ຜາພຣະ ທີ່ຕັ້ງຢູ່ບ້ານ ປາກງ້າວ, ເມືອງ ຫ້ວຍຊາຍ, ແຂວງ ບໍ່ແກ້ວ ເປັນສະຖານທີ່ທ່ອງທ່ຽວ ທາງວັດທະນະທຳທີ່ສັກສິດ ແລະ ມີທຳມະຊາດທີ່ໜ້າທ່ອງທ່ຽວ ປະສົມປະສານກັບວັດທະນະທຳໄດ້ຢ່າງກົມກືນ ເຊິ່ງຢູ່ຫ່າງຈາກ ຕົວເມືອງ ຫ້ວຍຊາຍ ປະມານ 15 ກິໂລແມັດ.
ຜາພຣະ ແຫ່ງນີ້, ມີຮອຍຮູບພາບຢູ່ເທິງຜາຫິນ ທີ່ແກະສະຫຼັກດ້ວຍປາຍດາບຂອງ ເຈົ້າອານຸວົງ ເພື່ອເປັນການລະນຶກເຖິງ ດວງວິນຍານຂອງລູກສາວເພິ່ນ ທີ່ໄດ້ຊິ້ນພະຊົນຊີບ (ເສຍຊີວິດ) ຢູ່ສະຖານທີ່ແຫ່ງນີ້ ແລະ ຍັງຄົງປະກົດໃຫ້ຄົນລາວເຮົາທຸກຄົນໄດ້ເຫັນຈົນຮອດທຸກມື້ນີ້.
ນອກຈາກນີ້, ເພິ່ນຍັງໄດ້ຝັງເຄື່ອງຂອງທີ່ມີຄ່າຈຳນວນໜຶ່ງ ໄວ້ໂງ່ນຫີນກາງແມ່ນ້ຳຂອງ ແລະໄດ້ຂຽນຕຳລາຈາລຶກໄວ້ວ່າ: “ໄປພຽງຕາ ມາພຽງຕີນ” ແຕ່ໜ້າເສຍດາຍ ທີ່ເຄື່ອງຂອງມີຄ່າເຫຼົ່ານັ້ນ ໄດ້ຖືກກຸ່ມຄົນບໍ່ດີຂຸດຄົ້ນເອົາໄປໝົດແລ້ວ ເຫຼືອພຽງແຕ່ຮ່ອງຮອຍປະໄວ້ເທົ່ານັ້ນ.
ໃນການສະຫຼັກພຣະພຸດທະຮູບລົງໃນຜາ ຫຼື ກ້ອນຫິນ ແຄມຝັ່ງນ້ຳຂອງ ຜູ້ເຖົ້າຜູ້ແກ່ໄດ້ເລົ່າວ່າ ໃນສະໄໝກ່ອນ ເຈົ້າອານຸວົງ ໄດ້ເດີນທາງມາຕາມລຳນ້ຳຂອງ ເມື່ອມາຮອດເຂດດັ່ງກ່າວ ເຮືອທີ່ລູກສາວຂອງເພີ່ນນັ່ງມາ ໄດ້ລົ້ມລົງທີ່ແກ້ງຫິນ ໃນບໍລິເວນນີ້ ແລະ ເຮັດໃຫ້ລູກສາວຂອງ ເຈົ້າອານຸວົງເສຍຊີວິດ. ດັ່ງນັ້ນ, ເພີ່ນຈຶ່ງເຮັດ ອານຸສອນ ເພື່ອລະນຶກເຖິງລູກສາວຂອງເພີ່ນ ໂດຍການສ້າງພຣະພຸດທະຮູບໄວ້ທີ່ເທິງຜາ ໃກ້ບໍລິເວນທີເກີດອຸບັດເຫດ.
ຜາພຣະ ຖືວ່າເປັນສະຖານທີ່ອັນສັກສິດ ຂອງປະຊາຊົນແຂວງ ບໍ່ແກ້ວ ກໍຄືປະຊາຊົນທົ່ວປະເທດ ຜູ້ທີ່ໄດ້ຮູ້ເຖິງປະຫວັດຄວາມເປັນມາ ແລະ ມີສັດທາ ໃນສະຖານທີ່ອັນສັກສິດແຫ່ງນີ້ ຫຼາຍທ່ານທີ່ໄດ້ກາຍໄປ-ກາຍມາ ກໍຕ້ອງໄດ້ມາກາບໄຫວ້ບູຊາ ຂໍພອນອັນດີໃຫ້ແກ່ຕົນເອງ ແລະ ຄອບຄົວ.