ປັດຈຸບັນການປູກຝັງ-ລ້ຽງສັດ ເພື່ອຂາຍເປັນສິນຄ້າ, ແມ່ນອີກທາງເລືອກໜຶ່ງສໍາລັບປະຊາຊົນ ແລະ ເປັນປັດໃຈສຳຄັນໃຫ້ແກ່ການພັດທະນາຊົນນະບົດ, ແກ້ໄຂຄວາມທຸກຍາກ ແລະ ສາມາດສ້າງລາຍຮັບໄດ້ເປັນກອບເປັນກຳ.
ດັ່ງຄອບຄົວຂອງນາງ ພົມມາ ແສງສຸລິຍາ, ໄວ 31 ປີ, ສະມາຊິກສະຫະພັນແມ່ຍິງຢູ່ ບ້ານດົງວຽງ, ເມືອງວຽງພູຄາ, ແຂວງຫຼວງນ້ຳທາ ທີ່ມີລາຍຮັບຈາກການເຮັດກະສິກຳ ປູກຝັງ-ລ້ຽງສັດ ບໍ່ຕ່ຳກວ່າ 370 ລ້ານກີບຕໍ່ປີ.
ນາງ ພົມມາ ແສງສຸລິຍາ ກ່າວວ່າ: ຄອບຄົວຂອງເພິ່ນມີອາຊີບເປັນຊາວນາ ແລະ ເຫັນວ່າຄອບຄົວ ຕົນເອງມີຄວາມຫຍຸ້ງຍາກ ພຽງແຕ່ກຸ້ມຢູ່ກຸ້ມກິນ, ລາຍຮັບຍັງຕ່ຳ, ມາຮອດປີ 2014 ໄດ້ມີແນວຄິດລິເລີ່ມ ດ້ວຍຄວາມເຫັນດີເປັນເອກະພາບພາຍໃນຄອບຄົວ, ຄວາມດຸຫມັ່ນຂະຫຍັ່ນພຽນຈິ່ງຕັດສິນໃຈຫັນມາເຮັດການກະເສດ, ປູກຝັງ-ລ້ຽງສັດ ສ້າງລາຍຮັບເຂົ້າໃນຄອບຄົວ, ເປັນຕົ້ນແມ່ນ ການປູກໝາກແຕງ, ໝາກເຂືອ, ໝາກເພັດ, ສາລີຫວານ, ໝາກນໍ້າເຕົ້າ, ໝາກອຶ່, ຜັກຫອມ ແລະ ອື່ນໆ ຂາຍເປັນອາຊີບ ເຊິ່ງມີເນື້ອທີ່ການປູກພືດໝູນວຽນ 3000 ຕາແມັດ ແລະ ລ້ຽງລັດ ປະເພດ ງົວ, ໝູ, ສັກປີກ, ມີໜອງປາ 1 ໜອງ, ຂາຍເຂົ້າ, ແລະ ອື່ນໆ.
“ຈາກການຍຶດຖືອາຊີບປູກຝັງລ້ຽງສັດຂາຍເປັນສິນຄ້າເຮັດໃຫ້ຄອບຄົວ ມີຖານະດີຂຶ້ນກວ່າເກົ່າ, ຊີວິດການເປັນຢູ່ໄດ້ຮັບການປັບປຸງຮອບດ້ານ ເສດຖະກິດຂອງຄອບຄົວມີບາດກ້າວຂະຫຍາຍຕົວຢາງຕໍ່ເນືອງ” ນາງພົມມາ ກ່າວ.
ຫຼັງຈາກນັ້ນ, ເພິ່ນກໍໄດ້ກາຍເປັນບຸກຄົນ ແລະ ຄອບຄົວແບບຢາງທີ່ດີໃຫ້ແກ່ສະມາຊິກສະຫະພັນແມ່ຍິງ ຫຼາຍໆຄອບຄົວພາຍໃນບ້ານໄດ້ຮຽນຮູ້ເອົາປະສົບການ ແລະ ມູນເຊື້ອອັນດຸໝັນຂະຍັນພຽນຂອງເພີ່ນ ໄປພັດທະນາເສດຖະກິດຄອບຄົວຂອງຕົນໃຫ້ມີຢູ່ມີກິນ ແລະ ຫຼຸດພົ້ນອອກຈາກຄວາມທຸກຍາກເທື່ອລະກ້າວ.
ນາງພົມມາ ກ່າວວ່າ: ນອກຈາກຄວາມດຸໝັ່ນຂະຫຍັນພຽນແລ້ວ ການເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ກໍເປັນອີກສິ່ງໜຶ່ງທີ່ເຮັດໃຫ້ເສດຖະກິດຄອບຄົວດີຂຶ້ນ ຕາມແນວທາງອັນຖືກຕ້ອງຂອງພັກ ແລະ ລັດ.
ໂດຍ: ຄໍາປິງ