ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ (ນວ) ໄດ້ລົງເຄື່ອນໄຫວເຮັດວຽກກັບຄະນະພະແນກກະສິກຳ ແລະ ປ່າໄມ້ ນວ ຖືກຕ້ອນຮັບໂດຍທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະ ປ່າໄມ້ ນວ ພ້ອມດ້ວຍຄະນະພະແນກ ຫົວໜ້າຂະແໜງ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ແລະ ພະນັກງານທີ່ກ່ຽວຂ້ອງ.
ການລົງເຄື່ອນໄຫວເຮັດວຽກຄັ້ງນີ້ ທ່ານຮອງເຈົ້າຄອງ ນວ ໄດ້ຮັບຟັງລາຍງານການຈັດຕັ້ງປະຕິບັດແຜນພັດທະ ນາກະສິກຳ-ປ່າໄມ້ ແລະ ພັດທະນາຊົນນະບົດ ແລະ ແຜນງົບປະມານ 6 ເດືອນຕົ້ນປີ ແລະ 6 ເດືອນທ້າຍປີ 2019 ຂໍ້ສະດວກ ຂໍ້ຫຍຸ້ງຍາກ ແລະ ການສະເໜີໃຫ້ການນຳ ນວ ແກ້ໄຂໃນຕໍ່ໜ້າ ຈາກທ່ານຫົວໜ້າພະແນກກະສິກຳ ແລະ ປ່າໄມ້ ນວ ເຫັນວ່າ:
ໃນ 6 ເດືອນຕົ້ນປີ 2019 ການປັກດຳເຂົ້ານາແຊງປີ 2019 ປະຕິບັດໄດ້ 14.231 ເຮັກຕາ ເນື້ອທີ່ເກັບກ່ຽວ 14.221 ເຮັກຕາ ໄດ້ເຂົ້າ 66.705 ໂຕນ ເທົ່າກັບ 20,8% ຂອງແຜນການປີ ປັກດຳເຂົ້ານາປີ 2019 ມາຮອດປັດຈຸບັນສຳເລັດ 45.800 ເຮັກຕາ ເທົ່າກັບ 86% ຂອງແຜນການປີ 52.373 ເຮັກຕາ ແລະ ຄາດວ່າຈະສຳເລັດທ້າຍເດືອນສິງຫານີ້ ການຜະລິດພືດຜັກປະຕິບັດໄດ້ 77.654 ໂຕນ ເທົ່າກັບ 68,29 ເຮັກຕາ ຂອງແຜນການໝົດປີ 113.699 ໂຕນ ຜະລິດໝາກໄມ້ສົດໄດ້ 11.048 ໂຕນ ເທົ່າກັບ 88,7% ຂອງແຜນການໝົດປີ 12.455 ໂຕນ ປູກພືດອຸດສາຫະກຳໄດ້ 1.717 ເຮັກຕາ ລື່ນແຜນການ 5,02% ຜົນຜະລິດລວມ 22.166 ໂຕນ ການຜະລິດທາດຊີ້ນ ໄຂ່ ແລະ ປາ ປະຕິບັດໄດ້ 30.394 ໂຕນ ເທົ່າກັບ 46,7% ຂອງແຜນການປີ ສ່ວນການຜະລິດເປັນສິນຄ້າປະຕິບັດໄດ້ 8 ໂຄງການ.
