ໄມເຄິ້ນ ໄວສ໌ (Michael Weiss) ຊາວເຢຍລະມັນ ອາຍຸ 56 ປີ ໄດ້ຖືກແຕ່ງຕັ້ງໃຫ້ເປັນຫົວໜ້າຄູຝຶກ ທີມຊາດລາວ ຄົນໃໝ່ ໃນວັນທີ 7 ມັງກອນ 2022, ໂດຍ ສະຫະພັນບານເຕະ ແຫ່ງຊາດລາວ.
ເຊິ່ງ ໄມເຄິ້ນ ໄວສ໌ ຈະເປັນຜູ້ນໍາພາຝຶກສອນ ທີມຊາດລາວຊຸດໃຫຍ່ ແລະ ລຸ້ນອາຍຸບໍ່ເກີນ 23 ປີ, ໂດຍມີໃບປະກາດ UEFA Pro License, ເຊິ່ງໄດ້ເຊັນສັນຍາ ກັບ ສະຫະພັນບານເຕະ ແຫ່ງຊາດລາວ ຈົນເຖິງປີ 2024 (2021-2024).
ປະຫວັດຫຍໍ້ ຂອງ ທ່ານ ໄມເຄິ້ນ ໄວສ໌
ຜົນງານການຄຸມທີມ ທີ່ເປັນໜ້າປະທັບໃຈກໍຄື ຕອນທີ່ເພິ່ນໄດ້ຮັບຜິດຊອບ ທີມຊາດ ຟີລິປິນ ຈົນກ້າວຂຶ້ນໄປເຖິງຕໍາແໜ່ງສູງສຸດໃນການຈັດອັນດັບ FIFA ໃນປີ 2012 ແລະ ເປັນທີມອັນດັບທີ 1 ໃນອາຊຽນ ໃນປີ 2013. ໃນຖານະທີ່ເຄີຍເປັນຄູຝຶກໃຫ້ ທີມຊາດມົງໂກລີ ເພິ່ນໄດ້ປັບປຸງເກມການຫຼິ້ນໃຫ້ທຽບກັບລະດັບນາໆຊາດ, ຫັນປ່ຽນປະເທດນ້ອຍທີ່ບໍ່ມີການຫຼິ້ນກິລາບານເຕະຫຼາຍໃຫ້ກ້າວເຂົ້າໄປສູ່ AFC “ປະເທດທີີ່ີມີຄວາມໄຝ່ຝັນຂອງປີ” ໃນທ້າຍປີ 2018.
ຫຼັງຈາກ 3 ປີຜ່ານໄປ, ເພິ່ນໄດ້ລາອອກຈາກການເປັນຄູຝຶກຂອງ ມົງໂກລີ, ເຊິ່ງເປັນບ່ອນທີ່ເພິ່ນໄດ້ຮັບຄວາມເຄົາລົບ ແລະ ໄດ້ໃຫ້ການສະໜັບໜູນ ໃນການພັດທະນາກິລາບານເຕະຂອງ ມົງໂກລີ.
ໄມເຄິ້ນ ໄວສ ໄດ້ສະແດງຄວາມກະຕືລືລົ້ນຢ່າງສູງ ສໍາລັບຄວາມທ້າທາຍໃໝ່. ເຊິ່ງເພິ່ນໄດ້ເວົ້າວ່າ “ກ່ອນອື່ນຂໍສະແດງຄວາມຂອບໃຈເປັນຢ່າງຍິ່ງຕໍ່ ປະທານ ແລະ ສະຫະພັນບານເຕະ ແຫ່ງຊາດລາວ ທີ່ໄວ້ວາງໃຈຂ້າພະເຈົ້າ. ພວກເຮົາໄດ້ມີການສົນທະນາກັນ ແລະ ໄດ້ມີການແລກປ່ຽນທາງດ້ານວິໃສທັດ ເພື່ອທີ່ຈະນໍາພາ ບານເຕະລາວ ໃຫ້ກ້າວລະດັບຂຶ້ນໄປອີກ. ຂ້າພະເຈົ້າ ລໍຄອຍເວລາທີ່ຈະນໍາເອົາປະສົບການຂອງຂ້າພະເຈົ້າໄປສູ່ຜູ້ຫຼິ້ນໄວໜຸ່ມ, ໃນຄວາມຄິດຂອງຂ້າພະເຈົ້າ ການເປັນຄູຝຶກທີມຊາດ ຄືຕໍາ ແໜ່ງສໍາຄັນໃນການນໍາພາກິລາບານເຕະຂອງພວກເຮົາ ໃຫ້ກ້າວໄປຂ້າງໜ້າ. ຍິ່ງໄປກ່ວານັ້ນ ຂ້າພະເຈົ້າ ກໍຮູ້ສຶກເປັນກຽດຢ່າງຍິ່ງທີ່ໄດ້ເປັນຄູຝຶກ ທີມຊາດລາວ ແລະ ລໍຄອຍເວລາທີ່ຈະຮຽນຮູ້ ຮັບເອົາວັດທະນະທໍາຂອງປະເທດ. ເຖິງແມ່ນວ່າອັນດັບ ຟີຟາ ຂອງທີມຊາດລາວ ຈະຕໍ່າ, ແຕ່ກໍຈະພະຍາຍາມຊ່ວຍໃຫ້ບານເຕະລາວ ກ້າວໜ້າໄປເທື່ອລະກ້າວ ແລະ ຂ້າພະເຈົ້າ ຈະສ້າງທີມໃຫ້ມີປະສິດທິພາບ ແລະ ໄດ້ຮັບໝາກຜົນສູງ.”
ທ່ານ ວີເພັດ ສີຫາຈັກ, ປະທານ ສະຫະພັນບານເຕະ ແຫ່ງຊາດລາວ ກ່າວວ່າ “ການໂອ້ລົມກັບທ່ານ ໄມເຄິ້ນ ໄວສ໌ ເປັນການໂອ້ລົມທີ່ມີຄວາມຮ່ວມມື ແລະ ສ້າງສັນຫຼາຍ. ເຂົາຈະນໍາເອົາຄວາມຄິດ ແລະ ປະສົບການໃໝ່ໆມານໍາດ້ວຍ; ພວກເຮົາຫວັງວ່າເພິ່ນຈະສາມາດເຮັດໃຫ້ ທີມຊາດລາວ ປະສົບຜົນສໍາເລັດເຊັ່ນດຽວກັນ. ການແຕ່ງຕັ້ງ ໄມເຄິ້ນ ໄວສ໌ ເປັນຄູຝຶກ ໄດ້ສະແດງໃຫ້ເຫັນເຖິງຄວາມຮັບຜິດຊອບ ແລະ ຄວາມມຸ້ງໝັ້ນຂອງ ສະຫະພັນບານເຕະ ແຫ່ງຊາດລາວ ເພື່ອໃຫ້ໂອກາດທີ່ດີທີ່ສຸດຕໍ່ນັກກິລາຂອງພວກເຮົາໃນຂັ້ນຕໍ່ໄປ.”
ໄມເຄິ້ນ ໄວສ໌ ສໍາເລັດການສຶກສາລະດັບປະລິນຍາຕີ ດ້ານການບໍລິຫານ ແລະ ວິທະຍາສາດການກິລາ ທີ່ ມະຫາວິທະຍາໄລ Mainz. ເພິ່ນໄດ້ແຕ່ງງານກັບ ຍິງຊາວຍີ່ປຸ່ນ ແລະ ມີລູກສາວນໍາກັນສອງຄົນ.