ນັບແຕ່ເຊື້ອພະຍາດອະຫິວາໝູອາຟຣິກກາເລີ່ມເຂົ້າມາລະບາດໃນ ສປປ ລາວ ບາງເຂດ ແຕ່ໃຊ້ເວລາບໍ່ເທົ່າໃດເດືອນ ພື້ນທີ່ທີ່ຕິດເຊື້ອພະຍາດດັ່ງກ່າວ ແຜ່ຂະຫຍາຍຢ່າງໄວວາ ແລະ ເປັນວົງກວ້າງ ໃນຂອບເຂດທົ່ວປະເທດ.
ເຮັດໃຫ້ໝູປະເພດຕ່າງໆ ແຕ່ນ້ອຍຫາໃຫຍ່ ລົ້ມຕາຍເປັນຈໍານວນຫຼວງຫຼາຍ ໃນຈໍານວນໝູທີ່ຕິດເຊື້ອແລ້ວຕາຍນັ້ນກວມເອົາ 55% ແມ່ນໝູນ້ອຍ ເຊິ່ງສົ່ງຜົນກະທົບຕໍ່ຜູ້ລ້ຽງໝູແບບຄອບຄົວ, ຝາມຂະໜາດນ້ອຍ ແລະ ຝາມຂະໜາດປານກາງ.
ເຊື້ອພະຍາດອະຫິວາໝູອາຝຣິກກາ ເປັນເຊື້ອພະຍາດຊະນິດໝຶ່ງ ທີ່ມີຄວາມທົນທານຕໍ່ສິ່ງແວດລ້ອມສູງ ມີຄວາມສາມາດແຜ່ລະບາດດ້ວຍຫຼາຍຮູບການ ແລະ ຫຼາຍຫົນທາງ ເຊິ່ງມີຄວາມຫຍຸ້ງຍາກໃນການຄວບຄຸມ ແລະ ສະກັດກັ້ນ ໂດຍສະເພາະແມ່ນ ບັນດາປະເທດດ້ອຍພັດທະນາ ທີ່ບໍ່ມີງົບປະມານພຽງພໍ ສໍາລັບນໍາໃຊ້ເຂົ້າໃນການຈັດຕັ້ງປະຕິບັດມາດຕະການສະກັດກັ້ນຕ່າງໆ.
ສປປ ລາວ ເປັນໜຶ່ງໃນບັນດາປະເທດ ທີ່ບໍ່ມີຄວາມສາມາດຄວບຄຸມການແຜ່ລະບາດຂອງເຊື້ອພະຍາດດັ່ງກ່າວໄດ້ ພຽງໄລຍະເວລາສັ້ນໆ ແຕ່ການລະບາດຂອງເຊື້ອພະຍາດດັ່ງກ່າວໄດ້ແຜ່ລາມໄປເຖິງ 15 ແຂວງ, 42 ເມືອງ ແລະ 103 ບ້ານ ເຮັດໃຫ້ໝູ່ຕາຍລວມທັງໝົດ 14,209 ໂຕ.
ແຫຼ່ງຂໍ້ມູນ: ສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ / Lao PDR Trade Portal