ຖ້າເວົ້າເຖິງສິນຄ້າກະສິກຳທີ່ພົ້ນເດັ່ນໃນປະເທດລາວເຮົາ ສິ່ງທຳອິດທີ່ຄວນຄິດຫານັ້ນກໍຄື “ກາເຟ” ນອກຈາກຈະມີຣົດຊາດທີ່ເປັນເອກະລັກແລ້ວ ຍັງເຕັມໄປດ້ວຍເລື່ອງລາວ, ວັດທະນະທຳ ແລະ ປະວັດຄວາມເປັນມາທີ່ຍາວນານ.
“ກາເຟລາວ” ສ່ວນຫຼາຍແມ່ນປູກໃນດິນທີ່ມີຄຸນນະພາບສູງ ເຊິ່ງໄດ້ຖືກບັນທຶກໄວ້ຕັ້ງແຕ່ຕົ້ນສັດຕະວັດທີ 20 ໃນສະໄໝຝຣັ່ງເຂົ້າມາສຳຫຼວດ. ດ້ວຍເອກະລັກຂອງພູພຽງບໍລະເວນ ເຊິ່ງປະກອບໄປດ້ວຍດິນພູເຂົາໄຟເກົ່າທີ່ອຸດົມໄປດ້ວຍແຮ່ທາດຕ່າງໆ ເປັນອາຫານຊັ້ນເລີດຂອງຕົ້ນກາເຟ, ພື້ນທີ່ຄວາມສູງ ອາກາດເຢັນພໍດີແກ່ການປູກໂດຍທໍາມະຊາດ ຈຶ່ງໄດ້ເມັດກາເຟທີ່ສະອາດ ມີຄວາມໜາ ແລະ ກິ່ນຫອມ ຣົດຊາດທີ່ລົງໂຕໂດຍບໍ່ຈໍາເປັນຕ້ອງມີການເຕີມແຕ່ງໃດໆ, ທຸກມື້ນີ້ກາແຟລາວຖືວ່າເປັນທີ່ນິຍົມ ແລະ ໄດ້ຮັບຄວາມສົນໃຈຫຼາຍຈາກຄົນຮັກກາເຟໃນທົ່ວໂລກ.
ຊາວສວນຜູ້ປູກກາເຟ ຍຶດຖືອາຊີບນີ້ມາຈາກບັນພະບຸລູດມາດົນນານເກືອບຮ້ອຍປີ, ປະກອບສ່ວນສ້າງເສດຖະກິດ ສົງຄົມລາວ ໃຫ້ກ້າວຫນ້າ ແລະ ການປູກກາເຟສ່ວນຫຼາຍແມ່ນປູກແບບທຳມະຊາດ ປອດສານຜິດ ປອດສານເຄມີ, ເກັບກ່ຽວໂດຍຄົນທີ່ມີປະສົບການຈຶ່ງສາມາດຄັດສັນເອົາເມັດກາເຟທີ່ມີຄຸນນະພາບສູງແທ້ໆ ສົ່ງເຖິງຜູ້ບໍລິໂພກເຊິ່ງແຕກຕ່າງຈາກຕ່າງປະເທດທີ່ປູກໂດຍໃຊ້ປຸ່ຍເຄມີ ຫຼື ໃຊ້ເຄື່ອງຈັກຊ່ວຍເຊິ່ງຈະເຮັດໃຫ້ຄຸນນະພາບຂອງເມັດກາເຟທີ່ໄດ້ຫຼຸດລົງ.
ຍ້ອນພື້ນທີ່ການຜະລິດທີ່ດີ ຂະບວນການປູກແບບທຳມະຊາດ ແລະ ພິຖິພິຖັນໃນທຸກຂັ້ນຕອນ ຈຶ່ງເຮັດໃຫ້ເປັນທີ່ຖືກອົກຖືກໃຈຂອງຕ່າງຊາດ, ເຊິ່ງໃນປີ 2022 ທີ່ຜ່ານມາ “ກາເຟລາວ” ກໍໄດ້ຮັບລາງວັນອັນດັບໜຶ່ງຂອງທະວີບອາຊີ ໃນງານແຂ່ງຂັນກາເຟໂລກ.
ນີ້ກໍເປັນການກາລັນຕີໄດ້ເລີຍວ່າ “ກາເຟລາວ” ກໍມີຣົດຊາດທີ່ໂດດເດັ່ນ ບໍ່ໜ້ອຍໄປກວ່າກາເຟຊາດໃດໃນໂລກ ປັດຈຸບັນ, ການຊື້ຂາຍກາເຟມີທ່າແຮງຂະຫຍາຍຕົວເພີ່ມຂຶ້ນ ທັງພາຍໃນ ແລະ ຕ່າງປະເທດ ສະນັ້ນ, ເຮົາພາກັນຫັນມາສົ່ງເສີມສິນຄ້າລາວໄປພ້ອມໆ ກັນເພື່ອເຮັດໃຫ້ກາເຟລາວ ເປັນທີ່ຮູ້ຈັກ ແລະ ດັງໄກໄປທົ່ວໂລກ.