Thursday, July 18, 2024
Lenovo

ສະຕາບັກຊ໌ ພ້ອມແບ່ງປັນປະສົບການ ແລະ ສ້າງສິ່ງທີ່ດີໃຫ້ກັບຊຸມຊົນທ້ອງຖິ່ນ ໃນລາວ

ເມື່ອກ່າວເຖິງແບຣນກາເຟທີ່ເປັນທີ່ນິຍົມຈາກທົ່ວໂລກ, ສະຕາບັກຊ໌ ຖືໄດ້ວ່າເປັນແບຣນອັນດັບຕົ້ນໆ ໃນໃຈຂອງໃຜຫຼາຍໆຄົນ ແລະ ໃນວັນທີ 3 ພະຈິກ 2022,ສະຕາບັກຊ໌ລາວ ໄດ້ເປີດຕົວສາຂາທຳອິດທີ່ ນະຄອນຫຼວງ ວຽງຈັນ ຢ່າງເປັນທາງການ.

ທ່ານ Por Lim, ຜູ້ຈັດການທົ່ວໄປຂອງ ສະຕາບັກຊ໌ ປະຈຳ ປະເທດລາວ ແລະ ກຳປູເຈຍ

ທ່ານ Por Lim, ຜູ້ຈັດການທົ່ວໄປຂອງ ສະຕາບັກຊ໌ ປະຈຳປະເທດລາວ ແລະ ກຳປູເຈຍ, ກ່າວວ່າ: ການເຂົ້າມາຂະຫຍາຍສາຂາຢູ່ໃນ ປະເທດລາວ ຂອງ ສະຕາບັກຊ໌ ແມ່ນເພື່ອເປັນການເພີ່ມທາງເລືອກໃນການດື່ມກາເຟ ຂອງລູກຄ້າ ຢູ່ໃນ ປະເທດລາວ ນອກຈາກນີ້ ຍັງເປັນການປະກອບສ່ວນເຂົ້າໃນການພັດທະນາ ແລະ ສ້າງຄວາມເຕີບໂຕຂອງອຸດສາຫະກຳກາເຟທີ່ຟົດຟື້ນໃນ ປະເທດລາວ ນຳອີກ.

ດ້ວຍປະຫວັດສາດການຜະລິດກາເຟ ທີ່ມີມາຢ່າງຍາວນານ, ປະເທດລາວ ເປັນປະເທດທີ່ມີວັດທະນະທໍາການ ດື່ມກາເຟ ທີ່ຟົດຟື້ນ ແລະ ມັນໄດ້ກາຍເປັນສ່ວນສໍາຄັນທີ່ຝັງເລິກໃນຈິດວິນຍານຂອງຄົນລາວ ໃນການດຳລົງຊີວິດປະຈຳວັນ ຂອງຄົນລາວໄປແລ້ວ.

“ປະເທດລາວ ເປັນປະເທດທີ 15 ໃນພາກພື້ນອາຊີ-ປາຊີຟິກ ແລະ ເປັນປະເທດທີ 84 ໃນໂລກ ທີ່ ສະຕາບັກຊ໌ ໄດ້ດຳເນີນກິດຈະການ. ເຊິ່ງພວກເຮົາຮູ້ສຶກຍິນດີ ແລະ ຕື່ນເຕັ້ນ ທີ່ໄດ້ເຂົ້າມາ ປະເທດລາວ, ແລະ ຮ່ວມມີບົດບາດ ໃນຕະຫຼາດລາວ.”  ທ່ານ Por Lim ກ່າວ.

