ພິທີຖະແຫລງຂ່າວກ່ຽວກັບການກະກຽມສະເຫຼີມສະຫຼອງວັນສ້າງຕັ້ງ ເມືອງວຽງໄຊ-ຖານທີ່ໝັ້ນຂອງການປະຕິວັດລາວ ຄົບຮອບ 50 ປີ (30/ 11/1968-30/11/2018) ໄດ້ຈັດຂຶ້ນໃນຕອນເຊົ້າຂອງວັນທີ 16 ຕຸລາ 2018 ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານຂອງທ່ານ ພັນຄຳ ວິພາວັນ ຮອງປະທານປະເທດ ແຫ່ງ ສປປ ລາວ.
ງານດັ່ງກ່າວນີ້ ຈະຈັດຂຶ້ນໃນທ້າຍເດືອນພະຈິກນີ້ ທີ່ເມືອງວຽງໄຊ, ແຂວງຫົວພັນ ເພື່ອເປັນການຫວນຄືນເຖິງມູນເຊື້ອຄວາມປີຊາສາມາດ, ຄວາມສະຫລາດສ່ອງໃສ ຂອງພັກປະຊາຊົນປະຕິວັດລາວໃນການນຳພາການປະຕິວັດ, ທັງເປັນການສຶກສາອົບຮົມພະນັກງານສະມາຊິກພັກ, ນັກຮົບ, ປະຊາຊົນບັນດາເຜົ່າ ໂດຍສະເພາະແມ່ນຄົນຮຸ້ນໜຸ່ມໃຫ້ເຂົ້າໃຈຢ່າງຈະແຈ້ງ ແລະເລິກເຊິ່ງ, ພ້ອມນັ້ນ ກໍເພື່ອເປັນການຊຸກຍູ້ແນວທາງນະໂຍບາຍຂອງພັກ.