ທີ່ສະຖານທູດຍີ່ປຸ່ນ ປະຈໍາ ສປປ ລາວ, ລັດຖະບານຍີ່ປຸ່ນໄດ້ໃຫ້ການຊ່ວຍເຫລືອລ້າ ຈຳນວນ 516.347 ໂດລາສະຫະລັດ ເພື່ອປັບປຸງທັກສະການອ່ານຂອງເດັກນ້ອຍ ແລະ ສະພາບແວດລ້ອມດ້ານການສຶກສາ, ລວມໄປເຖິງຄວາມກ້າວໜ້າ ຂອງໂຮງຮຽນປະຖົມ ໃນເມືອງທ່າປາງທອງ, ແຂວງສະຫວັນນະເຂດ.
ຕາງໜ້າເຊັນສັນຍາໂຄງການດັ່ງກ່າວ, ໂດຍທ່ານ ທາເກວາກະ ເຄໂຊ ເອກອັກຄະລາຊະທູດຍີ່ປຸ່ນ ປະຈໍາ ສປປ ລາວ ແລະ ທ່ານ ນາງ ມິຢາອຸຈິ ມາຢຸໂກະ ຜູ້ຈັດການໂຄງການຂອງ ອົງການສຸພະນິມິດສາກົນ ແຫ່ງ ປະເທດຍີ່ປຸ່ນ (World Vision Japan ຫລື WVJ) ເຊິ່ງເປັນອົງການບໍ່ຫວັງຜົນກຳໄລ ຈາກປະເທດຍີ່ປຸ່ນ. ສຳລັບການເຊັນສັນຍາຊ່ວຍເຫລືອຄັ້ງນີ້, ແມ່ນການສະໜັບສະໜຸນທຶນປີທຳອິດ ຂອງໂຄງການທີ່ມີອາຍຸ 3 ປີ.
ໂຄງການ “ການປັບປຸງທັກສະການອ່ານຂອງເດັກນ້ອຍ ແລະ ສະພາບແວດລ້ອມດ້ານການສຶກສາ ລວມໄປເຖິງຄວາມກ້າວໜ້າ ຂອງໂຮງຮຽນປະຖົມໃນ ເມືອງທ່າປາງທອງ, ແຂວງສະຫວັນນະເຂດ”
ໃນປີທຳອິດ ມີເປົ້າໝາຍທີ່ຈະຮັບປະກັນ ໃຫ້ນັກຮຽນທຸກຄົນໃນເມືອງດັ່ງກ່າວ ບໍ່ວ່າຈະເປັນເພດໃດ, ຊົນເຜົ່າໃດ, ສະພາບທາງເສດຖະກິດ ຫລື ມີການສູນເສຍອົງຄະ, ກໍສາມາດເຂົ້າເຖິງການສຶກສາຂັ້ນປະຖົມ ແລະ ປັບ ປຸງການຮຽນຮູ້ໃນເບື້ອງຕົ້ນໄດ້.
ອົງການ WVJ ຈະຊ່ວຍສະໜອງຫລັກສູດ ການຝຶກອົບຮົມອາຈານ ເພື່ອຍົກລະດັບການສອນດ້ານການຂຽນການອ່ານ, ສະໜັບສະໜູນຊື້ອຸປະກອນທີ່ຈຳເປັນຕໍ່ສຸຂາພິບານ ແລະ ໃຫ້ຄຳແນະນຳຕໍ່ຜູ້ປົກຄອງ, ຊຸມຊົນໃຫ້ການຊ່ວຍເຫລືອເດັກນ້ອຍ ພັດທະນາທັກສະການອ່ານຂອງພວກເຂົາ, ເພື່ອປະກອບ ສ່ວນເຂົ້າໃນສ່ວນປະກອບສຳຄັນ ຂອງການສຶກສາທີ່ມີຄຸນນະພາບ ໃນໂຮງຮຽນໝູ່ບ້ານ ທີ່ເມືອງດັ່ງກ່າວ.
ແຫຼ່ງຂໍ້ມູນ: ສຳນັກຂ່າວສານປະເທດລາວ
