ເພື່ອເປັນການສ້າງຂະບວນການຂໍ່ານັບຊົມເຊີຍ ວັນຊາດທີ 2 ທັນວາ ຄົບຮອບ 44 ປີ ວັນສ້າງຕັ້ງກອງເຍົາວະ ຊົນທັນວາ ຄົບຮອບ 64 ປີ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 99 ປີ ຕິດພັນກັບການກະກຽມກອງປະຊຸມໃຫຍ່ຜູ້ແທນຊາວໜຸ່ມທົ່ວນະຄອນຫຼວງວຽງຈັນ ຄັ້ງທີ VIII ແລະ ອົງຄະນະພັກນະຄອນຫຼວງວຽງຈັນ ຄັ້ງທີ VII ໃຫ້ເປັນຂະບວນຟົດຟື້ນ.
ຄະນະຊາວໜຸ່ມ ປປລ ນະຄອນຫຼວງວຽງຈັນ ໄດ້ຈັດກິດຈະກໍາແຂ່ງຂັນຕີກອງດຸລິຍາງເຍົາວະຊົນທັນວາແປຕົວອັກສອນ ທົ່ວນະຄອນຫຼວງວຽງຈັນ ປະຈຳປີ 2019 ຂືຶ້ນຢູ່ທີ່ສູນການຄ້າລາວ-ໄອເຕັກ ໂດຍເປັນປະທານຂອງສະຫາຍ ນາງ ສຸມາລີ ທໍາມະວົງ ເລຂາຄະນະບໍລິຫານງານຊາວໜຸ່ມ ປປລ ນະຄອນຫຼວງວຽງຈັນ ມີສະຫາຍ ບຸນທ່ຽງ ຂຸນສີ ຄະນະປະຈໍາພັກປະທານອົງການແນວລາວສ້າງຊາດ ນະຄອນ ຫຼວງວຽງຈັນ (ຜູ້ຊີ້ນໍາວຽກງານອົງການຈັດຕັ້ງມະຫາຊົນ) ມີບັນດາຄະນະຊາວໜຸ່ມເມືອງ ຄູ-ອາຈານ ແລະ ສະມາຊິກຊາວໜຸ່ມ-ເຍົາວະຊົນທັນວາເຂົ້າຮ່ວມ.
ສະຫາຍ ນາງ ສຸມາລີ ທໍາມະວົງ ເລຂາຄະນະບໍລິຫານງານຊາວໜຸ່ມ ປປລ ນະຄອນຫຼວງວຽງຈັນ ໄດ້ກ່າວວ່າ: ການຈັດກິດຈະກໍາແຂ່ງຂັນຕີກອງດຸລິຍາງ ປະຈໍາປີ 2019 ຄັ້ງນີ້ ກໍ່ເພື່ອເປັນການສົ່ງເສີມບົດບາດຂອງການຈັດຕັ້ງເຍົາວະຊົນທັນວາໃຫ້ມີຄວາມໜັກແໜ້ນເຂັ້ມແຂງທາງດ້ານການຈັດຕັ້ງ ແລະ ແບບແຜນວິ ທີນໍາພາ ໃຫ້ສອດຄ່ອງກັບສະພາບຄວາມເປັນຈີ່ງໃນແຕ່ລະໄລຍະ ພ້ອມທັງເປັນການກະຕຸກຊຸກຍູ້ຊາວໜຸ່ມຄູ-ອາຈານ ຜູ້ຮັບຜິດຊອບວຽກງານເຍົາວະຊົນທັນວາ ໃນທົ່ວນະຄອນຫຼວງວຽງຈັນ ໄດ້ມີການພົບປະແລກ ປ່ຽນບົດຮຽນເຊີ່ງກັນ ແລະ ກັນ ໃນວຽກງານກອງດຸລິຍາງ
ນອກຈາກນັ້ນແລ້ວ ສະມາຊີກເຍົາວະຊົນທັນວາແຕ່ລະໂຮງຮຽນ ຍັງໄດ້ມີໂອກາດເຄື່ອນໄຫວກິດຈະກໍາຮ່ວມກັນ ມີການແລກປ່ຽນບົດຮຽນເຊີ່ງກັນ ແລະ ກັນ ສ້າງໄດ້ຄວາມສາມັກຄີ ຮັກແພງຊ່ວຍເຫຼືອເຊີ່ງກັນ ແລະ ກັນ ເພື່ອພ້ອມກັນກ້າວໜ້າໃຫ້ສົມກັບຄໍາເວົ້າທີ່ວ່າ:
“ເພື່ອພາລະກິດຂອງຊາດເຍົາວະຊົນກຽມພ້ອມ” ການແຂ່ງຂັນຕີກອງດຸລິຍາງເຍົາະຊົນທັນວາແປຕົວອັກສອນໃນຄັ້ງນນີ້ ມີຜູ້ເຂົ້າຮ່ວມແຂ່ງຂັ້ນທີ່ເປັນຕົວແທນມາຈາກ 8 ຕົວເມືອງ ແລະ 2 ໂຮງຮຽນເອກລາດ ລວມທັງໝົດ 11 ທີມ ມີຜູ້ເຂົ້າຮ່ວມແຂ່ງຂັນທັງໝົດ 132 ນ້ອງ ທີ່ເປັນຕົວແທນໃຫ້ແກ່ບັນດາເມືອງຂອງນະຄອນຫຼວງວຽງຈັນ ຜ່ານການແຂ່ງຂັນປະກົດວ່າ:
ທີມຊະນະເລີດອັນດັບທີ 1 ໄດ້ແກ່ທີມຈາກເມືອງຈັນທະບູລີ ເຊິ່ງມາຈາກໂຮງຮຽນ ມສ ສິນໄຊ ໄດ້ຮັບຂັນລາງວັນ 1 ໜ່ວຍ ພ້ອມເງິນສົດ 1.000.000 ກີບ ຊະນະເລີດອັນດັບທີ 2 ທີມຈາກເມືອງສີໂຄດຕະບອງ ໂຮງຮຽນ ມຕ ຊ້າງນ້ອຍ ໄດ້ຮັບຂັນລາງວັນ 1 ໜ່ວຍ ພ້ອມເງິນສົດ 800.000 ກີບ ຊະນະເລີດອັນດັບ 3 ທີມຈາກເມືອງໄຊທານີ ໂຮງຮຽນ ມຕ ຈິດຕິສັກ ໄດ້ຮັບຂັນລາງວັນ 1 ໜ່ວຍ ພ້ອມເງິນສົດ 600.000 ກີບ
ແລະ ສໍາລັບພາກສ່ວນທີ່ເຂົ້າຮ່ວມແຂ່ງຂັນໃນຄັ້ງນີ້ ແຕ່ລະທິມຍັງໄດ້ຮັບລາງວັນຊົມເຊີຍທີມລະ 300.000 ກີບ ພ້ອມດ້ວຍອຸປະ ກອນການຮຽນຈໍານວນໜຶ່ງ.
ແຫຼ່ງຂໍ້ມູນ: ຄະນະຊາວໜຸ່ມ ນະຄອນຫຼວງວຽງຈັນ Vientiane Capital Youth Union