ອີງຕາມຂໍ້ມູນຂອງເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ (ນວ) ໃຫ້ຮູ້ວ່າ: ໃນ 8 ປີຜ່ານມາ (2010-2018) ທົ່ວ ນວ ມີອັກຄີໄພເກີດຂຶ້ນທັງໝົດ 545 ຄັ້ງ ໃນນີ້ ເກີດໄຟໄໝ້ໃຫຍ່ 8 ຄັ້ງ ກາງ 17 ຄັ້ງ ແລະ ໄຟໄໝ້ນ້ອຍ 520 ຄັ້ງ ມູນຄ່າຄວາມເສຍຫາຍປະມານ 1.000 ຕື້ກີບ (ຄິດໄລ່ຄ່າເສຍຫາຍຮອດເດືອນສິງຫາ 2018).
ນັບແຕ່ເດືອນມັງກອນ ຫາເດືອນສິງຫາ 2018 ທົ່ວ ນວ ມີອັກຄີໄພເກີດຂຶ້ນທັງໝົດ 37 ຄັ້ງ ເສຍຫາຍມູນຄ່າ 3,2 ຕື້ກີບ ໃນນີ້ ເມືອງໄຊເຊດຖາ ເກີດອັກຄີໄພຫຼາຍກວ່າໝູ່ 12 ຄັ້ງ ຈັນທະບູລີ 7 ຄັ້ງ ໄຊທານີ ສີສັດຕະນາກ ແລະ ເມືອງສີໂຄດຕະບອງ ເກີດຂຶ້ນເມືອງລະ 6 ຄັ້ງ.
ສາເຫດຫຼັກຂອງການເກີດອັກຄີໄພມາຈາກໄຟຟ້າລັດວົງຈອນ ເນື່ອງຈາກວ່າການຊົມໃຊ້ໄຟຟ້າບໍ່ຖືກວິທີ ຂາດການບຳລຸງຮັກສາສ້ອມແປງ ບໍ່ໄດ້ປ່ຽນອຸປະກອນໄຟຟ້າທີ່ເກົ່າ ໝົດອາຍຸການໃຊ້ງານ ແລະ ນຳໃຊ້ອຸປະກອນໄຟຟ້າບໍ່ໄດ້ມາດຕະຖານໃນການກໍ່ສ້າງ ແລະ ຕິດຕັ້ງລະບົບໄຟຟ້າບໍ່ໄປຕາມມາດຕະຖານເຕັກນິກໄຟຟ້າຂອງລາວກຳນົດໄວ້ ແລະ ອື່ນໆ.
Cr.VientianeMai
ພາບປະກອບ: https://encrypted-tbn0.gstatic.com