ມວຍລາຍລາວ (Mouay Lai Lao)ຖືວ່າເປັນສິລະປະການຕໍ່ສູ້ ທີ່ວິຣະບູລຸດຊົນຊາດລາວແຕ່ສະໄໝບູຮານໄດ້ຄິດຄົ້ນຂຶ້ນມາ ເຊິ່ງເປັນທ່ວງທ່າລີລາການຊົກມວຍແບບລາວ ທີ່ເບິ່ງເຂັ້ມແຂັງ ໜ້າຢຳເກງ ແຕ່ກໍປະສົມປະສານໄວ້ດ້ວຍຄວາມສວຍງາມຜ່ານທ່າທາງຂອງຮ່າງກາຍ.
ມວຍລາຍລາວ ມີຕົ້ນກຳເນີດມາຈາກ ທ່າທາງການຊົກມວຍຕັ້ງແຕ່ສະໄໝບູຮານ ທີ່ເອີ້ນກັນວ່າ: “ມວນລາກຫາງ” ແລະ ໄດ້ສືບທອດກັນມາ ໂດຍມັກຈະນຳມາສະແດງຢູ່ໃນງານເທດສະການຕ່າງໆ ເຊັ່ນ: ງານບຸນບັ້ງໄຟ ເຊິ່ງຜູ້ທີ່ມາສະແດງ ຈະເປັນຄົນທີ່ມີຄວາມຊຳນານໃນທັກສະສິລະປະການຕໍ່ສູ້ຊະນິດນີ້ໂດຍກົງ.
ເຊິ່ງ “ມວຍເສືອລາກຫາງ” ຫຼື “ມວຍລາຍລາວ” ສະແດງເຖິງການຕໍ່ສູ້ທີ່ເຄື່ອນໄຫວຮ່າງກາຍດ້ວຍຄວາມອ່ອນຊ້ອຍ, ນຸ້ມນວນ ໂດຍໃນແຕ່ລະທ່າກໍເຕັມໄປດ້ວຍພາລະກຳລັງ ແລະ ຄວາມແຂັງແຮງເພື່ອລົ້ມຄູ່ຕໍ່ສູ້ຝ່າຍກົງກັນຂ້າມໃຫ້ໄດ້ ໂດຍມີທີເດັດຢູ່ທີ່ທ່າໄມ້ຕາຍທີ່ເອີ້ນກັນວ່າ: “ຫາງເສືອສະບັດ”.
ໃນປັດຈຸບັນ ບັນດານັກກິລາ ແລະ ຄູຝຶກສອນ ມວຍລາຍລາວ ກໍໄດ້ມີການສືບທອດ ແລະ ພັດທະນາ ປັບປຸງທ່າທາງໃຫ້ມີຄວາມສວຍງາມ ອ່ອນຊ້ອຍຫຼາຍຂຶ້ນ, ແຕ່ສຳລັບຄູ່ຕໍ່ສູ້ແລ້ວ ມວຍລາຍລາວ ຍັງຄົງເປັນເຊີງມວຍທີ່ອັນຕະລາຍ ແລະ ບໍ່ອາດປະໝາດສີມືໄດ້.
ຂໍ້ມູນອ້າງອີງຈາກ:
- 1. ເວັບໄຊ:
- 2. Mouay Lai Lao ສຳນັກຂ່າວສານປະເທດລາວ
- 3. Muay Lao – Wikipedia