ສຳລັບ ສະຕາບັກຊ໌ ແມ່ນເປັນທີ່ຮູ້ຈັກກັນດີໃນຖານະຮ້ານກາເຟທີ່ມີຄວາມເປັນເອກະລັກ, ເຊິ່ງຈະມາມອບປະສົບການຮ້ານກາເຟທີ່ອົບອຸ່ນ ແລະ ຄຸ້ນເຄີຍ, ຄຽງຄູ່ກັບເຄື່ອງດື່ມທີ່ຊົງດ້ວຍມື ທີ່ເປັນສູດສະເພາະຂອງ ສະຕາບັກຊ໌. “ພາທເນີ ຫຼື ພະນັກງານ ຂອງພວກເຮົາ ມີບົດບາດສໍາຄັນໃນການເຊື່ອມຕໍ່ ແລະ ແບ່ງປັນຄວາມຮູ້ກ່ຽວກັບກາເຟທີ່ພວກເຂົາມີໃຫ້ກັບລູກຄ້າ. ບໍ່ແມ່ນສະເພາະແຕ່ການເຕີບໂຕທາງທຸລະກິດເທົ່ານັ້ນ – ແຕ່ພວກເຮົາຕ້ອງການທີ່ຈະເປັນສ່ວນໜຶ່ງຂອງຊຸມຊົນ.”

ທ່ານ Por Lim ກ່າວວ່າ: “ຈຸດພິເສດຂອງ ສະຕາບັກຊ໌ ແມ່ນພວກເຮົາບໍ່ພຽງແຕ່ໃຫ້ບໍລິການກາເຟເທົ່ານັ້ນ, ແຕ່ພວກເຮົາຍັງມີ ຊາ ເຄື່ອງດື່ມປັ່ນ, ອາຫານ ແລະ ສິນຄ້າ ສໍາລັບລູກຄ້າຂອງພວກເຮົານຳອີກ. ພວກເຮົາຍັງໄດ້ສ້າງສັນສິນຄ້າຊຸດທີ່ມີລວດລາຍບອກເລົ່າ ເຖິງຕົວເມືອງຕ່າງໆ, ເຊິ່ງໄດ້ຮັບແຮງບັນດານໃຈໃນການອອກແບບຈາກສິ່ງຂອງ ແລະ ສະຖານທີ່ສຳຄັນພາຍໃນປະເທດ ເພື່ອເປັນການນຳສະເໜີ ຄວາມເປັນເອກະລັກຂອງປະເທດລາວ.

ພວກເຮົາໄດ້ຮ່ວມມືກັບສິລະປິນໃນທ້ອງຖິ່ນ ເພື່ອສ້າງສັນສິລະປະຕ່າງໆ ພາຍໃນຮ້ານ ແລະ ພວກເຮົາຍັງໄດ້ນໍາໃຊ້ ວັດສະດຸພາຍໃນປະເທດ ເຂົ້າໃນການຕົບແຕ່ງເກືອບທັງໝົດ ເພື່ອສ້າງຮັານແຫ່ງນີ້ຂຶ້ນ. ສະນັ້ນ, ສິລະປະ, ເຄື່ອງດື່ມ ອາຫານ ແລະ ທຸກສິ່ງທຸກຢ່າງພາຍໃນຮ້ານແຫ່ງນີ້ ແມ່ນຖືກສ້າງຂຶ້ນມາເພື່ອທ່ານ ແລະ ໝູ່ເພື່ອນຂອງທ່ານ, ລວມເຖິງນັກທ່ອງທ່ຽວ ໄດ້ມາຢ້ຽມຢາມ ແລະ ຮ່ວມແບ່ງປັນຄວາມສວຍສົດງົດງາມ ຂອງປະເທດລາວ ໃຫ້ພວກເຂົາໄດ້ຊື່ນຊົມ.”

