ການຄ້າຢືນຢັນ! ປັດຈຸບັນນີ້ສິນຄ້າຍັງພຽງພໍ ແລະ ຮັບປະກັນໄດ້ຢ່າງໜ້ອຍເຖິງ 2 ເດືອນສັງຄົມຫວັ່ນ ທ່າມກາງທີ່ມີການລະບາດຂອງເຊື້ອໂຄວິດ-19 ສິນຄ້າອຸປະໂພກ-ບໍລິໂພກ ຈະຂາດຕະຫຼາດ ຫຼື ມີແມ່ຄ້າສວຍໂອກາດຂຶ້ນລາຄາ.
ໃນໂອກາດເຂົ້າຮ່ວມພິທີຖະແຫຼງຂ່າວລາຍງານສະພາບການແຜ່ລະບາດຂອງເຊື້ອໂຄວິດ ທີ່ກະຊວງສາທາລະນະສຸກ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ຢັ້ງຢືນວ່າ ຈະເອົາໃຈໃສ່ຄວບຄຸມລາຄາສິນຄ້າ ພ້ອມປັບໄໝແມ່ຄ້າທີ່ຂຶ້ນລາຄາຕາມອຳເພີໃຈ ແລະ ຮັບປະກັນວ່າ ສິນຄ້າຍັງພຽງພໍ ແລະ ສາມາດຮັບປະກັນໄດ້ອີກຢ່າງໜ້ອຍ 2 ເດືອນ.
ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ກ່າວວ່າ:
ຜ່ານການຈັດຕັ້ງປະຕິບັດວຽກງານການຄຸ້ມຄອງລາຄາສິນຄ້າ ແລະ ສົ່ງເສີມການຜະລິດພາຍໃນ ແລະ ໜ່ວຍງານສົ່ງເສີມການຜະລິດບໍລິການການ ແລະ ຈໍລະຈອນສິນຄ້າ ໃນໄລຍະຜ່ານມາສາມາດສັງເກດຕີລາຄາໄດ້ວ່າ:
ເຈົ້າໜ້າທີ່ກວດກາຂອງພວກເຮົາ ແລະ ເຈົ້າໜ້າທີ່ຕຳຫຼວດໄດ້ລົງຕິດຕາມກວດກາຕາມຕະຫຼາດ ແລະ ຮ້ານຄ້າຕ່າງໆ ເຊິ່ງໂດຍທົ່ວໄປແລ້ວສິນຄ້າຍັງມີພຽງພໍ, ຍັງຂ້ອນຂ້າງປົກກະຕິ, ມີການເໜັງຕີງພຽງ 2-3 ລາຍການທີ່ມີລາຄາສູງຂຶ້ນໜ້ອຍໜຶ່ງ ແຕ່ພວກເຮົາກໍ່ໄດ້ມີການກວດກາບັນທຶກ ເຊິ່ງສ່ວນຫຼາຍແມ່ນລາຄາຊີ້ນໝູ ທີ່ນອນຢູ່ໃນລາຄາຄວບຄຸມໃຫ້ຂາຍກິໂລລະ 40 ພັນກີບ ຢູ່ໃນນະຄອນຫຼວງວຽງຈັນຜ່ານການກວດກໍ່ເຫັນວ່າບາງຕະຫຼາດກໍ່ຂາຍຮອດ 45-48 ພັນກີບຕໍ່ກິໂລ ໃນ 8 ຕະຫຼາດ, ມີ 6 ຕະຫຼາດຍັງມີການລະເມີດພວກເຮົາກໍ່ໄດ້ມີການປັບໄໝແມ່ຄ້າທີ່ຂຶ້ນລາຄາສິນຄ້າເກີນລາຄາທີ່ກຳນົດ.
ທ່ານກ່າວຕື່ມວ່າ: ດ້ານຄຳສັ່ງຂອງນາຍົກລັດຖະມົນຕີ ເລກທີ 06/ນຍ, ແລະ ແຈ້ງການ 461/ຫສນຍ ຈະໄດ້ຮັບການປະຕິບັດຢ່າງເຂັ້ມງວດ ໂດຍລະບຸວ່າຍັງອະນຸຍາດຄືເກົ່າໃນການຂົນສົ່ງສິນຄ້າ ຍັງມີຫຼາຍອັນທີ່ຄວາມເຂົ້າໃຈຂອງເຈົ້າກ່ຽວຂ້ອງທີ່ບໍ່ໄດ້ຮັບຜິດຊອບໂດຍກົງດ້ານຄວາມໝັ້ນຄົງຢ້ານມັນແຜ່ລະບາດ ບາງເທື່ອກໍ່ມີການສະກັດກັ້ນກາຍຂອບເຂດເຮັດໃຫ້ມີຄວາມຫຍຸ້ງຍາກໃນການຈໍລະຈອນສິນຄ້າຂ້ອນຂ້າງມີອັນຝືດເຄື່ອງ.
ແຕ່ຂະນະດຽວກັນນັ້ນຍັງເຫັນວ່າ ຍອດຈຳໜ່າຍສິນຄ້າໃນທ້ອງຕະຫຼາດຫຼຸດລົງອາດເປັນຍ້ອນກ່ອນໜ້ານີ້ມີການກັກຕຸນສິນຄ້າໄວ້ ເຮັດການສະໜອງໝູ ແລະ ງົວ-ຄວາຍໃນຕະຫຼາດມີຈຳນວນຫຼຸດລົງ.
ຜ່ານການກວດກາຂອງພະແນກກະສິກຳນະຄອນຫຼວງ ແລະ ພະແນກອຸດສາຫະກຳ ແລະ ການຄ້ານະຄອນຫຼວງ ຂໍຢັ້ງຢືນວ່າ ສິນຄ້າສະບຽງປະເພດກະສິກຳສາມາດກຸ້ມໄດ້ເຖິງ 2 ເດືອນ ຮັບປະກັນບໍ່ມີບັນຫາຫຍັງ, ສຳລັບສິນຄ້າອຸປະໂພກ-ບໍລິໂພກ ກໍ່ໄດ້ເຮັດບົດບັນທຶກກັບຜູ້ນໍາເຂົ້າລາຍໃຫຍ່ປະຈຸບັນສາມາດກຸ້ມໄດ້ເຖິງ 6 ອາທິດ ຖ້າເອົາເຂົ້າມາຫຼາຍສິນຄ້າກໍ່ຈະຄ້າງ ແລະ ແຕ່ການຈໍລະຈອນສິນຄ້າ ແລະ ຂົນສົ່ງສິນຄ້າຈະຢູ່ໃນພາວະປົກກະຕິ.
ແຫຼ່ງຂໍ້ມູນ: ເສດຖະກິດການຄ້າ