9 ເດືອນຜ່ານມາກອງຄຸ້ມຄອງພາສີ III ສາມາດຈັດເກັບລາຍຮັບໄດ້ທັງໝົດ 469,87 ຕື້ກີບ ເທົ່າກັບ 78,35%ຂອງແຜນປີ, ທຽບໃສ່ໄລຍະດຽວກັນຂອງປີກ່ອນເທົ່າກັບ 104,47%, ໃນນັ້ນ ບັນດາດ່ານ ຢູ່ແຂວງໄຊຍະລີ ປະຕິບັດໄດ້ 461,83 ຕື້ກີບ ແລະແຂວງຫຼວງພະບາງປະຕິບັດໄດ້ 8,04 ຕື້ກີບ.
ທ່ານ ບຸນເລີດ ສີສຸວັນ ຫົວໜ້າກອງຄຸ້ມຄອງພາສີ III ໄດ້ໃຫ້ຮູ້ວ່າ: ກອງຄຸ້ມຄອງພາສີ III ປະກອບມີ 2 ແຂວງຄື: ແຂວງ ໄຊຍະບູລີ ແລະແຂວງ ຫຼວງພະບາງ, ມີຫ້ອງການປະຈໍາການຢູ່ແຂວງ ໄຊຍະບູລີ, ມີພະນັກງານທັງໝົດ 96 ຄົນ, ຍິງ 10 ຄົນ, ອົງປະກອບການຈັດຕັ້ງມີຄື: ກອງຄຸ້ມຄອງພາສີ III, ກອງກວດກາພາສີປະຈໍາແຂວງ ຫຼວງພະບາງ, ຂະແໜງບໍລິຫານ ແລະ ກວດກາພາຍໃນ, ຂະແໜງຕ້ານ ແລະ ກວດກາຄືນການແຈ້ງ, ໜ່ວຍງານສັງລວມ, ດ່ານພາສີສາກົນ 4 ດ່ານ, ດ່ານພາສີທ້ອງຖິ່ນ 2 ດ່ານ ແລະ ດ່ານປະເພນີ 3 ດ່ານ.
ທ່ານ ບຸນເລີດ ສີສຸວັນ ຍັງໃຫ້ຮູ້ຕື່ມອີກວ່າ: 3 ເດືອນທ້າຍປີ 2018 ຈະສູ້ຊົນເກັບລາຍຮັບໃຫ້ໄດ້ 149,928 ຕື້ກວ່າກີບ ແລະຄາດໝົດປີຈະໃຫ້ໄດ້ 599,714 ຕື້ກວ່າກີບ, ເພື່ອບັນລຸເປົ້່າໝາຍດັ່ງກ່າວ ກອງຄຸ້ມຄອງພາສີ III ຈະຕ້ອງໄດ້ເລັ່ງສະສາງຄະດີໃນໄລຍະຜ່ານມາຂອງ 2 ແຂວງ ແລະ ສົມທົບກັບຂະແໜງທີ່ກ່ຽວຂ້ອງ ສືບສວນ, ສອບສວນ ລົດປອມແປງເອກະສານແຈ້ງເສຍພາສີ ຈໍານວນ 38 ຄັນ, ກວດກາ ແລະ ຢັ້ງຢືນຂໍ້ມູນພາຫະນະ, ກວດກາສິນຄ້າເຄື່ອນຍ້າຍໃຫ້ເຂັ້ມງວດ, ປັບປຸງການຄຸ້ມຄອງພາຍໃນດ່ານໃຫ້ມີຄວາມຮັດກຸມ, ໃນນັ້ນລົງເລິກ ກວດກາ, ຕິດຕາມ, ຄຸ້ມຄອງສິນຄ້າເຄື່ອງຂອງ, ພາຫະນະ ແລະ ນໍ້າມັນເຊື້ອໄຟທີ່ເປັນສິນຄ້າຍຸດທະສາດໃນການຈັດເກັບລາຍຮັບ.