ສປປ ລາວ ຈະສົ່ງຕົວແທນນັກກິລາລົງແຂ່ງໃນການແຂ່ງຂັນອີສະປອດລະດັບໂລກງານ World Esport Championship 2024 ທີ່ ເມືອງຣີຍາດ, ປະເທດຊາອຸດິອາລາເບຍ ເຊີ່ງມີປະເທດທີ່ເຂົ້າຮ່ວມການແຂ່ງຂັນເຖິງ 130 ປະເທດ ເຊິ່ງສະຫະພັນກິລາອີສະປອດແຫ່ງຊາດລາວ ຕົກລົງເຫັນດີສົ່ງນັກກິລາເຂົ້າຮ່ວມການແຂ່ງຂັນ 3 ປະເພດເກມ, 4 ລາຍການແຂ່ງຂັນ ໄດ້ແກ່: PUBG MOBILE, MOBILE LEGENDS: BANG BANG (ປະເພດຊາຍ) ແລະ (ປະເພດຍິງ), EFOOTBALL (CONSOLE).
ຕາມເກມທັງໝົດທີ່ຖືກບັນຈຸໃນງານ ລາວ ເຮົາບໍ່ໄດ້ສົ່ງນັກກິລາຕົວແທນໄປພຽງແຕ່ 2 ເກມເທົ່ານັ້ນໄດ້ແກ່ເກມ DOTA2 ແລະ COUNTER STRIKE 2 ແລະ ຕາມແຜນ Road to World Esports Championships 2024 ຈະມີການຄັດເລືອກ ແລະ ແຜນການເຂົ້າຮ່ວມ ຈະເລີ່ມໃນຊ່ວງ ເດືອນ ມິນາ 2024 ນີ້.
ນອກນັ້ນ, ທ່ານ ໂຈນາທານ ສິຣິສັກດາ ປະທານສະຫະພັນກິລາອີສະປອດແຫ່ງຊາດລາວ ພ້ອມດ້ວຍວີຊາການສະຫະພັນ ຍັງໄດ້ເຂົ້າພົບປະໂອ້ລົມນຳ ທ່ານ ຮອງພະແນກ ແລະ ວິຊາການ ພະແນກສຶກສາທິການ ແລະ ກິລາແຂວງ ຫຼວງພະບາງ, ເພື່ອປຶກສາຫາລື ແລະ ຫາທິດຊີ້ນຳໃນວຽກງານອີສະປອດ ທີ່ກ່ຽວພັນກັບການຊຸກຍູ້ວຽກງານການສຶກສາ ຄວບຄູ່ໄປພ້ອມກັບວຽກງານການທ່ອງທ່ຽວ ທີ່ມີຄວາມເປັນໄປໄດ້ໃນອະນາຄົດ.
ເຊິ່ງຈະເປັນການກຽມພ້ອມ ແລະ ການເຟັ້ນຫານັກກິລາອີສະປອດປະຈຳແຕ່ລະແຂວງ ແລະ ແຕ່ລະສະຖາບັນ ເພື່ອກຽມເຂົ້າຮ່ວມການແຂ່ງຂັນກິລານັກຮຽນມັດທະຍົມສຶກສາທົ່ວປະເທດ ແລະ ມະຫະກຳກິລາມະຫາວິທະຍາໄລ ທີ່ຈະຈັດຂື້ນໃນປີ 2024 ແລະ ມະຫະກຳກິລາແຫ່ງຊາດໃນປີ 2025 ອີກດ້ວຍ.
ທີ່ມາ: Lao Esports Federation