ໃຜທີ່ຢາກຮູ້ວ່າ ໂຊກສະຕາລາສີຂອງເຮົາໃນປີນັ້ນໆ ຈະເປັນແບບໃດ? ຊິຮ້າຍຫຼືດີ ໃຫ້ເຈົ້າເບິ່ງ ສະຕາ 12 ລາສີ; ຜູ້ຊາຍໃຫ້ນັບເລີ່ມຕົ້ນ ນັບ 1 ແຕ່ເຈດີ ວຽນໄປທາງຂວາມື ຄື ສັດເງິນ ຈົນຄົບອາຍຸປັດຈຸບັນຕົກບ່ອນໃດ? ໃຫ້ທາຍຕາມນັ້ນ, ຜູ້ຍິງກໍໃຫ້ນັບເລີ່ມຕົ້ນ ເລກ 1 ລົງທີ່ເຈດີຄືກັນ ແຕ່ໃຫ້ວຽນໄປທາງຊ້າຍມື ຄື ນາຄະລາດ ຈົນເຖິງອາຍຸປັດຈຸບັນ ຕົກບ່ອນໃດ ກໍໃຫ້ທາຍຕາມນັ້ນເຊັ່ນກັນ.
ຖ້າຕົກລາສີທີ່ 1 ຄືເຈດີ ທາຍວ່າ ປີນີ້ເຈົ້າຈະສຸກກາຍສະບາຍໃຈ ສິ່ງທີ່ຕ້ອງການທີ່ສຸດ ຈະໄດ້ເຮັດ ແລະໄດ້ຮັບຄວາມສຳເລັດ.
ຖ້າຕົກລາສີທີ່ 2 ຄືສັດເງິນ ທາຍວ່າ ປີນັ້ນຈະຊື້ງ່າຍຂາຍຄ່ອງ, ຄອບຄົວບໍ່ເດືອດຮ້ອນ ຕິດຕໍ່ພົວພັນກັບໃຜ? ກໍຈະສຳເລັດ.
ຖ້າຕົກລາສີທີ່ 3 ຄືຄໍຂາດ ທາຍວ່າ ປີນີ້ຈະປະສົບຄວາມເດືອດຮ້ອນ, ມີຄະດີຄວາມ, ຫ້າມເລີ່ມລົງທຶນ ຫຼືເລີ່ມກິດຈະການງານໃຫຍ່ ໃຫ້ເລືອກເວັ້ນການຄົບໝູ່ຄູ່ບໍ່ດີ ຢ່າທ່ຽວກາງຄືນ, ຢ່າປະໝາດ ແລະໃຫ້ສວດຄາຖາ ຍັນທຸນ ນິມິດຕັງ ຯລຯ ຄືນລະ 3 ຈົບ ເຄະເຂັນຈະເບົາບາງລົງ ຫຼືໝົດໄປ.
ຖ້າຕົກລາສີທີ່ 4 ຄືເຮືອນຫຼວງ ທາຍວ່າ ຜູ້ຮັບລາຊະການຈະໄດ້ເລື່ອນຍົດເລື່ອນຊັ້ນ ຜູ້ເລີ່ມເຮັດວຽກໃໝ່ໆ ຫຼືຈະແຕ່ງດອງ ໃຫ້ແຕ່ງໃນປີນີ້.
ຖ້າຕົກລາສີທີ່ 5 ຄືປາສາດທອງ ທາຍວ່າປີນີ້ເຈົ້າຈະມີຄວາມສຸກກາຍສະບາຍໃຈຫຼາຍກວ່າທຸກປີ ຜູ້ທີ່ມັກສ່ຽງໂຊກ ທ່ານທາຍວ່າຈະມີໂຊກ, ກິດຈະການອັນໃດທີ່ເຮັດລົງໄປແລ້ວ ຈະສົ່ງຜົນດີໃຫ້ເຈົ້າໃນປີນີ້.
