ໃນໄລຍະ 6 ດືອນຕົ້ນປີ 2022 ນີ້ ຢູ່ແຂວງ ອັດຕະປື ໄດ້ມີນັກທ່ອງທ່ຽວເຂົ້າມາທ່ອງທ່ຽວທັງໝົດ 24.265 ຄົນ, ເຊິ່ງຈໍານວນດັ່ງກ່າວແມ່ນລ້ວນແຕ່ແມ່ນນັກທ່ອງທ່ຽວພາຍໃນປະເທດທັງໝົດ, ເມື່ອທຽບໃສ່ແຜນການປີແລ້ວບັນລຸໄດ້ພຽງ 26,96% ແລະ ສາມາດກະຈາຍລາຍໄດ້ຈາກການທ່ອງທ່ຽວໄດ້ທັງໝົດ 8,57 ຕື້ກີບ, ເມື່ອທຽບໃສ່ແຜນການແລ້ວບັນລຸໄດ້ 26,51% .
ອີງຕາມການລາຍງານຂອງ ທ່ານ ອ໋ອງຄໍາ ຄູນສະໄໝ, ຮອງຫົວໜ້າ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ ອັດຕະປື ໃນກອງປະຊຸມສະຫຼຸບ 6 ເດືອນຕົ້ນປີ ຂອງພະແນກ ຖວທ ແຂວງ ເມື່ອບໍ່ດົນຜ່ານມານີ້ ໃຫ້ຮູ້ວ່າ: ໄລຍະ 6 ເດືອນຕົ້ນປີ 2022 ນີ້ ພະແນກ ຖວທ ແຂວງອັດຕະປື ໄດ້ເອົາໃຈໃສ່ປັບປຸງ ແລະ ພັດທະນາ ການທ່ອງທ່ຽວຂອງແຂວງຢ່າງຕໍ່ເນື່ອງ ແລະ ມີຈຸດສຸມ; ໃນນີ້,ໄດ້ສໍາເລັດການຜ່ານແບບເບື້ອງຕົ້ນໂຄງການພັດທະນາພູສະພອງ, ຜ່ານແບບແນວຄວາມຄິດການພັດທະນາແຫຼ່ງທ່ອງທ່ຽວເຂດບ້ານ ຕໍາມໍຢອດ, ເມືອງ ສະໜາມໄຊ, ສໍາເລັດການສ້າງແຜນຟື້ນຟູການທ່ອງທ່ຽວຂອງແຂວງ ຫຼັງການລະບາດຂອງພະຍາດ ໂຄວິດ -19 ໄລຍະແຕ່ປີ 2022-2025 ແລະ ກໍາລັງສະເໜີແຂວງເພື່ອຮັບຮອງ, ສ່ວນໃນ 6 ເດືອນທ້າຍປີນີ້ ຂະແໜງການທ່ອງທ່ຽວ ແຂວງອັດຕະປື ຈະໄດ້ສຸມໃສ່ເງື່ອນໄຂ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ອງທ່ຽວພາຍໃນແຂວງ ໃນໂອກາດລັດຖະບານເປີດປະເທດຮັບນັກທ່ອງ ທ່ຽວ ຫຼັງພະຍາດ ໂຄວິດ-19 ໃຫ້ບັນລຸໄດ້ຕາມແຜນທີ່ວາງໄວ້ໝົດປີໃຫ້ໄດ້ 90 ພັນຄົນ ແລະ ກະຈາຍລາຍຮັບໄດ້ຈາກການທ່ອງທ່ຽວ ໝົດປີນີ້ໃຫ້ໄດ້ 33 ຕື້ກີບ.
ສຳລັບ ແຂວງ ອັດຕະປື ມີແຫຼ່ງທ່ອງທ່ຽວທີ່ໄດ້ຂື້ນບັນຊີແລ້ວຈໍານວນ 68 ແຫ່ງ, ໃນນັ້ນ ແຫຼ່ງທ່ອງທ່ຽວດ້ານທໍາມະຊາດ 38 ແຫ່ງ, ດ້ານວັດທະນະທໍາ 18 ແຫ່ງ ແລະ ແຫຼ່ງທ່ອງທ່ຽວດ້ານປະຫວັດສາດ 12 ແຫ່ງ, ມີຫົວໜ່ວຍທຸລະກິດບໍລິການທັງໝົດ 161 ແຫ່ງ, ມີບໍລິສັດທ່ອງທ່ຽວ 2 ຫົວໜ່ວຍ, ມີໂຮງແຮມ 22 ແຫ່ງ, ເຮືອນພັກ 31 ຫຼັງ, ຮ້ານອາຫານ 62 ຮ້ານ, ຮ້ານກິນດື່ມ 42 ຮ້ານ, ຮ້ານບັນເທິງ 1 ຫົວໜ່ວຍ ແລະ ຮ້ານຄາຣາໂອເກະ 1 ຫົວໜ່ວຍ.
ໂດຍ: ພອນປະເສິດ ສິດຕິພັນ ຂ.ອັດຕະປື