໝາກໂມ ຈື່ງຮຽກວ່າ ທາດໝາກໂມ (ທາດປະທຸມ) ມາເຖິງປີ ຄ.ສ 1942 ວັດແຫ່ງນີ້ກໍໄດ້ຖືກນຳໃຊ້ເປັນພິພິດຕະພັນ ສີລະປະທາງດ້ານສາສະໜາ ແລະສະຖານທີ່ປະດິດສະຖານ ຂອງພະພຸດທະຮູບຄຳ ແລະວັດຖຸບູຮານອື່ນໆອີກເປັນຈຳນວນຫຼາຍ
ນອກຈາກສະຖານທີ່ດັ່ງກ່າວ ຈະເປັນວັດເກົ່າແກ່ ພາຍໃນເມືອງຫຼວງພະບາງແລ້ວ ກໍຍັງແມ່ນບ່ອນທີ່ປະຊາຊົນຊາວຫຼວງພະບາງ ກໍຄືແຂກບ້ານແຂກເມືອງໃຫ້ຄວາມເຄົາລົບນັບຖື, ໂດຍສະເພາະກໍແມ່ນຊາວພຸດທະສາສະນິກກະຊົນທັງຫຼາຍ ແນ່ນອນຄວາມເກົ່າແກ່ທີ່ມີມາ ແຕ່ດືກດຳບັນຍັງຖືກຖ່າຍທອດ ໃຫ້ບັນພະບູລຸດຄົນຮຸ່ນຫຼັງໄດ້ສຶກສາ
ແຫ່ງຂໍ້ມູນ: