ເທື່ອກ່ອນ ອິນໄຊລາວ ໄດ້ລວບລວມບັນດາລາຍການທີ່ເມຍໄດ້ເຊື່ອງລາຄາແທ້ໄວ້ເປັນຄວາມລັບຈາກຜົວ ໂດຍບາງລາຍການກໍເຊື່ອງລາຄາໄດ້ເກີນເຄິ່ງ ຫຼື ບາງລາຍການກໍເຊື່ອງມິດຈົນຜົວຄິດວ່າເປັນຂອງແຖມແທ້ໆ.
ໃນແບບດຽວກັນ ກໍບໍ່ແມ່ນວ່າຈະມີແຕ່ເມຍເທົ່ານັ້ນ ທີ່ເປັນນັກເກັບຄວາມລັບ ເພາະຖ້າມາເບິ່ງທາງຂອງຜົວ ໂດຍບາງຢ່າງເມຍກໍ່ອາດຈະຮູ້ແບບເລັກໆ ນ້ອຍໆ ມາແດ່ ແຕ່ຍັງຫາຫຼັກຖານບໍ່ໄດ້, ແຕ່ບາງລາຍການກໍຫາມາຮູ້ຕອນນີ້ ກໍເອົາເປັນວ່າເຮັດເປັນບໍ່ຮູ້ບໍເຫັນແດ່ກໍຄົງຈະບໍ່ເປັນຫຍັງເນາະ.
- ຄ່າແຕ່ງລົດ: ຄ່າແຕ່ງລົດຂອງຜົວ ກັບຄ່າແຕ່ງໜ້າເຮັດຜົມຂອງເມຍ ເປັນອີຫຍັງທີ່ຄ້າຍຄືກັນຫຼາຍເພາະຕ່າງມີລາຍການພິເສດເຊິ່ງອີກຝ່າຍອາດບໍ່ເຄີຍຮູ້ມາກ່ອນ ໂດຍສິ່ງທີ່ເບິ່ງທຳມະດາຢ່າງໝວກກັນນ໋ອກ ປອກແອນ ຈົນຮອດຈຸດປິດລົມຢາງກໍ່ອາດເຮັດໃຫ້ເມຍຕົກໃຈໄດ້ເມື່ອຮູ້ລາຄາແທ້.
- ຄ່າກິນລ້ຽງສ້າງສັນກັບໝູ່: ການອອກງານສ້າງສັນນັບເປັນສ່ວນໜຶ່ງຂອງການເຮັດວຽກເປັນທີມແລ້ວ ແລະເມື່ອເຂົາວົງການສ້າງສັນແລ້ວການຈະບໍ່ຈ່າຍເງິນເລີຍກໍ່ຈະເປັນໄປບໍ່ໄດ້ ໂດຍບາງເທື່ອການກິນດື່ມກໍ່ອາດຈະເລີຍເຖີດໄປໄດ້ບໍ່ວ່າຈະເປັນອາຫານ, ເມນູພິເສດຫຼືເຄືອງດື່ມທີ່ຖືກພະນັກງານເຊຍມາສຸດຈິດສຸດໃຈລ້ວນແຕ່ເຮັດໃຫ້ຫານອອກມາແລ້ວສູງກວ່າປົກກະຕິ ແຕ່ກະຕ້ອງຈ່າຍເທົາກັນ ບໍ່ວ່າຈະກິນນ້ອຍກວ່າກໍ່ຕາມເລື່ອງແບບນີ້ຖ້າເມຍຮູ້ອາດຖືກເວົ້າໃຫ້ເຖິງຂັ້ນບໍ່ຍອມໃຫ້ໄປກັບໝູ່ກຸ່ມນີ້ອີກເລີຍ.
- ຄ່າລາຍການແອັບເກມ ລວມເຖິງອິນເຕີເນັດ: ເລື່ອງເກມ ແລະລາຍການອອນລາຍຕະຫຼອດເຖິງອຸປະກອນລາຍການຕ່າງໆນັ້ນ ເກືອບຈະເປັນສ່ວນໜຶ່ງຂອງການດຳລົງຊີວິດຂອງບັນດາຜົວໄວລຸ້ນທັງຫຼາຍ ແລະກໍ່ເຊັ່ນດຽວກັນກັບເຄື່ອງສຳອາງກະປຸກເລັກໆນ້ອຍໆຂອງຜູ້ຍິງ ກໍຄືລາຄາກັບສິ່ງທີ່ຕາເຫັນນັ້ນມັນຕ່າງກັນ ຫາກເມຍບໍ່ໄດ້ຫຼິ້ນເກມອອນລາຍຄືກັນກໍ່ເອີ້ນວ່າບໍ່ມີມື້ຮູ້ລາຄາທີ່ແທ້ຈິງເລີຍ.
- ເບ້ຍລ້ຽງ ແລະໂບນັດ: ບັນດາພໍ່ບ້ານໃຈກ້າທັງຫຼາຍບໍ່ວ່າຈະເອົາເງິນເດືອນທຸກກີບໃຫ້ກັບເມຍເກັບໄວ້ແລ້ວກໍ່ຕາມແຕ່ຈະມີໃຜທີ່ບອກໄດ້ເຕັມປາກເຕັມຄຳວ່າແມ່ນແຕ່ໂບນັດ, ເບ້ຍລ້ຽງແລະເງິນພິເສດຈາກຫົວໜ້າກໍ່ຕົກໄປຢູ່ນຳເມຍໝົດ ພຽງແຕ່ເງິນເຫຼົ່ານີ້ອາດຕ້ອງຖືກຈັດແບ່ງໄປເກັບໄວ້ຕາມບ່ອນຕ່າງໆ ຫຼືອາດຈະສະແດງໃຫ້ເມຍເຫັນແຕ່ບາງສ່ວນເທົ່ານັ້ນ.
ເຫັນແບບນີ້ແລ້ວຢ່າພ້າວຄິດວ່າ ອິນໄຊລາວ ສະໜັບສະໜູນໃຫ້ສະຖາບັນຄອບຄົວເກີດຄວາມຜິດຖຽງກັນ ຫຼື ຢາກໃຫ້ສາມີພັນລະຍາລະແວງກັນຈົນກາຍເປັນນັກສືບກັນເອງ ເພາະເລື່ອງເຫຼົ່ານີ້ ເຮົາເຊື່ອວ່າຫາກບໍ່ເຫຼືອບ່າກວ່າແຮງຫຍັງ ອີກຝ່າຍທີ່ມາຮູ້ລາຄາຕາມຫຼັງກໍພຽງແຕ່ຕົກໃຈ ແລະ ຢາກຫົວ ຫຼື ບາງຄົນກໍອາດເຮັດເປັນລືມມັນໄປ ເພາະຄວາມຮັກທີ່ມີໃຫ້ນັ້ນ ມັນຍິ່ງໃຫຍ່ກວ່າຕົວເລກທີ່ມັນເຊື່ອງໄວ້ຢູ່ໃນລາຍການເຫຼົ່ານີ້ອີກດ້ວຍ.