ຫຼັງຈາກຍຸຕິການຈັດກິດຈະກຳດ້ານວັດທະນະທຳຊົ່ວຄາວ ໃນຊ່ວງລະດູຝົນທີ່ຜ່ານມາ ພະແນກຖະແຫຼງຂ່າວ ວັດທະນະທຳແລະທ່ອງທ່ຽວ ນະຄອນຫຼວງວຽງຈັນ, ຂະແໜງວັດທະນະທຳ ໄດ້ເລັ່ງປັບປຸງພື້ນທີ່ອ້ອມກຳແພງເມືອງວຽງຈັນບູຮານອີກເທື່ອ ເພື່ອກຽມຕ້ອນຮັບລະດູການທ່ອງທ່ຽວໃນລະດູໜາວ ໂດຍປ່ຽນເວທີໃໝ່ນຳດ້ວຍ ການກໍ່ອິດແທນໂຄງສ້າງເກົ່າ ທີ່ເຮັດດ້ວຍໄມ້ ແລະກໍ່ສ້າງສະຖານທີ່ພັກຜ່ອນເພີ່ມຕື່ມ ລວມເຖິງສ້ອມແຊມບໍລິເວນຂົວ ເຊິ່ງເກົ່າແກ່ຊຸດໂຊມ.
ພ້ອມນີ້, ກຳນົດເປີດໃຫ້ບໍລິການເທື່ອໃໝ່ ຢູ່ລະຫວ່າງການປະເມີນຄວາມພ້ອມ ແຕ່ຄາດວ່າຈະຢູ່ໃນຊ່ວງກາງເດືອນນີ້ ໂດຍຈະເປີດໃຫ້ບໍລະການຕາມເວລາເກົ່າຄື 10 ໂມງເຊົ້າເປັນຕົ້ນໄປຈົນເຖິງເວລາຄ່ຳ ສ່ວນກິດຈະກຳພາຍໃນບໍລິເວນກຳແພງເມືອງວຽງຈັນບູຮານ ຍັງຄົງໄວ້ຮູບແບບເກົ່າ ຄືຕະຫຼາດນ້ຳ ແລະມຸມຖ່າຍຮູບຍ້ອນຍຸກ.
ນອກຈາກນີ້,ຍັງມີການສະແດງທາງດ້ານວັດທະນະທຳທຸກວັນອາທິດນຳອີກດ້ວຍ.
ໝາຍເຫດ: ພາບຖ່າຍພື້ນທີ່ໃນຂະນະທຳການປັບປຸງ ເປັນຮູບຖ່າຍ ເມື່ອວັນທີ່ 31 ຕຸລາ 2018.