ກົມການຈັດຫາງານ ກະຊວງ ແຮງງານ ແລະ ສະຫວັດດີການສັງຄົມ ແລະ ອົງການແຮງງານສາກົນ ໄດ້ເຊັນບົດບັນທຶກຄວາມເຂົ້າໃຈ (MOU) ໂຄງການສ້າງໂອກາດການມີວຽກເຮັດງານທຳໃຫ້ແຮງງານເຄື່ອນຍ້າຍກັບຄືນປະເທດ ແລະ ການພັດທະນາເສດຖະກິດທ້ອງຖິ່ນ ເພື່ອຕອບໂຕ້ຜົນກະທົບຂອງພະຍາດໂຄວິດ-19.
ການລົງນາມໃນຄັ້ງນີ້ ເປັນກິດຈະກຳໃນໂຄງການສ້າງໂອກາດ ການມີວຽກເຮັດງານທຳໃຫ້ແກ່ແຮງງານເຄື່ອນຍ້າຍກັບຄືນປະເທດ ແລະ ສາມາດເຊື່ອມເຂົ້າໃນການພັດທະນາເສດຖະກິດຂອງທ້ອງຖິ່ນ ພາຍໃຕ້ ແຜນງານຮ່ວມມື ອົງການແຮງງານສາກົນ ແລະ ປະເທດຍີ່ປຸ່ນ ໂດຍແຜນງານນີ້ ເປັນໜຶ່ງໃນໂຄງການຂອງອົງການແຮງງານສາກົນ ທີ່ໄດ້ຮັບທຶນຈາກລັດຖະບານຍີ່ປຸ່ນ ເພື່ອຈັດຕັ້ງປະຕິບັດໃນ 3 ແຂວງຂອງລາວຄື: ນະຄອນຫຼວງວຽງຈັນ, ສະຫວັນນະເຂດ ແລະ ແຂວງຈຳປາສັກ ໃນໄລຍະເວລາ 1 ປີ.
ນອກນັ້ນ, ຍັງເປັນການພັດທະນາສີມືແຮງງານໃນຂອບເຂດທົ່ວປະເທດເຂົ້າສູ່ຕຳແໜ່ງງານໃໝ່, ການປະກອບອາຊີບ ແລະ ສົ່ງເສີມການຈັດຫາວຽກເຮັດງານທຳໃນຕະຫຼາດແຮງງານ ຕາມຂະແໜງການເສດຖະກິດໃນຕົວເມືອງ-ຊົນນະບົດ ຢູ່ພາຍໃນ ແລະ ຕ່າງປະເທດ.
ຂໍ້ມູນຈາກ: ເສດຖະກິດ-ການຄ້າ