ໃນຜ່ານມາກຳລັງ ຕມ ໄດ້ເອົາໃຈໃສ່ເຮັດໜ້າທີ່ໃນການອຳນວຍຄວາມສະດວກໃຫ້ແກ່ການເຂົ້າ-ອອກຂອງຊາວຕ່າງປະເທດກໍຄືນັກທ່ອງທ່ຽວ, ຜູ້ໂດຍສານຜ່ານປະຕູດ່ານສາກົນພູເກືອຊຶ່ງໄດ້ມີການຈັດຕັ້ງປະຕິບັດຕາມກົດໝາຍຄຸ້ມຄອງຂອງຄົນເຂົ້າ-ອອກເມືອງສາມາດຮັກສາໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ ແລະມີຄວາມປອດໄພໃນການເຂົ້າ-ອອກເປັນປົກກະຕິ ແລະຕໍ່ເນື່ອງໃນລະດັບທີ່ແນ່ນອນ.
ທ່ານ ພັຕ ຕຸນຄຳ ສຸດທະວົງ ຫົວໜ້າກຳລັງ ຕມ ດ່ານສາກົນພູເກືອ ແຂວງອັດຕະປືຊີ້ແຈ້ງໃຫ້ຮູ້ວ່າ:
ໃນ 9 ເດືອນ ປີ 2019 ຕົວເລກຄົນແຈ້ງເຂົ້າເມືອງມີ 66 ສັນ ຊາດ, ເທົ່າກັບ 55 ພັນກວ່າຄົນ, ຍິງ 12,8 ພັນຄົນ, ມີເດັກ 1.177 ຄົນ, ມີຄົນແຈ້ງ ອອກເມືອງມີ 72 ສັນຊາດ ເທົ່າກັບ 58 ພັນກວ່າຄົນ, ຍິງ 12,1 ພັນຄົນ, ມີເດັກ 811 ຄົນ; ມີພາຫະນະເຂົ້າເມືອງ 14.09 ພັນຖ້ຽວລວມມີ 2 ສັນຊາດ, ພາຫະນະອອກເມືອງ ມີ 12,09 ພັນຖ້ຽວ ມີ 2 ສັນຊາດ.
ທ່ານໃຫ້ຮູ້ຕື່ມອີກວ່າ:
ຂໍ້ສະດວກທາງດ້ານການຈັດຕັ້ງປະຕິບັດດ້ານວິຊາສະເພາະໄດ້ຮັບປະສິດທິຜົນຍ້ອນທາງຄະນະພັກຄະນະກອງບັນຊາການກໍຄືຫ້ອງສັນຕິບານໄດ້ເອົາໃຈໃສ່ຊີ້ນຳຢ່າງໃກ້ຊິດ ແລະ ກົມວິຊາສະເພາະໄດ້ມີການຊຸກຍູ້ຊ່ວຍເຫຼືອດ້ານເຄື່ອງອຸປະກອນທີ່ທັນສະໄໝເຂົ້າໃນການກວດການເອກະສານ, ມີການປະສານສົມທົບແລກປ່ຽນຂໍ້ມູນຂ່າວສານຮ່ວມກັນເປັນປະຈຳກັບດ່ານສາກົນ ເບີອີ ສສ ຫວຽດນາມ ເພື່ອແກ້ໄຂ ບັນຫາທີ່ເກີດຂຶ້ນທັງສອງປະຕູດ່ານໃຫ້ທັນກັບສະພາບການ.
ແຕ່ແນວໃດກໍຕາມດ້ານວິຊາສະເພາະຂອງເຈົ້າໜ້າທີ່ປະຈຳຢູ່ໃນດ່ານສາກົນພູເກືອຍັງຂາດອຸປະກອນກວດກາພາຫະນະ, ວັດຖຸເຄື່ອງຂອງຜູ້ໂດຍສານເຂົ້າອອກທີ່ທັນ ສະໄໝຊຶ່ງບໍ່ສາມາດກວດດ້ວຍຕາເປົ່າໄດ້ອີກປະເດັນອັນສຳຄັນດ່ານຍັງຕັ້ງຢູ່ຫ່າງໄກຈາກຕົວເມືອງເຂດບໍລິເວນດ່ານຍັງມີປ່າດົງຕືບໜາບາງຄັ້ງຄາວເຮັດໃຫ້ມີຊ່ອງວ່າງຂອງກຸ່ມຄົນບໍ່ດີຍັງມີປາກົດການເຂົ້າ-ອອກ ໂດຍບໍ່ຜ່ານປະຕູດ່ານຢູ່.
ສຳລັບແຜນການສືບຕໍ່ໃນຕໍ່ໜ້າທາງເຈົ້າໜ້າ ຕມ ດ່ານສາກົນພູເກືອຈະໄດ້ເອົາໃຈໃສ່ເຮັດໜ້າທີ່ວຽກງານການເມືອງແນວຄິດພາຍໃນກຳລັງທີ່ປະຈຳໃນດ່ານໃຫ້ສູງຂຶ້ນ, ເພີ່ມທະວີຄວາມເອົາໃຈໃສ່ໃນການເຮັດໜ້າທີ່ວິຊາສະເພາະດ້ານການບໍລິການ, ດ້ານການຮັບໃຊ້ໃຫ້ແກ່ບັນດານັກທ່ອງທ່ຽວຜູ້ໂດຍສານໃຫ້ມີຄວາມວ່ອງໄວທັນກັບສະພາບ ການຕາມລະບຽບກົດໝາຍໃນການຄຸ້ມຄອງຄົນເຂົ້າ-ອອກເມືອງໃຫ້ຮັບປະກັນໃນລະດັບທີ່ດີຂຶ້ນ.
ແຫຼ່ງຂໍ້ມູນ: ໜັງສືພິມເສດຖະກິດ-ສັງຄົມ