ໃຜທີ່ໄດ້ໄປຮ້ານ 7-Eleven ທີ່ຫາກໍເປີດໂຕສາຂາທຳອິດໃນ ສປປ ລາວ ຕັ້ງແຕ່ວັນທີ 7 ກັນຍາ 2023, ກໍມີຄຳຖາມວ່າ ລາຄາສິນຄ້າທີ່ຮ້ານັ້ນ ຕ່າງຈາກຮ້ານອື່ນແນວໃດ?
ເພື່ອໃຫ້ໝົດຂໍ້ສົງໄສ ອິນໄຊລາວ ເລີຍລົງສຸ່ມເອົາລາຍການສິນຄ້າ ອຸປະໂພກ-ບໍລິໂພກ ທົ່ວໄປບາງລາຍການ ມາປຽບທຽບກັບຮ້ານຄ້າອື່ນໆ ໃນ ນະຄອນຫຼວງ ວຽງຈັນ ໃຫ້ໄດ້ເບິ່ງນຳກັນ ວ່າສິນຄ້າຈາກຮ້ານ 7-Eleven ນັ້ນ ກໍມີຖືກແດ່-ແພງແດ່ ບໍ່ໄດ້ຕ່າງຈາກຮ້ານມິນິມາກທົ່ວໄປເລີຍ.
ດັງນັ້ນ, ຈຶ່ງກາຍເປັນຂໍ້ໜ້າສົງໄສເພີ່ມຕື່ມວ່າ ແລ້ວເປັນຫຍັງຄົນຈຶ່ງຫຼັ່ງໄຫຼໄປ 7-Eleven ຫຼາຍແທ້! ຄຳຕອບເບື້ອງຕົ້ນຂອງເຮົາກໍຄື: ເພາະຊື່ສຽງຂອງ 7-Eleven ທີ່ມີໃນຕ່າງປະເທດ ປະກອບກັບຄວາມໃໝ່ຂອງຮ້ານ ທີ່ຫາກໍເປີດສາຂາທຳອິດໄປນັ້ນລະ!.
ແຕ່ສິ່ງທີ່ເຮັດໃຫ້ຮ້ານ 7-Eleven ມີຄົນເຂົ້າໄປອຸດໜຸນຕໍ່ເນື່ອງຫຼາຍທີ່ສຸດ ກໍຄືສິນຄ້າປະເພດອາຫານ ທີ່ມີສະເພາະ 7-Eleven ເທົ່ານັ້ນ! ເຫັນໄດ້ຈາກພາບຊັ້ນວາງສິນຄ້າອາຫານ ພ້ອມຮັບປະທານ ທີ່ພະນັກງານຈັດສິນຄ້າຕື່ມເຂົ້າບໍ່ທັນຄົນຊື້ ເຊິ່ງງານນີ້ບອກໄດ້ເລີຍວ່າເບິ່ງຂ້າມເລື່ອງລາຄາ ຖືກ-ແພງ ຫຼື ການຄວບຄຸມຕະຫຼາດຂອງສິນຄ້າໄທໄປກ່ອນ ເພາະຄົນຊື້ກໍບໍ່ໄດ້ເຂົ້າໄປເພາະລາຄາຂອງສິນຄ້າ ແລະ ສິນຄ້າທີ່ມາຈາກໄທ ກໍມີຂາຍຢູ່ທົ່ວໄປ ທັງຮ້ານນ້ອຍຮ້ານໃຫຍ່ ແຖມບາງຮ້ານກໍຖືກກວ່າ 7-Eleven ນຳອີກ, ຖ້າເບິ່ງລາຄາທີ່ເຮົາປຽບທຽບໃຫ້ເຫັນແລ້ວ ຫາກຮ້ານໃກ້ບ້ານຖູກກວ່າ ເຮົາກໍບໍ່ເຫັນເຫດຜົນທີ່ຈະຕ້ອງມາ 7-Eleven.
ແຕ່ຖ້າຢາກມາ ເພື່ອສຳພັດກັບບັນຍາກາດລະດັບໂລກຂອງ 7-Eleven ແລ້ວ ອິນໄຊລາວ ຂໍແນະນຳ ສະເລີປີ້ ເຊິ່ງເປັນເຄື່ອງດື່ມທີ່ມີຄົນມັກຢູ່ທົ່ວໂລກ ນັບເປັນເອກະລັກ ແລະ ມີປະຫວັດທີ່ຢູ່ຄູ່ກັບ 7-Eeven ຍາວນານກວ່າ 50 ປີເລີຍລະ! ແມ່ນແຕ່ຢູ່ໃນປະເທດເພື່ອນບ້ານ ກໍມີພຽງແຕ່ບໍ່ເທົ່າໃດສາຂາເທົ່ານັ້ນ ທີ່ສາມາດຫາກິນໄດ້.
ແຕ່ຖ້າຍັງຢາກໄດ້ເຄື່ອງລາຄາຖືກກວ່າຮ້ານອື່ນໆ ແທ້ໆ ນອກຈາກຈະເບິ່ງລາຍການທີ່ ອິນໄຊລາວ ສຳຫຼວດມາໃຫ້ແລ້ວ ໃຜທີ່ເຫັນສິນຄ້າປະເພດໃດລາຄາໜ້າສົນໃຈ ກໍແນະນຳເພີ່ມຕື່ມມາໃນຄອມເມັ້ນ ເພື່ອໃຫ້ໝູ່ເພື່ອນໄດ້ຮູ້ນຳ ເພາະຖ້າໄປຮອດແລ້ວຈະໄດ້ບໍ່ເສຍຖ້ຽວ.
- ໃນໝວດໝູ່ເຄື່ອງດື່ມ ທຸກຮ້ານທີ່ເກັບຂໍ້ມູນມາພົບວ່າ ລາຄາຕ່າງກັນບໍ່ເກີນ 1.000 ກີບ.
2. ເນື່ອງຈາກວ່າ ເຮົາບໍ່ໄດ້ເບິ່ງລາຍລະອຽດຈົນເຖິງວັນໝົດອາຍຸ ເລີຍບອກບໍ່ໄດ້ວ່າ ເປັນສິນຄ້າທີ່ນຳເຂົ້າມາຄົນລະເທື່ອ ຫຼື ບໍ່? ແລະ ຈະຂາຍລາຄາເກົ່າອີກດົນປານໃດ ເພາະຊ່ວງລາຄາຂອງເຂົ້າໜົມກິນຫຼິ້ນ ທີ່ຫ່າງກັນຫຼາຍທີ່ສຸດຄືຕ່າງກັນເຖິງ 6.500 ກີບ.
3. ສຳລັບໝວດໝູ່ ເຄື່ອງປຸງແຕ່ງອາຫານນີ້ ເວົ້າໄດ້ວ່າລາຄາໃຫ້ຄຽງ ຫຼື ເທົ່າໆກັນ.
4. ໃນໝວດໝູ່ອາຫານສຳເລັດຮູບ ຕ້ອງຍອມຮັບວ່າ ລາຄາໃນຮ້ານ 7-Eleven ຍັງເຮັດໄດ້ບໍ່ດີປານໃດ