ເລື່ອງ:ນະມັດສະການ: ພຣະຫຼັກຄໍາ ເຈົ້າຄະນະແຂວງ/ນະຄອນຫຼວງ ໃນຂອບເຂດທົ່ວປະເທດ ທີ່ເຄົາຣົບຢ່າງສູງ. ໃຫ້ພຣະສົງ-ສາມະເນນ ໃນແຕ່ລະວັດສູດພຣະພຸດທະມົນ ເພື່ອຊ່ວຍຂະຈັດປັດເປົ່າໂຣກໄພທັງຫຼາຍ.
-ອີງຕາມ: ຂໍ້ຕົກລົງຂອງນາຍົກລັດຖະມົນຕີ ສະບັບເລກທີ 09/ນຍ ລົງວັນທີ 03 ກຸມພາ 2020 ວ່າດ້ວຍການ
ແຕ່ງຕັ້ງຄະນະສະເພາະກິດ ເພື່ອປ້ອງກັນ ຄວບຄຸມ ແລະແກ້ໄຂການລະບາດຂອງພະຍາດອັກເສບປອດ ຈາກເຊື້ອຈຸລະໂລກໂຄໂລນາ ສາຍພັນໃຫມ່ (COVID-19).
-ອີງຕາມ: ມະຕິຕົກລົງຂອງຄະນະບໍລິຫານງານປະຈໍາການ ສູນກາງອົງການພຸດທະສາສະຫນາສັມພັນ ແຫ່ງ ສປປລາວ ຄັ້ງວັນທີ 16 ມີນາ 2020.
ຫ້ອງການບໍລິຫານງານສູນກາງອົງການພຸດທະສາສະຫນາສັມພັນ ແຫ່ງ ສປປ ລາວ ຂໍນະມັດສະການແຈ້ງການມາ ຍັງພຣະຫຼັກຄໍາ ເຈົ້າຄະນະແຂວງ/ນະຄອນຫຼວງ ໃນຂອບເຂດທົ່ວປະເທດຊາບວ່າ ພຣະຍອດແກ້ວມະຫາສັງຄະສຸທັມມາທິບໍດີ (ມະຫາງອນ ດໍາຣົງບຸນ) ປະທານສູນກາງອົງການພຸດທະສາສະຫນາສັມພັນ ແຫ່ງ ສປປ ລາວ ໄດ້ອາພາດ ແລະປິ່ນປົວຢູ່ໂຮງພະຍາບານ.
ແລະເນື່ອງດ້ວຍສະຖານະການໃນປັດຈຸບັນເກີດໄພພະຍາດໂຣຄາບຽດບຽນມວນມະນຸດສະຍະຊາດ ຄື ພະຍາດອັກເສບປອດຈາກເຊື້ອຈຸລະໂລກໂຄໂຣນາສາຍພັນໃຫມ່ (cOVID-19) ເຊິ່ງປັດຈຸບັນໄດ້ແພ່ລາມໄປໃນທົ່ວ ໂລກ ສ້າງຄວາມເດືອດຮ້ອນຕໍ່ຊີວິດເສດຖະກິດ ສັງຄົມຢ່າງໃຫຍ່ຫຼວງ, ເພື່ອຂະຈັດປັດເປົ່າໄພພິບັດຄືໂຣຄາພະຍາດບຽດບຽນນີ້.
ທາງການຈັດຕັ້ງຝ່າຍບ້ານເມືອງ ກໍ່ໄດ້ເອົາໃຈໃສ່ໃນການຄວບຄຸມ ສະກັດກັ້ນ ແລະປິ່ນປົວຢ່າງຫນັກ, ພຣະພຸດທະສາສະຫນາ ເປັນສາສະຫນາຄົງຄູ່ມາກັບປະຊາຊົນປະເທດຊາດລາວ ແລະຊາວໂລກຫຼາຍຮ້ອຍຫຼາຍພັນປີ ໄດ້ຊ່ວຍຂະຈັດປັດເປົ່າທຸກໂສກ ໂຣກໄພພະຍາດ ທັງພາຍນອກແລະພາຍໃນ ນໍາຄວາມສຸກສະຫງົບສຸກມາໃຫ້ສະເຫມີມາ ເຄີຍມີເລື່ອງເກີດຂຶ້ນໃນສະໄຫມ ພຣະພຸດທະການພຣະພຸດທະເຈົ້າ ເຄີຍໃຫ້ພຣະອານົນເຖຣະເຈົ້າ ສຸດພຣະພຸດທະມົນ ຄື
ຣະຕະນະສຸດ ເພື່ອຂະຈັດປັດເປົ່າ ໂຣກໄຟພະຍາດແພ່ລະບາດ ທີ່ເມືອງເວສາລີ, ມາໃນປັດຈຸບັນພຣະພຸດທະສາສະຫນາ ພຣະສົງທັງປວງ ຄວນໄດ້ອາໄສພຣະພຸດທະທັມ ພຣະພຸດທະມົນ ຊ່ວຍຂະຈັດປັດເປົ່າທຸກໂສກໂຣກໄພພະຍາດອັນບຽດບຽນມວນມະນຸດໃນຄັ້ງນີ້ ໃຫ້ສະຫງົບ ລະງັບດັບຫາຍໄປ ນໍາຄວາມສຸກມາໃຫ້ເຫມືອນດັ່ງໃນອະດີດທີ່ຜ່ານມາ.
ແຈ້ງການລົງໄປຫາ ອພສ ເມືອງ, ເຂດ ແລະ ວັດ ເພື່ອໃຫ້ພຣະສົງ-ສາມະເນນ ພາຍໃນແຕ່ລະວັດ ໄດ້ສູດພຣະພຸດທະມົນຄື “ຣະຕະນະສູດ, ອາຕານາຕິຍະສູດ, ໂພດຊັງຄະປະຣິດ ແລະ ອະພະຍະປະຣິດ ໃນທຸກໆວັນເພື່ອຊ່ວຍຂະຈັດປັດເປົ່າທຸກໂສກໂຣກໄພພະຍາດທັງຫລາຍໃນຄັ້ງນີ້ ໃຫ້ສະຫງົບລະງັບດັບຫາຍໄປ ຕາມທາງຄວນດ້ວຍເທີ້ນ.
ສຳລັບໃຜທີ່ສົນໃຈ ເບິ່ງວີດີໂອ ຄາຖາ “ຣະຕະນະສູດ”—> https://youtu.be/0OX3X99tiCw
ແລະຢາກຮູ້ວ່າ “ຣະຕະນະສູດ” ແມ່ນຫຍັງ? ກະລຸນາອ່ານບົດຄວາມນີ້ —>http://insidelaos.com/2020/03/15/24561/
ແຫຼ່ງຂໍ້ມູນ: ສູນກາງອົງການພຸດທະສາສະຫນາສັມພັນ ແຫ່ງ ສປປລາວ