ສະຕາບັກຊ໌ ໄດ້ນຳເອົາຄຸນະພາບ ແລະ ການບໍລິການທີ່ຫາທີ່ປຽບບໍ່ໄດ້ມາສູ່ລູກຄ້າທຸກໆທ່ານ; ການທີ່ລູກຄ້າ ສາມາດປັບແຕ່ງເຄື່ອງດື່ມໄດ້ເອງ ເປັນອີກສິ່ງໜຶ່ງທີ່ເຮັດໃຫ້ ສະຕາບັກຊ໌ ແຕກຕ່າງຈາກຮ້ານກາເຟອື່ນໆ. “ທ່ານສາມາດບອກພະນັກງານຂອງພວກເຮົາໃຫ້ເພີ່ມ, ຫຼຸດນໍ້າຕານ, ປ່ຽນເປັນນົມໄຂມັນຕໍ່າ ຫຼື ນົມຖົ່ວເຫຼືອງໄດ້, ເຊິ່ງມັນເປັນສິ່ງທີ່ສ້າງເອກະລັກ ແລະ ຄວາມພຶງພໍໃຈໃຫ້ກັບລູກຄ້າ. ນອກຈາກນັ້ນ ເພື່ອເປັນການສ້າງຄວາມສຳພັນທີ່ດີ ລະຫວ່າງລູກຄ້າ ແລະ ພະນັກງານ, ພວກເຮົາຈະຖາມຊື່ຂອງທ່ານ, ພ້ອມຂຽນລົງໃນຈອກທຸກໆຄັ້ງທີ່ທ່ານມາຢ້ຽມຢາມພວກເຮົາ, ເຊິ່ງມັນເປັນສິ່ງທີ່ພິເສດຫຼາຍ ແລະ ເຮັດໃຫ້ທ່ານຮູ້ສຶກວ່າເຄື່ອງດື່ມຈອກນັ້ນຖືກເຮັດມາເພື່ອທ່ານໂດຍສະເພາະ.

ນອກຈາກນີ້ ສະຕາບັກຊ໌ ຈະມີເມນູໃໝ່ເຂົ້າມາເລື້ອຍໆໃນອະນາຄົດ, ໂດຍສະເພາະ ເມນູຕາມລະດູການເຊັ່ນ ເຄື່ອງດື່ມປະຈຳວັນ Christmas ເຊິ່ງຈະເຮັດໃຫ້ລູກຄ້າສາມາດເພີດເພີນກັບເຄື່ອງດື່ມໃນ ເທດສະການຕ່າງໆ.” ທ່ານ Por Lim ຍັງໄດ້ກ່າວຕື່ມວ່າ:  “ພວກເຮົາມີບໍລິການເຄື່ອງດື່ມທີ່ຫຼາກຫຼາຍ, ຫຼາຍຂະໜາດ ແລະ ລາຄາທີ່ແຕກຕ່າງ ກັນ, ເຊິ່ງຂ້າພະເຈົ້າເຊື່ອວ່າ ມັນຈະສາມາດສ້າງທາງເລືອກໃຫ້ກັບລູກຄ້າໄດ້.”

ສະຕາບັກຊ໌ ຮູ້ສຶກເປັນກຽດທີ່ໄດ້ນໍາເອົາປະສົບການສະຕາບັກຊ໌ທີ່ຫາທີ່ປຽບບໍ່ໄດ້ມາສູ່ປະເທດລາວ, ຄຽງຄູ່ໄປກັບ ການສ້າງສິ່ງດີໆໃຫ້ກັບຊຸມຊົນໃນທ້ອງຖິ່ນ. “ຕອນນີ້ ພວກເຮົາມີພະນັກງານຄົນລາວປະມານ 21ຄົນ ແລະ ພວກເຮົາຕ້ອງການສ້າງໂອກາດໃນການເຕີບໂຕໃນອົງກອນໃຫ້ກັບພວກເຂົາ ເພື່ອໃຫ້ພວກເຂົາສາມາດບັນລຸຜົນສໍາເລັດ ໃນສາຍອາຊີບ. ພວກເຂົາໄດ້ມີໂອກາດໄປຝຶກອົບຮົມຢູ່ທີ່ ປະທດກຳປູເຈຍ ເປັນເວລາປະມານ ສາມເດືອນ ຫາ ສອງປີ. ພວກເຮົາຍັງໄດ້ຈັດໂປຣແກມ Coffee Master ຂຶ້ນ, ໂດຍພະນັກງານຈະໄດ້ຮັບການຝຶກອົບຮົມຢ່າງເລິກເຊິ່ງ ກ່ຽວກັບສີມືການເຮັດກາເຟ ແລະ ຄວາມຮູ້ກ່ຽວກັບຕົ້ນກໍາເນີດຂອງກາເຟ ລວມເຖິງວິທີການເພາະປູກ.

