ສຳນັກງານນະວັດຕະກໍາແຫ່ງຊາດໄທ (NIA) ເຊີນຊວນຄົນລາວທ່ຽວຊົມນະວັດຕະກຳດ້ານສິນຄ້າອຸປະໂພກ,ບໍລິໂພກຂອງໄທ ທີ່ບູດ NIA ໃນງານ LAO TECHMART 2018 ທີ່ສູນການຄ້າລາວ-ໄອເຕັກ ພ້ອມສະແດງຜົນງານທີ່ປະສົບຄວາມສຳເລັດ ໃນປະເທດໄທມາແລ້ວ ເຊັ່ນ ຕຳຫມາກຫຸ່ງທີ່ປະສົມກັບນ້ຳສະອາດແລ້ວຮັບປະທານໄດ້ທັນທີ, ຄຽບຫມູເບັງດ້ວຍໄມໂຄເວບ ແລະກະແລ່ມຖົ່ວລຽນ ທີ່ເຮັດງ່າຍພຽງແຕ່ແຊ່ນົມ ແລ້ວນຳໄປແຊ່ໃນຊ່ອງແຂງ.
ນອກຈາກນີ້, ຍັງມີຜົງປຸງລົດຈາກຫົວຫອມ ແລະນ້ຳເຕົ້າຮູ້ໂທຟຸຊັງ ເຊິ່ງໃຊ້ນະວັດຕະກຳຮັກສາຄວາມສົດໃຫມ່ ແບບນ້ຳເຕົ້າຮູ້ຍີ່ປຸ່ນບູຮານ ແລະແນວຄິດການແປຮູບອາຫານໃນຮູບແບບໃຫມ່ໆອີກຫລາຍຢ່າງ.
ທ່ານນາງ ວະໄລລັດຊະຕະ ໂມກຂະເວດ ທີ່ປຶກສາດ້ານນະວັດຕະກຳ ຝ້າຍໂຄງສ້າງພື້ນຖານນະວັດຕະກໍາ ສຳນັກງານນະວັດຕະກໍາແຫ່ງຊາດ ແຫ່ງປະເທດໄທກ່າວວ່າ: ວັດຖຸປະສົງໃນການອອກງານໃນຄັ້ງນີ້ ກໍເພື່ອຂະຫຍາຍເຄືອຂ່າຍຄວາມຮ່ວມມືດ້ານນະວັດຕະກຳ ລະຫວ່າງຄົນລາວກັບຄົນໄທ ແລະຂະຫຍາຍຕະຫລາດສິນຄ້າທີ່ມີນະວັດຕະກຳຂອງໄທ ມາສູ່ ສປປ.ລາວ
ນອກຈາກນີ້, NIA ຍັງພ້ອມທີ່ຈະໂອ້ລົມແລກປ່ຽນປະສົບການກັບຜູ້ທີ່ັສົນໃຈ ນຳເທັກໂນໂລຊີມາໃຊ້ ທາງດ້ານອາຫານແລະເຄື່ອງສຳອາງຕ່າງໆ ລວມເຖິງການສ້າງນະວັດຕະກຳໃຫ້ຫນ້າສົນໃຈອີກດ້ວຍ.