ທ່ານ ບຸນໜັກ ໄຊຊະນະສົງຄາມ ຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ກະຊວງສາທາລະນະສຸກ ໄດ້ໃຫ້ສຳພາດ ໃນວັນທີ 26 ກໍລະກົດ 2019 ເນື່ອງໃນວັນອັກເສບຕັບໂລກ 2019 ທີ່ກະຊວງສາທາລະນະສຸກ ກ່າວວ່າ:
ໃນປະເທດລາວຫຼາຍກວ່າ 8.000 ຄົນ ໄດ້ເສຍຊີວິດ ປີ 2015 ເນື່ອງຈາກການຕິດເຊື້ອໄວຣັດຕັບອັກເສບຊຳເຮື້ອມາດົນ ແລະ ພະຍາດມະເຮັງຕັບແມ່ນກວມເອົາປະມານ 41% ຂອງການຕາຍຍ້ອນພະຍາດມະເຮັງທັງໝົດ ສປປ ລາວ ແມ່ນໜຶ່ງໃນບັນດາປະເທດທີ່ມີອັດຕາການຕິດເຊື້ອພະຍາດຕັບອັກເສບສູງ ໂດຍສະເພາະ ແມ່ນຊະນິດ B ແລະ C ເຊິ່ງອັດຕາການຕິດເຊື້ອພະຍາດຕັບອັກເສບ B ຊຳເຮື້ອແມ່ນ ປະມານ 8,7% ທີ່ກວດພົບຈາກຜູ້ບໍລິຈາກເລືອດ ແລະ ອັດຕາການຕິດເຊື້ອພະຍາດຕັບອັກເສບ C ຊຳເຮື້ອແມ່ນ 0.7% (49.000 ຄົນ) ສ່ວນໃຫຍ່ແມ່ນຕິດຕໍ່ຈາກແມ່ສູ່ລູກ ເພາະການກວດຫາເຊື້ອພະຍາດຕັບອັກເສບໃນແມ່ຍິງຖືພາ ໃນປະເທດລາວແມ່ນຍັງມີອັດຕາໜ້ອຍຫຼາຍ.
ທ່ານ ດຣ ບຸນໜັກ ໄດ້ກ່າວວ່າ:
ສປປ ລາວ ໄດ້ປະຕິບັດຕາມຄຳແນະນຳຂອງອົງການອະນາໄມໂລກ ກ່ຽວກັບການສັກຢາປ້ອງກັນພະຍາດຕັບອັກເສບ ເຊິ່ງໄດ້ເລີ່ມປະຕິບັດມາຕັ້ງແຕ່ປີ 2004 ໂດຍສະເພາະ ແມ່ນພະຍາດຕັບອັກເສບ B ສາມາດປ້ອງກັນໄດ້ ໂດຍການຮັບຢາວັກແຊັງທີ່ປອດໄພ ມີປະສິດທິພາບ ແລະ ມີປະສິດທິຜົນ ອົງການອະນາໄມໂລກໄດ້ແນະນຳໃຫ້ເດັກທຸກຄົນເຂົ້າຮັບວັກແຊັງ ປ້ອງກັນພະຍາດຕັບອັກເສບ HBV 3 ຄັ້ງ ແລະ ຄວນໄດ້ຮັບວັກແຊັງຄັ້ງທຳອິດພາຍໃນ 24 ຊົ່ວໂມງ ຫຼັງການເກີດ ລວມເຖິງແນະນຳໃຫ້ມີການກວດຫາເຊື້ອພະຍາດອັກເສບຕັບໃນແມ່ຍິງຖືພາ ເພື່ອຈະໄດ້ເຂົ້າເຖິງການປິ່ນປົວ ແລະ ປ້ອງກັນ ການນຳໃຊ້ອຸປະກອນການແພດທີ່ອະເຊື້ອ ແລະ ນຳໃຊ້ເຂັມສັກຢາໃໝ່ທຸກຄັ້ງ.