ດັ່ງນັ້ນ, ພະນັກງານຂອງພວກເຮົາຈຶ່ງສາມາດແບ່ງປັນຄວາມຫຼົງໄຫຼ ແລະ ຄວາມຮູ້ກ່ຽວກັບກາເຟຂອງພວກເຂົາໃຫ້ກັບລູກຄ້າ.” ໃນຂະນະທີ່ທາງບໍລິສັດໄດ້ເຟັ້ນຫາກາເຟຈາກທົ່ວໂລກ, ສະຕາບັກຊ໌ ມີຄວາມຍິນດີ ແລະ ຮູ້ສຶກຕື່ນເຕັ້ນ ທີ່ຈະຮຽນຮູ້ເພີ່ມເຕີມກ່ຽວກັບກາເຟໃນ ປະເທດລາວ.

“ຂ້າພະເຈົ້າເຊື່ອວ່າໃນອະນາຄົດ ພວກເຮົາຈະມີໂອກາດໄດ້ເຮັດວຽກຢ່າງໃກ້ຊິດຮ່ວມກັບທີມງານໃນທ້ອງຖິ່ນ ເພື່ອສຶກສາເພີ່ມເຕີມກ່ຽວກັບ ຕະຫຼາດກາເຟ ແລະ ກາເຟ ໃນປະທດລາວ.” ທ່ານ Por Lim ກ່າວ

ເນື່ອງຈາກ ສະຕາບັກຊ໌ ເຊິ່ງເປັນແບຣນລະດັບໂລກ, ການເຂົ້າມາດຳເນີນທຸລະກິດໃນປະເທດລາວ ຍັງຈະເປັນການດຶງດູດຄວາມສົນໃຈຈາກນັກ ລົງທຶນໃນທົ່ວໂລກອີກດ້ວຍ. ເມື່ອເວົ້າເຖິງແຜນການກ່ຽວກັບປະເທດລາວ, ທ່ານ Por Lim ໄດ້ຢືນຢັນອີກວ່າ ພວກເຮົາມີແຜນການດຳເນີນ ທຸລະກິດໄລຍະຍາວ ຢູ່ໃນລາວ.

“ໃນເວລານີ້, ພວກເຮົາຈະສຸມໃສ່ຮ້ານໃນ ນະຄອນຫຼວງ ວຽງຈັນ ໃຫ້ຫຼາຍຂຶ້ນ ເພື່ອມອບປະສົບການສະຕາບັກຊ໌ທີ່ດີ ດ້ວຍກາເຟ, ອາຫານ ແລະ ສິນຄ້າທີ່ມີຄຸນະພາບ, ເພື່ອເປັນການສ້າງຄວາມສຳພັນທີ່ດີລະຫວ່າງພະນັກງານ ແລະ ລູກຄ້າຂອງພວກເຮົາ, ທັງເປັນການສ້າງສະພາບແວດ ລ້ອມທີ່ດີໃຫ້ກັບລູກຄ້າ. ໃນຂະນະທີ່ພວກເຮົາກຳລັງເລັງໃສ່ ການສືບຕໍ່ຂະຫຍາຍທຸລະກິດໃນປະເທດລາວ. ພວກເຮົາຈະສືບຕໍ່ປະເມີນ ແລະ ຂະຫຍາຍສາຂາໃນ ນະຄອນຫຼວງວຽງຈັນ ຫຼື ບັນດາແຂວງອື່ນໆ, ເປັນຕົ້ນແມ່ນ ແຂວງຫຼວງພະບາງ ເພື່ອເພີ່ມຄວາມສຳພັນກັບລູກຄ້າ ໃຫ້ຫຼາຍຂຶ້ນ.”

ໃນຂະນະທີ່ຄາດຄະເນເຖິງທ່າອ່ຽງ ແລະ ສັກກະຍະພາບໃນການເຕີບໂຕໃນປະເທດລາວ, ທ່ານ Por Lim ເຊື່ອວ່າ ສະຕາບັກຊ໌ ຈະເປັນສະຖານທີ່ເຕົ້າໂຮມຜູ້ຄົນ, ເຮັດວຽກ, ຮໍ່າຮຽນ ຫຼື ພັກຜ່ອນ, ແລະ ຍົກສູງປະສົບການກາເຟໃນ ປະທດລາວ.


More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

ຈົບມໍປາຍ ຈະຮຽນຕໍ່ສາຍໃດດີ?

