“ໝາກຖົ່ວລຽນ” ຂຶ້ນຊື່ເລື່ອງຄວາມແຊບ ແຕ່ຖ້າກິນຖົ່ວລຽນຫຼາຍເກີນໄປ ໃນຊ່ວງອາກາດຮ້ອນຈັດແບບນີ້ ອາດສົ່ງຜົນເສຍຕໍ່ສຸຂະພາບແຖມໃຫ້ອີກ ເນື່ອງຈາກວ່າ ຖົ່ວລຽນ ີເປັນໝາກໄມ້ທີ່ມີລິດຮ້ອນ ການທີ່ເຮົາກິນຫຼາຍເກີນໄປ ອາດເຮັດໃຫ້ເກີດອາການຮ້ອນໃນ, ປາກເປື່ອຍ, ຄໍແຫ້ງ, ເປັນສິວ ອີກທັງຍັງອຸດົມໄປດ້ວຍໃຍອາຫານທີ່ບໍ່ລະລາຍນ້ຳ ຖ້າກິນໃນປະລິມານຫຼາຍເກີນໄປ ອາດເຮັດໃຫ້ເກີດອາການທ້ອງຍື່ງ, ແໜ້ນທ້ອງ ຫຼື ທ້ອງບິດໄດ້ ໂດຍສະເພາະໃນມື້ທີ່ອາກາດຮ້ອນແຮງ ລະບົບຍ່ອຍຕ້ອງເຮັດວຽກໜັກຫຼາຍຂຶ້ນ.
ດັ່ງນັ້ນ, ຈຶ່ງຄວນບໍລິໂພກຖົ່ວລຽນໃນປະລິມານພໍສົມຄວນ ໂດຍຄຳແນະນຳສຳລັບຜູ້ໃຫຍ່ທີ່ມີສຸຂະພາບແຂງແຮງ ຄືຄວນບໍລິໂພກນວນຖົ່ວລຽນປະມານ 1-2 ຂີດຕໍ່ມື້ ແລະ ຄວນດື່ມນ້ຳລ້າ ໃຫ້ພຽງພໍຮ່ວມນຳ, ເພື່ອຊ່ວຍລະບົບຍ່ອຍອາຫານໃຫ້ເຮັດວຽກໄດ້ຢ່າງສະດວກ.
ນອກຈາກນີ້ ຖົ່ວລຽນ ຍັງມີນ້ຳຕານ ແລະ ໂພແທສຊຽມສູງ ຜູ້ປ່ວຍໂຣກເບົາຫວານ ແລະ ຜູ້ປ່ວຍຄວາມດັນເລືອດສູງ ຄວນປຶກສາແພດ ເພື່ອໃຫ້ແນ່ໃຈກ່ອນ, ແຕ່ທັງນີ້ ປະລິມານທີ່ແນະນຳ ອາດຫຼາຍກວ່າ ຫຼື ໜ້ອຍກວ່ານີ້ ຕາມແຕ່ປັດໄຈຮ່າງກາຍຂອງແຕ່ລະຄົນ.
ສຳລັບຄົນທີ່ນິຍົມຊື້ຖົ່ວລຽນ ແລ້ວມາຮັບປະທານເລີຍ ສາມາດຄຳນວນປະລິມານຂອງນວນຖົ່ວລຽນໄດ້ຄ້າວໆ ຄື ຖົ່ວລຽນ 1 ກິໂລ ຈະມີນວນຖົ່ວລຽນປະມານ 5-6 ຂີດ (ຫຼືອາດໜ້ອຍກວ່ານັ້ນ) ດັ່ງນັ້ນ, ຖ້າຊື້ຖົ່ວລຽນຂະໜາດກາງ ທີ່ນ້ຳໜັກປະມານ 3 ກິໂລ ກໍຈະໄດ້ນວນຖົ່ວລຽນປະມານ 1,5-1,8 ກິໂລ ເຊິ່ງອາດຈະຫຼາຍເກີນໄປສຳລັບຄົນໜຶ່ງຄົນ ທີ່ຈະຮັບປະທານໃຫ້ໝົດພາຍໃນ 3-4 ມື້. ດັ່ງນັ້ນ, ຈຶ່ງຄວນຫາທາງເລືອກອື່ນປະກອບໄວ້ນຳ ເພື່ອທີ່ຈະໄດ້ທັງຄວາມແຊບ ແລະ ສຸຂະພາບທີ່ດີ ຈາກສານອາຫານອັນອຸດົມສົມບູນຂອງລາຊາແຫ່ງໝາກໄມ້ຊະນິດນີ້.