ລັດຖະບານຍີ່ປຸ່ນ ໄດ້ໃຫ້ການຊ່ວຍເຫຼືອລ້າເປັນເງິນ 268.910 ໂດລາສະຫະລັດ ຫຼື ປະມານ 2,38 ຕື້ກີບ ເພື່ອຈັດຕັ້ງປະຕິບັດໂຄງການກໍ່ສ້າງຮາກຖານການສຶກສາໃຫ້ແກ່ການສົ່ງເສີມສຸຂະພາບຜົ້ງປາກ ແລະ ສ້າງລະບົບພູມຄຸ້ມກັນໃຫ້ແກ່ບັນດາແຂວງໃນປະເທດລາວ.
ພິທີເຊັນສັນຍາໂຄງການຊ່ວຍເຫຼືອລ້າດັ່ງກ່າວ ຈັດຂຶ້ນທີ່ສະຖານທູດ ຢີ່ປຸ່ນ ຮ່ວມລົງນາມລະຫວ່າງທ່ານ ອິວາໂມໂຕະ ເຄອິຈິ ອຸປະທູດຢີ່ປຸ່ນປະຈໍາ ສປປ ລາວ ແລະ ທ່ານ ໂມຊິດະ ໂທຊິມິຊຶ ຕົວແທນຈາກອົງການຊ່ວຍເຫຼືອສາກົນທາງດ້ານການສຶກສາທັນຕະກໍາແຫ່ງປະເທດຍີ່ປຸ່ນ (OISDE).
ເຊິ່ງເປັນອົງການບໍ່ຫວັງຜົນກຳໄລຈາກປະເທດຍີ່ປຸ່ນ ທີ່ໄດ້ລິເລີ່ມ ແລະ ຈັດຕັ້ງປະຕິບັດໂຄງການດັ່ງກ່າວ ການຕໍ່ສັນຍາການຊ່ວຍເຫຼືອລ້າໃນຄັ້ງນີ້ ຈະໃຫ້ການສະໜັບສະໜູນກິດຈະກໍາໃນປີທີ 2 ຂອງໂຄງການທີ່ມີອາຍຸ 3 ປີ ໂດຍຈະໃສ່ຊື່ວ່າ “ໂຄງການກໍ່ສ້າງຮາກຖານການສຶກສາໃຫ້ແກ່ການສົ່ງເສີມສຸຂະພາບຜົ້ງປາກ ແລະ ສ້າງລະບົບພູມຄຸ້ມກັນ”.
ໂຄງການດັ່ງກ່າວ ມີເປົ້າໝາຍທີ່ຈະຍົກລະດັບການຮັກສາທາງທັນຕະກຳ ແລະ ການປ້ອງກັນ ການລົບລ້າງພະ ຍາດໃນຜົ້ງປາກ ແລະ ການຕິດເຊື້ອຂັ້ນຮຸນແຮງໃນ ສປປ ລາວ ເຊິ່ງຄາດວ່າພວກເຂົາເຫຼົ່ານັ້ນຈະເຮັດວຽກເປັນພະຍາບານທາງດ້ານທັນຕະກໍາໃນອະນາຄົດ.
ແຫຼ່ງຂໍ້ມູນ: ວຽງຈັນໃໝ່