ເດັ່ນກວ່າໝູ່ແມ່ນໂຄງການປູກພືດຜັກອິນຊີສາມາດຜະລິດໄດ້ 3.000 ໂຕນ ແລະ ໂຄງການລ້ຽງໝູເປັນສິນຄ້າໄດ້ສົ່ງໝູໄປຕ່າງແຂວງ 7.801 ໂຕ ມູນຄ່າ 14 ຕື້ກີບ ໂຄງການລ້ຽງໄກ່ພັນໄຂ່ສາມາດຕອບສະໜອງພາຍໃນ ນວ ໄດ້ຢ່າງພຽງພໍ ແລະ ສົ່ງອອກໄປຕ່າງແຂວງໄດ້ 689 ໂຕນ ມູນຄ່າ 8,2 ຕື້ກີບ ໂຄງການລ້ຽງປາ ແລະ ສັດນ້ຳເປັນສິນຄ້າສາມາດຕອບສະໜອງຄວາມຕ້ອງການປານິນໃຫ້ ນວ ໄດ້ໂດຍພື້ນຖານ ແລະ ສົ່ງອອກໄປຕ່າງແຂວງໄດ້ 10 ໂຕນຕໍ່ວັນ ເທົ່າກັບ 1.820 ໂຕນຕໍ່ປີ ລວມມູນຄ່າ 32,7 ຕື້ກີບ ໂຄງການປູກສາລີໄດ້ 40,83% ຂອງແຜນການ. ນອກນີ້ ກໍຍັງມີວຽກງານອື່ນໆທີ່ພົ້ນເດັ່ນ ເປັນຕົ້ນ ການຈັດຕັ້ງປະຕິບັດຄຳສັ່ງເລກທີ 15/ນຍ ການປູກໄມ້ປົກຫຸ້ມສີຂຽວໃຫ້ໄດ້ 70% ຮອດປີ 2020 ການຫຼຸດຜ່ອນແຮງງານຊາວນາລົງ 10% ຕໍ່ປີ ການຄຸ້ມຄອງທີ່ດິນກະສິກຳ ການປັບປຸງສູນສະຖານີ ການສົ່ງເສີມບໍລິການວິຊາການ ການພັດທະນາຊົນນະບົດຈັດສັນພູມລຳເນົາ ສ່ວນບັນຫາຂໍ້ຫຍຸ້ງຍາກແມ່ນບັນຫາການຄຸ້ມຄອງການນຳເຂົ້າຜະລິດຕະພັນພືດ ແລະ ສັດ. ຕອນທ້າຍ ທ່ານຮອງເຈົ້າຄອງ ນວ ໄດ້ມີຄຳເຫັນຊີ້ນຳໃຫ້ຄະນະພະແນກ ຫົວໜ້າຂະແໜງ ແລະ ຫົວໜ້າຫ້ອງການ ພ້ອມກັນສືບຕໍ່ເສີມຂະຫຍາຍດ້ານດີ ແລະ ແກ້ໄຂຈຸດຄົງຄ້າງໃນໄລຍະຜ່ານມາ ເປັນຕົ້ນ ວຽກປັບປຸງສະຖານີ ແລະ ສູນກະສິກຳທີ່ເປັນວຽກຈຳເປັນ ຍ້ອນປັດຈຸບັນຊາວກະສິກອນຍັງບໍ່ທັນມີຜູ້ນຳພາເຮັດວຽກນີ້. ຜ່ານມາອາໃສພະນັກງານຂະແໜງກະສິກຳ ແລະ ປ່າໄມ້ຍັງບໍ່ພຽງພໍ ຕ້ອງຈັດເຝິກອົບຮົມໃຫ້ເຂົາເຈົ້າສ້າງຄວາມເຂັ້ມແຂງໃຫ້ພວກເຮົາ ການແກ້ໄຂຄວາມທຸກຍາກຂອງປະຊາຊົນຕ້ອງກຳນົດເງື່ອນໄຂ ແລະ ຈັດເປັນແຜນການແຜນງານໂຄງການອັນລະອຽດ ການປັບປຸງໂຄງການຊົນລະປະທານຕ້ອງສຶກສາລະອຽດ ລົງກວດກາເກັບກຳເນື້ອທີ່ການຜະລິດຊົນລະປະທານຄືນ ຖ້າຈຳນວນເນື້ອທີ່ມີໜ້ອຍ ກໍບໍ່ຈຳເປັນຕ້ອງລົງທຶນໃສ່ມັນຈະເສຍງົບປະມານ ສ່ວນໂຄງການຮ່ວມມືກັບຕ່າງປະເທດຕ້ອງປະຕິບັດໃຫ້ມັນມີປະສິດທິຜົນ. ເປັນຕົ້ນ ໂຄງການລ້ຽງງົວພໍ່ແມ່ພັນສະໜອງໃຫ້ປະຊາຊົນ ທຸກໂຄງການທຸກໜ້າວຽກຕ້ອງມອບຄວາມຮັບຜິດຊອບອັນລະອຽດ ໃຫ້ແຕ່ລະພາກສ່ວນ ແລະ ບຸກຄົນຈັດຕັ້ງປະຕິບັດໄປຕາມແຜນການ ຈຶ່ງຈະເຮັດໃຫ້ວຽກງານມີຜົນສຳເລັດ.
ແຫຼ່ງຂໍ້ມູນ: ໜັງສືພິມວຽງຈັນ