ລັດຖະບານລາວຮ່ວມມືກັບບໍລິສັດເອກະຊົນຕ່າງປະເທດຈະພັດທະນາເຂດໃໝ່ວັງວຽງໃຫ້ກາຍເປັນເມືອງທ່ອງທ່ຽວແບບຍືນຍົງ ແລະ ສີຂຽວໂດຍຖືເອົາປະຊາຊົນໃຫ້ມີສ່ວນຮ່ວມພາຍໃຕ້ການລົງທຶນ 4.000 ລ້ານກວ່າໂດລາສະຫະລັດ ຫລື 4 ຕື້ໂດລາ ຂະນະທີ່ ໂຄງການພັດທະນາເຂດໃໝ່ວັງວຽງພວມດໍາເນີນການສຶກສາຄວາມເປັນໄປໄດ້ ແລະ ຄາດວ່າພາຍໃນປີ 2019 ນີ້ຈະສໍາເລັດ.
ອີງຕາມການເປີດເຜີຍຈາກອໍານາດການປົກຄອງເມືອງວັງວຽງ ແຂວງວຽງຈັນໄດ້ລະບຸວ່າ: ເພື່ອໃຫ້ສອດຄ່ອງຕາມແນວທາງພັດທະນາຂອງລັດຖະບານທີ່ຕ້ອງການສ້າງເມືອງວັງວຽງໃຫ້ກາຍເປັນເມືອງທ່ອງທ່ຽວແບບຍືນຍົງ-ສີຂຽວເພື່ອຍົກສູງຊີວິດການເປັນຢູ່ ແລະ ເພີ່ມລາຍໃຫ້ແກ່ປະຊາຊົນລາວໂດຍສະເພາະຊາວເມືອງວັງວຽງ, ເພື່ອປົກປັກຮັກສາທໍາມະຊາດສິ່ງແວດລ້ອມ, ສາຍນໍ້າຊອງ ແລະ ຍົກລະດັບໃຫ້ເມືອງວັງວຽງໂດດເດັ່ນຕາມທ່າແຮງບົ່ມຊ້ອນທີ່ມີຢູ່, ເພື່ອຮອງຮັບການເຕີບໃຫຍ່ຂະຫຍາຍຕົວຂອງເສດຖະກິດໂດຍສະເພາະໂຄງການເສັ້ນທາງລົດໄຟລາວ-ຈີນຈະສໍາເລັດພາຍໃນປີ 2021 ແລະ ເສັ້ນທາງດ່ວນນະຄອນຫລວງວຽງຈັນ-ວັງວຽງ ສະນັ້ນມີຄວາມຈໍາເປັນຕ້ອງພັດທະນາໃຫ້ສອດຄ່ອງກັບສະພາບ ແລະ ເງື່ອນໄຂຕົວຈິງ.
ທ່ານ ຄໍາຜອງ ດວງວິໄລ ເຈົ້າເມືອງວັງວຽງໄດ້ເປີດເຜີຍຕໍ່ນັກຂ່າວສໍານັກຂ່າວສານປະເທດລາວໃນວັນທີ 18 ມັງກອນ 2019 ນີ້ວ່າ: ເມືອງວັງວຽງບໍ່ພຽງແຕ່ເປັນເມືອງໜຶ່ງທີ່ມີຄວາມສໍາຄັນໃນດ້ານອຸດສາຫະກໍາທ່ອງທ່ຽວພາຍໃນແຂວງວຽງຈັນ ແຕ່ຫາກຍັງມີຄວາມສໍາຄັນຕໍ່ການພັດທະນາເສດຖະກິດ-ສັງຄົມ ແລະ ຍົກລະດັບຊີວິດການເປັນຢູ່ຂອງປະຊາຊົນພາຍໃນປະເທດອີກດ້ວຍ ອັນເນື່ອງມາຈາກເມືອງວັງວຽງໄດ້ກາຍເປັນສະຖານທີ່ທ່ອງທ່ຽວຍອດນິຍົມ ແລະ ເປັນທີ່ຮັບຮູ້ຂອງນັກທ່ອງທ່ຽວທົ່ວໂລກແລ້ວ ເຊິ່ງປີ 2018 ຜ່ານມານີ້ເຮັດໃຫ້ນັກທ່ອງທ່ຽວເພີ່ມຂຶ້ນ 300.000 ຄົນ ແລະ ຄາດວ່າຈະສືບຕໍ່ເພີ່ມຂຶ້ນເຖິງ 400.000 ກວ່າຄົນພາຍໃນປີ 2019 ໃນນັ້ນສ່ວນໃຫຍ່ແມ່ນນັກທ່ອງທ່ຽວເກົາຫລີ, ຈີນ, ເອີຣົບ, ອາຊຽນ ແລະ ອື່ນໆ.