ຖ້າຕົກລາສີທີ່ 6 ຄືລາຫູ ທາຍວ່າ ໃຫ້ລະວັງໄວ້ ຈະມີຄົນຍຸແຫຍ່ໃຫ້ແຕກແຍກ ຫຼືນຳຄວາມເດືອດຮ້ອນມາສູ່ ຫ້າມເຊື່ອໃຜງ່າຍໆ, ຫ້າມເລີ່ມເຮັດວຽກໃຫຍ່ທຸກຢ່າງ ໃນປີນີ້, ໃຫ້ສວດຍັນທຸນ ນິມິຕັງ ຯລຯກ່ອນນອນ 3 ຈົບ ທຸກຄືນຕະຫຼອດປີ ເຄາະເຂັນຈະເຊົາ.
ຖ້າຕົກລາສີທີ່ 7 ຄືສັດທອງ ທາຍວ່າ ປີນີ້ເຈົ້າຈະມີຍົດ ໄປທາງໃດກໍຈະໄດ້ຮັບກຽດຕິຍົດໃນຝູງຊົນ ຖ້າເປັນມີຄະດີຄວາມ ຈະມີຄົນຊ່ວຍ.
ຖ້າຕົກລາສີທີ່ 8 ຄືເທວະດາຂີ່ເຕົ່າ ທາຍວ່າ ຄືປີນີ້ດີປານກາງ ເຮັດອັນໃດ? ຈະມີຄົນຄອຍໃຫ້ຄວາມຊ່ວຍເຫຼືອ ໃຫ້ລະວັງເລື່ອງບໍລິວານ ຈະກໍ່ຄວາມເດືອດຮ້ອນມາໃຫ້.
ຖ້າຕົກລາສີທີ່ 9 ຄືຄົນຖືກຂື່ຄາຄໍ ທາຍວ່າ ປີນີ້ຈະມີເລື່ອງໃຫ້ຄຶດຫຼາຍ, ຈະມີເລື່ອງວຸ່ນວາຍ ເຮັດອັນໃດກໍໃຫ້ມີສະຕິ ໃຫ້ສວດຍັນທຸນ ນິມິດຕັງ ຯລຯ ຄືນລະ 3 ຈົບຕະຫຼອດປີ ເຄາະເຂັນຈະເບົາບາງລົງ.
ຖ້າຕົກລາສີທີ່ 10 ຄືພໍ່ໝໍ ທາຍວ່າ ປີນີ້ດີປານກາງ ໃຫ້ຢູ່ໃກ້ຊິດຮັບໃຊ້ເຈົ້ານາຍ ຈຶ່ງຈະດີ ອາໄສຜູ້ນ້ອຍກວ່າ ອາດຈະໄດ້ຮັບຄວາມບໍ່ສະບາຍໃຈ ຮູ້ແລ້ວກຽມໃຈໄວ້ ຈະໄດ້ບໍ່ທຸກ.
ຖ້າຕົກລາສີທີ່ 11 ຄືແມ່ມົດ ທາຍວ່າ ປີນີ້ຈະມີໂຊກລາບ ແຕ່ເມື່ອຍຫຼາຍເຕີບ ຈະມີຄົນນຳໂຊກລາບມາໃຫ້ໃນລັກສະນະມີຂອງແລກປ່ຽນກັນ.
ຖ້າຕົກລາສີທີ່ 12 ຄືນາຄະລາດ ທາຍວ່າ ປີນີ້ດີປານກາງ ຈະໄດ້ໂຊກລາບຈາກບໍລິວານ ຫຼືຜູ້ໃຫຍ່ ແຕ່ໃຫ້ລະວັງຄຳເວົ້າ ແລະອາລົມຂອງຕົນເອງ ປີນີ້, ຈະມີເລື່ອງເພາະປາກ.
ທີ່ມາ: ຕຳລາ ມໍລະດົກອີສານ ໂດຍ ອຈ ສະວິງ ບຸນເຈີມ ປທ 9