ພະນັກງານການບິນລາວ ໂພສອຳລາ! ຫຼັງຢຸດຖ້ຽວບິນ QV502 ນະຄອນຫຼວງ-ອຸດົມໄຊ.

ໃນວັນທີ 2 ຕຸລາ 2022 ທີ່ຜ່ານມາ ເປັນມື້ທີ່ຖ້ຽວບິນ QV502 ຂອງສາຍການບິນລາວ ທີ່ບິນລະຫວ່າງ ສະໜາມບິນສາກົນວັດໄຕ, ນະຄອນຫຼວງ ວຽງຈັນ ກັບສະໜາມບິນ ອຸດົມໄຊ ໄດ້ໃຫ້ບໍລິການເປັນຖ້ຽວສຸດທ້າຍ, ໂດຍພະນັກງານຂອງສາຍການບິນລາວທີ່ປະຈຳຢູ່ແຂວງ ອຸດົມໄຊ ໄດ້ອອກມາຖ່າຍຮູບຮ່ວມກັນ ແລະ ໂພສຂໍ້ຄວາມສະແດງຄວາມຮູ້ສຶກຂອງຕົນ ຜ່ານເຟສບຸກ ດ້ວຍຄວາມຮັກ ແລະ ຜູກພັນກັບອາຊີບວຽກງານທີ່ໄດ້ເຮັດມາ ໂດຍມີຕົວຢ່າງບາງເນື້ອຫາ ທີ່ພະນັກງານບາງຄົນໄດ້ໂພສດັ່ງນີ້:

ໂດຍຢູ້ໃຊ້ເຟສບຸກ Phimpha Philavong ໂພສຂໍ້ຄວາມວ່າ “23 ປີ ທີ່ຄຽງຄູ່ຢູ່ກັບການບິນລາວແລະກໍ່ເປັນມື້ສຸດທ້າຍທີ່ໃຫ້ບໍລິການກັບລູກຄ້າພ້ອມກັບສາຍຝົນທີ່ຊຸ່ມເຢັນຂອງນ້ອງພະນັກງານທຸກຄົນທີ່ເຮັດໜ້າທີ່,ຄວາມຮັບຜິດຊອບໃນມື້ນີ້ໃຫ້ດີທີ່ສຸດ”.

ສຳລັບຜູ້ໃຊ້ ເຟສບຸກ Noui Thepphavong ກໍໄດ້ໂພສຂໍ້ຄວາມທີ່ວ່າ “ຕະຫຼອດໄລຍະ 10 ປີທີ່ຜ່ານມາ, ມີທັງຮອຍຍິ້ມ, ນໍ້າຕາ, ຄວາມສຸກ, ຄວາມທຸກ, ຄວາມທໍ້ຖອຍ, ແລະ ຄວາມເມື່ອຍລ້າຕ່າງໆນາໆ ທີ່ຜ່ານເຂົ້າມາໃນຊີວິດ ແຕ່ເຮົາ ແຕ່ພວກເຮົາສາມາດຜ່ານມັນໄດ້ ເພາະມີເພື່ອນຮ່ວມງານທີ່ເປັນດັ່ງຄອບຄົວ ທີ່ຮ່ວມທຸກຮ່ວມສຸກນຳກັນມາ, ຈາກຫົວໜ້າ ກໍກາຍເປັນອ້າຍເອື້ອຍ,  ຈາກເພື່ອນຮ່ວມງານ ກໍກາຍເປັນເພື່ອນ ເປັນນ້ອງ, ຈົນເຖິງທຸກມື້ນີ້ ມັນເປັນການຮັບໃຊ້ຖ້ຽວບິນປົກກະຕິ ແຕ່ຄວາມຮູ້ສຶກແມ່ນແຕກຕ່າງຈາກມື້ເຮັດວຽກທີ່ຜ່ານມາ, ບາງຄົນຍິ້ມ ແຕ່ແຝງໄປດ້ວຍຄວາມໂສກເສົ້າ, ບາງ​ຄົນ​ມີ​ນ້ຳ​ຕາ​ໄຫຼ​ມາ​ຈາກ​ສ່ວນ​ເລິກ​ຂອງຫົວ​ໃຈ ທີ່ບໍ່ສາມາດອະທິບາຍໃນຄໍາເວົ້າໄດ້, ແຕ່ພວກເຮົາທຸກຄົນຕ້ອງຜ່ານຈຸດນີ້ໄປໃຫ້ໄດ້ ແລະ ຕໍ່ໄປເຮົາຈະເຂັ້ມແຂງຂຶ້ນກວ່າເກົ່າ.”