ແນວໃດກໍດີ ຫວ່າງບໍ່ດົນມານີ້, ລັດຖະບານລາວໄດ້ເຊັນສັນຍາຮ່ວມກັບເອກະຊົນຕ່າງປະເທດພາຍໃຕ້ໂຄງການຊື່: ບໍລິສັດພັດທະນາໃໝ່ວັງວຽງລາວຈໍາກັດ ເຊິ່ງປັດຈຸບັນນີ້ບໍລິສັດພວມດໍາເນີນການສຶກສາ ແລະ ສໍາຫລວດຄວາມເປັນໄປໄດ້ໃນເນື້ອທີ່ສໍາປະທານເບື້ອງຕົ້ນ 7.000 ກວ່າເຮັກຕາໃນເບື້ອງທິດຕາເວັນຕົກ.
ທ່ານ ເຈົ້າເມືອງວັງວຽງ ພ້ອມເຈົ້າຂອງໂຄງການຍັງຢືນຢັນວ່າໂຄງການພັດທະນາເຂດວັງວຽງໃໝ່ກວມເອົາ 22 ບ້ານຂອງປະຊາຊົນ ແຕ່ວ່າປະຊາຊົນໃນເຂດບ້ານດັ່ງກ່າວຈະບໍ່ຍົກຍ້າຍໜີເພາະເຂດນີ້ເປັນພັດທະນາແບບຍືນຍົງ-ສີຂຽວ ແລະ ໃຫ້ປະຊາຊົນມີສ່ວນຮ່ວມ ນອກຈາກນັ້ນຜູ້ພັດທະນາຍັງຈະໃຊ້ວິທີອະນຸລັກເຮືອນໃຫ້ຢູ່ໃນຮູບຊົງດັ້ງເດີມ, ວິຖີຊີວິດ ແລະ ອື່ນໆໃຫ້ຍການເປັນຈຸດຂາຍດ້ານການທ່ອງທ່ຽວ ພ້ອມກັນນີ້ຍັງຈະສ້າງວຽກເຮັດງານທໍາໃຫ້ປະຊາຊົນຈໍານວນ 30.000 ຄົນ ແລະ ຈະຮັບຊື້ຜົນຜະລິດກະສິກໍາສະໜອງໃຫ້ການບໍລິການທ່ອງທ່ຽວອີກດ້ວຍ.
ໂຄງການພັດທະນາດັ່ງກ່າວຄາດວ່າ: ສ້າງເປັນເຂດທ່ອງທ່ຽວອະນຸລັກທໍາມະຊາດ(ບໍ່ທໍາລາຍ ແລະ ບໍ່ມ້າງເພທໍາມະຊາດທີ່ມີຢູ່), ຫ້າງສັບພະສິນຄ້າ, ສູນວັດທະນະທໍາ, ໂຮງແຮມ, ສະຖາບັນການສຶກສາ, ຫໍປະຊຸມນາໆຊາດ, ສວນນໍ້າ ແລະ ອື່ນໆ ເຊິ່ງການພັດທະນາເຂດນີ້ພາຍໃຕ້ຄວາມພະຍາຍາມເພື່ອຮອງການຂະຫຍາຍຕົວເສດຖະກິດ ແລະ ການທ່ອງທ່ຽວອະນາຄົມ ແລະ ເມືອງວັງວຽງຈະກາຍເປັນສູນກາງທ່ອງທ່ຽວ ແລະ ປະຕູອອກສູ່ບັນດາປະເທດສະມາຊິກອາຊຽນທີ່ມີປະຊາກອນ 600 ລ້ານກວ່າຄົນ ແລະ ບັນດາແຂວງຕ່າງໆຂອງ ສປຈີນທີ່ມີຊາຍແດນໃກ້ກັບ ສປປ ລາວ.
ທີ່ມາ: ຂປລ