ພິທີມອບປື້ມປະມວນກົດໝາຍອາຍາຂອງ ສປປ ລາວ ຈັດຂຶ້ນທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ກ່າວມອບໂດຍທ່ານ ເນເວັນ ມິມິຊາ ກຳມາທິການສະຫະພາບເອີຣົບການຮ່ວມມືສາກົນ ແລະ ການພັດທະນາ ທ່ານນາງ ພໍເລັດຕ໌ ເລເນິດ ລັດຖະມົນຕີກະຊວງຮ່ວມມືເພື່ອການພັດທະນາ ແລະ ວຽກງານມະນຸດສະທຳ ແຫ່ງຣາຊະອານາຈັກລຸກຊຳບວກ ແລະ ກ່າວຮັບໂດຍທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ ມີຜູ້ຕາງໜ້າສະຖານທູດ ອົງການຈັດຕັ້ງສາກົນ ອົງການຈັດຕັ້ງສັງຄົມປະຈຳລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ໄຊສີ ສັນຕິວົງ ກ່າວວ່າ:
ໄລຍະຜ່ານມາສ້າງກົດໝາຍ ແລະ ປະມວນກົດໝາຍ ໂດຍສະເພາະການສ້າງປະມວນກົດໝາຍອາຍາ ໄດ້ກາຍເປັນເຄື່ອງມືໃນການຄຸ້ມຄອງລັດ ແລະ ຄຸ້ມຄອງເສດຖະກິດ-ສັງຄົມຢ່າງມີຜົນສັກສິດ ກົດໝາຍອາຍາແຫ່ງ ສປປ ລາວ ໄດ້ຖືກຮັບຮອງເອົາໂດຍສະພາແຫ່ງຊາດໃນເດືອນພຶດສະພາ 2017 ແລະ ມີຜົນບັງຄັບໃຊ້ວັນທີ 1 ພະຈິກ 2018 ກົດໝາຍດັ່ງກ່າວມີຈຸດປະສົງເພື່ອຮັບປະກັນການລົງໂທດຕໍ່ການກະທຳຜິດແມ່ນມີຄວາມກົມກຽວ ແລະ ມີຈຸດປະສົງ ເພື່ອອຳນວຍຄວາມສະດວກໃຫ້ເຈົ້າໜ້າທີ່ກ່ຽວຂ້ອງຂອງລັດເຊັ່ນ:
ເຈົ້າໜ້າທີ່ສືບສວນ-ສອບສວນ ໄອຍະການ ແລະ ຜູ້ພິພາກສາເພື່ອອ້າງອີງ ແລະ ປະຕິບັດກົດໝາຍທີ່ກ່ຽວຂ້ອງ ເປັນກົດໝາຍອາຍາສະບັບທຳອິດທີ່ນຳໃຊ້ໃນປະເທດລາວ ເພາະບໍ່ພຽງໄດ້ປັບປຸງກົດໝາຍອາຍາປີ 2005 ເທົ່ານັ້ນ ແຕ່ຍັງລວມເອົາຂໍ້ກຳນົດກ່ຽວກັບການລົງໂທດຂອງກົດໝາຍອີກ 20 ສະບັບ ເຊິ່ງລວມເອົາຫຼາຍຫົວຂໍ້ຈາກກົດໝາຍການຄ້າ ກົດໝາຍແມ່ຍິງ ແລະ ເດັກນ້ອຍ ກົດໝາຍສຸຂະພາບ ແລະ ກົດໝາຍສິ່ງແວດລ້ອມມາເປັນກົດໝາຍດຽວ ກົດໝາຍສະບັບນີ້ໄດ້ປັບປຸງໂດຍສະເພາະການປັບໃໝເພີ່ມເຕີມ ຫຼື ກຳນົດການກະທຳເພີ່ມເຕີມທີ່ປະກອບເປັນການກະທຳຜິດ ປະມວນກົດໝາຍອາຍານີ້ ປະກອບມີ 3 ພາກ ຄື:
ພາກທີ 1 ພາກທົ່ວໄປ ພາກທີ 2 ພາກສະເພາະ ແລະ ພາກທີ 3 ບົດບັນຍັດສຸດທ້າຍ ລວມມີ 425 ມາດຕາ ໂດຍອີງຕາມມາດຕາ 80 ຂອງກົດໝາຍວ່າດ້ວຍການສ້າງນິຕິກຳ ປະມວນກົດໝາຍອາຍາໄດ້ຖືກຈັດພິມລົງໃນຈົດໝາຍເຫດທາງລັດຖະການລະບົບເອເລັກໂຕຣນິກ ໃນວັນທີ 17 ຕຸລາ 2018.
ການສະໜັບສະໜູນຂອງສະຫະພາບເອີຣົບຕໍ່ກະຊວງຍຸຕິທຳ ສຳລັບການປະຕິບັດກົດໝາຍວ່າດ້ວຍການລົງໂທດສ່ວນໃຫຍ່ແມ່ນຜ່ານໂຄງການ “GPAR” ເຊິ່ງຈັດຕັ້ງປະຕິບັດໂດຍອົງການ UNDP ໃນປີ 2014-2017 ໂດຍຜ່ານໂຄງການ “ການມີສ່ວນຮ່ວມຂອງພົນລະເມືອງເພື່ອການປົກຄອງທີ່ດີ ຄວາມຮັບຜິດຊອບ ແລະ ກົດໝາຍ” (CEGGA) ແລະ ໂຄງການ LAO/031 ເຊິ່ງສະຫະພາບເອີຣົບ ແລະ ລຸກຊຳບວກສືບຕໍ່ສະໜັບສະໜູນຢ່າງຫ້າວຫັນ ລວມທັງຜ່ານການເຜີຍແຜ່ກົດໝາຍໂດຍການພິມປື້ມກົດໝາຍດັ່ງກ່າວອອກຄັ້ງນີ້ຫຼາຍກວ່າ 16.000 ສະບັບ ແລະ ຈະຖືກຈັດຕັ້ງເຜີຍແຜ່ໃນທົ່ວປະເທດ.
ແຫຼ່ງຂໍ້ມູນ: ໜັງສືພິມວຽງຈັນໃໝ່