ເມື່ອກ່ອນ ການສຶກສາຖືໄດ້ວ່າມີບັນຍາກາດຄຶກຄື້ນ ແລະ ເປັນຂະບວນການ ຫຼາຍຄົນແຂ່ງກັນຮຽນ ແຂ່ງກັນເສັງເພື່ອຈະໄດ້ເຂົ້າຮຽນສາຍທີ່ຕົນເອງມັກ ແຕ່ຕົກມາຍຸກປັດຈຸບັນນີ້ ດ້ວຍສະພາບເສດຖະກິດ ສະພາບແວດລ້ອມ ແລະ ຫຼາຍຢ່າງໃນສັງຄົມທີ່ຜັນແປໄປ ເດັກນ້ອຍສ່ວນໃຫຍ່ບໍ່ຢາກທີ່ຈະຮຽນຕໍ່, ບາງຄົນກໍຈຳເປັນຕ້ອງອອກໄປເຮັດວຽກເພື່ອຫາເງິນຊ່ວຍຄອບຄົວ, ຫຼາຍຄົນກໍອອກມາປະກອບກິດຈະການເຮັດທຸລະກິດ ເປັນນາຍຂອງຕົນເອງ ແຕ່ບໍ່ວ່າຈະຢ່າງໃດກໍຕາມ ຖ້າຄົນທີ່ມີເງືອນໄຂກໍຍັງສະໜັບສະໜູນໃຫ້ຮຽນຕໍ່ສາຍວິຊາຊີບໃຫ້ຈົບຈະເປັນການດີທີ່ສຸດ.

ຍຸກນີ້! ຕ້ອງອວດກັນປະຢັດ

ເມື່ອສັງຄົມເຮົາກ້າວເຂົ້າສູ່ຍຸກທີ່ເຂົ້າຍາກມາກແພງ ຫຼາຍຄົນ “ຫາເຊົ້າກິນເຊົ້າ” ບໍ່ແມ່ນ “ຫາເຊົ້າກິນຄໍ່າ” ຄືແຕ່ກ່ອນແລ້ວ ເຄື່ອງໃຊ້ຂອງສອຍຕ່າງໆ ກໍລ້ວນແຕ່ລາຄາສູງຂຶ້ນເທົ່າຕົວ, ເຮົາຍັງຈະພາກັນມາອວດລວຍໂຊລົດສະນິຍົມດີໆ ໃຊ້ຂອງແພງໆ ກິນອາຫານຫຼູຫຼາ ຕາມຄົນມີລາຍຮັບທີ່ໝັ່ນຄົງ ຫຼື ຄົນຮັ່ງມີບໍ່ໄດ້ແລ້ວ

ຊໍາຊຸງ ເປີດໂຕ Galaxy Z Fold6 ແລະ Z Flip6 ຍົກລະດັບ Galaxy Al ລຸ້ນໃໝ່ສໍາລັບໂທລະສັບໜ້າຈໍພັບ.

ຊໍາຊຸງລາວ ເປີດໂຕ Galaxy Z Fold6 ແລະ Z Flip6 ພ້ອມໂປຣໂມຊັນພິເສດສໍາລັບຜູ້ທີ່ສັ່ງຊື້ລ່ວງໜ້າທີ່ Galaxy Experience Space ນະຄອນຫຼວງວຽງຈັນ  ເປິດປະສົບການ Galaxy AI ລຸ້ນຫຼ້າສຸດສໍາລັບໂທລະສັບມືຖືໜ້າຈໍພັບ  ໃຫ້ຜູ້ເຂົ້າຮ່ວມງານໄດ້ສໍາຜັດການໃຊ້ງານໂທລະສັບມືຖືທີ່ທັນສະໄໝ  ຮ່ວມກັບໂມງ Galaxy Watch7 ແລະ ຫູຟັງ Galaxy Buds3/Galaxy Buds3 Pro ເຊິ່ງໄດ້ເປີດໂຕພອ້ມກັນໃນງານ Samsung Unpacked ທີ່ປາຣີ  (Paris) ປະເທດຝຣັ່ງ ໃນວັນທີ 10 ກໍລະກົດ 2024 ທີ່ຜ່ານມາ.