ເຊິ່ງສາເຫດທີ່ ການບິນລາວ ຕັດສິນໃຈຍົກເລີກຖ້ຽວບິນ QV502 ວຽງຈັນ-ອຸດົມໄຊ ພາຍຫຼັງທີ່ໃຫ້ບໍລິການມາເປັນເວລາ 20 ກວ່າປີ ເນື່ອງຈາກຈໍານວນຜູ້ໂດຍສານຫຼຸດລົງຢ່າງຕໍ່ເນື່ອງ ແລະ ຜູ້ໂດຍສານສ່ວນໃຫຍ່ ໄດ້ປ່ຽນໄປເດີນທາງດ້ວຍລົດໄຟ ລາວ-ຈີນ ແທນ ເຊິ່ງຖ້ຽວບິນສຸດທ້າຍ QV 502 ມີຜູ້ໂດຍສານພຽງແຕ່ 27 ຄົນໃນການບໍລິການ.

ແນວໃດກໍ່ຕາມ ກໍຍັງມີສາຍການບິນ ລາວສະກາຍເວ ເຊິ່ງເປັນສາຍການບິນຂອງລັດ ທີ່ຍັງບິນຈາກ ນະຄອນຫຼວງ-ອຸດົມໄຊ 1 ຖ້ຽວຕໍ່ມື້ (ໄປ-ກັບ) ໃນຕອນເຊົ້າ ໂດຍນຳໃຊ້ເຮືອບິນ ATR72.

More from author

Related posts

Latest posts

ເອັສຊີຈີ ສານຕໍ່ ໂຄງການ “SCG Sharing the Dream 2026”

ມອບທຶນການສຶກສາແກ່ເຍົາວະຊົນ ໃນ ສປປ ລາວ ຕໍ່ເນື່ອງເປັນປີທີ 15 ສ້າງຄົນລຸ້ນໃໝ່ "Green Active Generation" ພັດທະນາປະເທດໃຫ້ຍືນຍົງ 5 ພະຈິກ 2026 - ນະຄອນຫຼວງວຽງຈັນ ສປປ ລາວ: ກະຊວງສຶກສາທິການ ແລະ ກິລາ ສປປ ລາວ ຮ່ວມກັບ ເອັສຊີຈີ...

ຊຳຊຸງ ເປີດໂຕ 3 ຮຸ່ນໃໝ່ ຕ້ອນຮັບທ້າຍປີ ເນັ້ນປະສິດທິພາບດີ ໃນລາຄາທີ່ເຂົ້າເຖິງໄດ້

ຊຳຊຸງວາງຈຳໜ່າຍ Galaxy A18, Galaxy A08 ແລະ Galaxy A07s ແລ້ວໃນ ສປປ ລາວ ຍົກຈຸດເດັ່ນດ້ານປະສິດທິພາບ ດ້ວຍຊິບເຊັດລຸ້ນໃໝ່ MediaTek Helio G99+ ແລະ RAM Plus ທີ່ຊ່ວຍເພີ່ມຄວາມໄວໃນການ ຮັບ-ສົ່ງ ຂໍ້ມູນ ຫຼຸດອາການໜ່ວງ ເປີດແອັບພລິເຄຊັນໄດ້ໄວ,...

ປະຫວັດຄວາມເປັນມາຂອງ “ບຸນຊ່ວງເຮືອ” ປະເພນີລາວ.

ບຸນຊ່ວງເຮືອ ແມ່ນບຸນປະເພນີ ທີ່ໄດ້ປະຕິບັດສືບທອດກັນມາ ແຕ່ບູຮານນະການຈົນເຖິງທຸກວັນນີ້ ແລະ ເປັນກິດຈະກຳແຂ່ງຂັນກັນທາງນໍ້າທີ່ສອດຄ່ອງກັບວິຖີຊີວິດ, ຄວາມເປັນຢູ່ຂອງຄົນລາວ ແລະ ມັກມີການແຂ່ງຂັນເຮືອຄວບຄູ່ໄປກັບການເຮັດບຸນຊ່ວຍສ້າງບັນຍາກາດ ເຮັດໃຫ້ພາຍໃນງານບຸນມີຄວາມຄຶກຄື້ນມ່ວນຊື່ນຍິ່ງຂຶ້ນ.