ຢູ່ພະແນກແຜນການ ແລະການລົງທຶນແຂວງສາລະວັນ ໄດ້ມີພິທິເຊັນສັນຍາເຊົ່າ-ສໍາປະທານຂຸດຄົ້ນ ແລະສ້າງຕັ້ງໂຮງງານຂົບຫີນຢູ່ບ້ານເລີງນົກທາເມືອງລະຄອນເພັງ, ໂດຍການເຂົ້າຮ່ວມຂອງ ທ່ານ ວິຊຽນ ນະວິກຸນ ຮອງເຈົ້າແຂວງໆສາລະວັນ ຜູ້ຊີ້ນໍາວຽກງານເສດຖະກິດຂັ້ນແຂວງ, ຝ່າຍຄະນະກໍາມະການຄຸ້ມຄອງການລົງທຶນຂັ້ນແຂວງ, ເຊັນໂດຍ:
ທ່ານ ບຸນເຮັ່ງ ໄຊຍະເສນ ຮອງຫົວໜ້າພະແນກແຜນການ ແລະການລົງທຶນແຂວງ, ທ່ານ ພູນສຸກ ລັດຖະເຮົ້າ ຮອງ ເຈົ້າເມືອງໆລະຄອນເພັງ ແລະ ພະແນກການທີ່ກ່ຽວຂ້ອງກັບ ທ່ານ ບົວທອງ ໄຊປັນຍາສິດ ປະທານບໍລິສັດລຸນນະພາກຣຸບ ກໍ່ສ້າງຂົວ-ທາງ ຈໍາກັດຜູ້ດຽວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ທ່ານ ບົວທອງ ໄຊປັນຍາສິດ ປະທານບໍລິສັດໄດ້ຜ່ານແຜນດໍາເນີນງານໂຄງການໃຫ້ຮູ້ວ່າ:
ບໍລິສັດໄດ້ເລ່ີມສໍາຫຼວດແລະຂຸດຄົ້ນຫີນຢູ່ເຂດບ້ານເລີງນົກທາ ເມືອງລະຄອນເພັງ ແຂວງສາລະວັນຈໍານວນ 4 ເຮັກຕາແຕ່ປີ2018 ເປັນຕົ້ນມາເພື່ອຕອບສະໜອງໃຫ້ແກ່ໂຄງການກໍ່ສ້າງທາງດ່ວນເຊໂນ-ປາກເຊໄລຍະແຕ່ 4ແຍກທາງເລກ 9 ເຊໂນແຂວງສະຫວັນນະເຂດ ຫາ 3 ແຍກບ້ານນາປົ່ງ ແຂວງສາລະວັນໄລຍະທາງທັງຫມົດ 128 ກິໂລແມັດ.
ນອກຈາກສະຫນອງໃຫ້ແກ່ໂຄງການທາງດ່ວນແລ້ວຍັງຈະໄດ້ຈໍາຫນ່າຍທົ່ວໄປທັງພາຍໃນ ແລະຕ່າງປະເທດ, ກໍານົດໄລຍະເວລາສໍາປະທານ 5 ປີ ນັບແຕ່ປີ 2018-2022 ມີມູນຄ່າການລົງທຶນທັງຫມົດ 20 ຕື້ກວ່າກີບ, ໂຄງການດັ່ງກ່າວເປັນການລົງທຶນໃນຮູບແບບສໍາປະທານໂດຍໄດ້ເສຍພັນທະໃຫ້ລັດຈໍານວນ 200 ໂດລາຕໍ່ປີ.
ແຂວງສາລະວັນໄດ້ຕົກລົງເຫັນດີອະນຸມັດໃຫ້ບໍລິສັດຂຸດຄົ້ນໃນເບື້ອງຕົ້ນ 4 ເຮັກຕາ, ສ່ວນບໍລິສັດແມ່ນມີຄວາມຕ້ອງການຈໍານວນ 20-40 ເຮັກຕາ ເປັນຕົ້ນ: ເນື້ອທີ່ຂຸດຄົ້ນຫີນ 5 ເຮັກຕາ, ເນື້ອທີ່ສ້າງຕັ້ງໂຮງງານ 5 ເຮັກຕາ, ເນື້ອທີ່ເກັບມ້ຽນຫີນ 5 ເຮັກຕາ, ເນື້ອທີ່ຫ້ອງການ-ບ່ອນມ້ຽນພາຫະນະກົນຈັກ 5 ເຮັກຕາ ແລະເນື້ອທີ່ເຂດສະຫງວນປະມານ 20 ເຮັກຕາ ແລະຈະໄດ້ສະເໜີຕໍ່ຄະນະກໍາມະການຄຸ້ມຄອງ ແລະສົ່ງເສີມການລົງທຶນຕື່ມອີກ.
ແຫຼ່ງຂໍ້ມູນ: ຂຽນໂດຍ: ວິໄລວອນ ສິດທິໄຊ, ໜັງສືພິມເສດຖະກິດ-ສັງຄົມ