ພະຍາດຕັບອັກເສບ ແມ່ນພະຍາດທີ່ເກີດຈາກໄວຣັດ ທີ່ທຳລາຍຕັບ ເຊິ່ງເປັນໄພຄຸກຄາມທາງສຸຂະພາບທີ່ງຽບ ເຊິ່ງບາງຄົນ ທີ່ຕິດເຊື້ອອາດຈະບໍ່ສະແດງອາການ ບາງຄັ້ງຖືເຊື້ອໄດ້ຫຼາຍປີໂດຍບໍ່ໄດ້ມີອາການເຈັບປ່ວຍ ຫຼື ອາການສະແດງອອກ ແຕ່ຢ່າງໃດກໍຕາມ ເຊື້ອໄວຣັດຈະທຳລາຍຕັບຂອງຜູ້ທີ່ຕິດເຊື້ອຢ່າງຊ້າໆ ສ່ວນໃຫຍ່ຈະພາໃຫ້ເກີດເປັນພະຍາດມະເຮັງຕັບ ແລະ ສ່ວນໃຫຍ່ໃນຜູ້ທີ່ເປັນມະເຮັງຕັບ ແມ່ນຍ້ອນຄວາມຫຼ້າຊ້າໃນການເຂົ້າເຖິງການກວດຫາເຊື້ອ ແລະ ການປິ່ນປົວ ເຊື້ອໄວຣັດຕັບອັກເສບ ມີ 5 ຊະນິດຕົ້ນຕໍ ປະກອບມີ ຊະນິດ A, B, C, D ແລະ E ໂດຍສະເພາະ.
ເຊື້ອໄວຣັດຕັບອັກເສບຊະນິດ B ແລະ C ແມ່ນສາເຫດຕົ້ນຕໍທີ່ພາໃຫ້ເປັນພະຍາດ ແລະ ເຮັດໃຫ້ເສຍຊີວິດ ເພາະພະຍາດອັກເສບຕັບ ແມ່ນພະຍາດທີ່ບໍ່ສະແດງອາການທີ່ຊັດເຈນ ເສັ້ນທາງການຕິດຕໍ່ຂອງເຊື້ອໄວຣັດຕັບອັກເສບ ຊະນິດ A ແລະ E ແມ່ນສາມາດຕິດຕໍ່ໄດ້ທາງນ້ຳລາຍ ຫຼື ສາມາດຕິດຕໍ່ຍ້ອນຂາດການສຸຂະອະນາໄມທີ່ດີ ນ້ຳທີ່ບໍ່ສະອາດ ການໃຊ້ອຸປະກອນຮ່ວມກັນກັບຄົນທີ່ມີເຊື້ອ ແລະ ການມີເພດສຳພັນທາງປາກ ແລະ ຮູທະວານ ສ່ວນເສັ້ນທາງການຕິດຕໍ່ຂອງເຊື້ອໄວຣັດຕັບອັກເສບ B, C ແລະ D ແມ່ນຫຼັກ ຫຼັກເລີຍ ແມ່ນຕິດຕໍ່ຜ່ານເລືອດ ເຊັ່ນວ່າ ການຮັບສົ່ງເລືອດທີ່ມີເຊື້ອທາງເພດສຳພັນທີ່ບໍ່ປ້ອງກັນ ແມ່ສູ່ລູກ ແລະ ການໃຫ້ນົມເດັກ ອຸປະກອນທາງການແພດບໍ່ອະເຊື້ອ ຫຼື ໃຊ້ເຂັ້ມສັກຢາຮ່ວມກັນ ໂດຍສະເພາະ ກຸ່ມທີ່ໃຊ້ສານເສບຕິດດ້ວຍການສັກຢາທີ່ໃຊ້ເຂັມຮ່ວມກັນ.
ແຫຼ່ງຂໍ້ມູນ: ໜັງສືພິມວຽງຈັນໃໝ່