ເມື່ອບໍ່ດົນມານີ້: ກະຊວງການຕ່າງປະເທດ
ໄດ້ເລື່ອນກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 3, ກອງປະຊຸມສຸດຍອດ ACMECS ຄັ້ງທີ 9, ກອງປະຊຸມສຸດຍອດ CLMV ຄັ້ງທີ 10 ແລະ ກອງປະຊຸມສຸດຍອດ CLV ຄັ້ງທີ 11
ປະຈຸບັນເຫັນວ່າ ທົ່ວໂລກກຳລັງປະເຊີນໜ້າກັບການແຜ່ລະບາດຂອງ ພະຍາດອັກເສບປອດຈາກເຊື້ອຈຸລະໂລກສາຍພັນໄໝ່ (COVID-19) ນັບມື້ນັບເພີ່ມຂຶ້ນ ລວມທັງມີຜູ້ເສຍຊີວິດ. ຫຼາຍປະເທດໄດ້ດຳເນີນທຸກວິທີທາງ ເພື່ອສະກັດກັ້ນ ແລະ ຄວບຄຸມພະຍາດດັ່ງກ່າວ ໃນນັ້ນລວມໄປເຖິງການໃຊ້ມາດຕະການ ຫຼີກລ່ຽງການເດີນທາງໄປຕ່າງແຂວງ/ເຂດແຄວ້ນ ແລະ ຕ່າງປະເທດ ທີ່ມີຄວາມສ່ຽງ, ການກວດສຸຂະພາບທີ່ເຄັ່ງຄັດ, ມີການກັກຕົວເພື່ອກວດຫາເຊື້ອພະຍາດ ແລະ ອື່ນໆ.
ສປປ ລາວ ກໍ່ໄດ້ຮ່ວມມືກັບປະຊາຄົມໂລກຢ່າງໃກ້ຊິດ ເພື່ອປ້ອງກັນ ແລະ ສະກັດກັ້ນ ພະຍາດດັ່ງກ່າວ ລວມໄປເຖິງມາດຕະການຕ່າງໆທີ່ກ່າວມາຂ້າງເທິງ.
ພ້ອມດຽວກັນນີ້, ລັດຖະບານ ແຫ່ງ ສປປ ລາວ ກໍ່ໄດ້ຕົກລົງ ເລື່ອນກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 3, ກອງປະຊຸມສຸດຍອດ ACMECS ຄັ້ງທີ 9, ກອງປະຊຸມສຸດຍອດ CLMV ຄັ້ງທີ 10 ແລະ ກອງປະຊຸມສຸດຍອດ CLV ຄັ້ງທີ 11.
ທີ່ມີແຜນຈະຈັດຂຶ້ນໃນວັນທີ 25-27 ມີນາ 2020 ທີ່ ນະຄອນຫລວງວຽງຈັນ ອອກໄປກ່ອນຈົນກວ່າສະພາບການແຜ່ລະບາດຂອງພະຍາດ COVID-19 ຈະມີ ທ່າອ່ຽງຫລຸດລົງ ແລະ ສາມາດຄວບຄຸມໄດ້ໃນລະດັບທີ່ແນ່ນອນ.
ແຫຼ່ງຂໍ້ມູນ: ກະຊວງການຕ່າງປະເທດ