ກ່ອນອື່ນ ໃຫ້ທ່ານເຂົ້າໃຈກ່ອນວ່າ ອາຫານທາດແປ້ງ ຫຼື ຄາໂບໄຮເດຣດ ເປັນໜຶ່ງໃນອາຫານ 5 ໝວດໝູ່ ທີ່ຮ່າງກາຍຕ້ອງການໃນແຕ່ລະມື້ ຄື ເມື່ອຄາໂບໄຮເດຣດ ເຂົ້າສູ່ຮ່າງກາຍ ຮ່າງກາຍກໍຈະແປງເປັນນຳ້ຕານ ກລູໂກດ ຊຶ່ງມີໜ້າທີ່ໃຫ້ພະລັງງານແກ່ຮ່າງກາຍ ບໍ່ວ່າຈະເຮັດກິດຈະກຳໃດໆ ກໍຕາມ ທຸກກິດຈະກຳລ້ວນແລ້ວແຕ່ຕ້ອງການພະລັງງານທັງນັ້ນ. ດັ່ງນັ້ນ ຖ້າຫາກຮ່າງກາຍໄດ້ຮັບ ຄາໂບໄຮເດຣດ ບໍ່ພຽງພໍ ອາດເຮັດໃຫ້ເຮົາຂາດພະລັງງານ ໃນການເຮັດກິດຈະກຳດັ່ງກ່າວ, ຄວາມຄິດເຊື່ອງຊ້າ, ເມື່ອງ່າຍ ຫຼື ອາດເຖິງຂັ້ນຫິວ, ມືສັ່ນ, ຢາກກິນສິ່ງທີ່ຫວານໆ ຊຶ່ງຫຼາຍຄົນກໍອາດຈະມີອາການແບບນີ້ມາແລ້ວ.
ຄວາມອັນຕະລາຍຈາກການຂາດທາດແປ້ງ?
ຖ້າຫາກເຮົາບໍ່ກິນທາດແປ້ງ ຫຼື ທາດນຳ້ຕານເລີຍ ສິ່ງທີ່ຈະເກີດຂຶ້ນ ກໍຄື ຮ່າງກາຍຈະບໍ່ມີແຮງໃນການເຮັດກິດຈະກຳຕ່າງໆ, ຂາດພະລັງງານໃນການດຳລົງຊີວິດ, ຮ່າງກາຍອາດພະຍາຍາມຫາແຫຼ່ງພະລັງງານມາເຜົາຜານແທນ ຄາໂບໄຮເດຣດ ໂດຍການດຶງເອົາໄຂມັນ ແລະໂປຣຕິນມາເຜົາຜານແທນ. ແຕ່ໃນເມື່ອໄຂມັນ ແລະ ໂປຣຕິນ ເປັນໂຕທີ່ຊ່ວຍສ້າງກ້າມຊີ້ນ, ສ້າງຄວາມຊຸ່ມຊື່ນໃຫ້ແກ່ຜິວໜັງ ຖ້າຖືກນຳມາເຜົາຜານພະລັງງານແທນ ຄາໂບໄຮເດຣດ ຢູ່ເລື້ອຍໆ ກ້າມຊີ້ນກໍອາດຈະບໍ່ມີ, ຮ່າງກາຍກໍຈະຈ່ອຍ ແລະ ຜິວກໍຫ່ຽວແຫ້ງ. ນອກນີ້ ເມື່ອຮ່າງກາຍຂາດສານອາຫານທີ່ສຳຄັນໄປ ລະບົບການເຮັດວຽກພາຍໃນກໍຈະເລີ່ມປັ່ນປ່ວນ, ພູມຄຸ້ມກັນກໍເລີ່ມບົກພ່ອງ, ຕັບ, ໄຂ່ຫຼັງ, ກະເພາະອາຫານເລີ່ມເຮັດວຽກຜິດປົກກະຕິ ລວມໄປເຖິງເລືອດ, ຕ່ອມນຳ້ເຫຼືອງ ແລະ ອື່ນໆ ຊຶ່ງເປັນສາເຫດ ທີ່ພາໃຫ້ຫຼາຍໂຣກເກີດຂຶ້ນໄດ້ງ່າຍ ເພາະຮ່າງກາຍອ່ອນແອ, ເຊື້ອແບັກທີເຣຍ ແລະ ໄວຣັສ ກໍອາດເກີດຂຶ້ຍໄດ້ງ່າຍ.
ແລ້ວໃນມື້ນຶ່ງ ເຮົາຄວນກິນທາດແປ້ງ ຫຼາຍປານໃດ?
ສຳລັບຜູ້ທີ່ຢາກຫຼຸດຄວາມອ້ວນ, ຫຼຸດນຳ້ໜັກ ຢ່າງປອດໄພ, ບໍ່ເກີດໂຣກ ຈຳເປັນຕ້ອງຈຳກັດປະລິມານໃນການກິນທາດແປ້ງນັ້ນ ເປັນສິ່ງທີ່ຖືກຕ້ອງແລ້ວ ແຕ່ບໍ່ຄວນງົດກິນແບບ 100%, ຄວນກິນໃຫ້ຢູ່ໃນປະລິມານທີ່ເໝາະສົມ, ເລືອກກິນອາຫານທາດແປ້ງທີ່ມີຄຸນນະພາບ ເພື່ອໃຫ້ຮ່າງກາຍໄດ້ຮັບສານທີ່ດີມີປະໂຫຍດ ແລະ ບໍ່ກິນຫຼາຍເກີນໄປ ຈົນເຫຼືອໄປສະສົມເປັນຊັ້ນໄຂມັນໜາໆ ຕາມສ່ວນຕ່າງໆ ຂອງຮ່າງກາຍ.
ຄາໂບໄຮເດຣດ ທີ່ແນະນຳ ກໍຄື ເຂົ້າທີ່ບໍ່ຜ່ານການຂັດສີ ຫຼື ຂັດສີໜ້ອຍ ເຊັ່ນ ເຂົ້າທີ່ຕຳດ້ວຍມື, ເຂົ້າກ້ອງ, ເຂົ້າຈີ່ທີ່ບໍ່ຟອກຂາວ ເຊັ່ນ ແຊນວິດ ລວມໄປເຖິງຜັກ ແລະ ໝາກໄມ້ທີ່ມີຣົດຫວານໜ້ອຍ ແຕ່ມີໃຍອາຫານຫຼາຍ ຄື ມັນດ້າງ, ສາລີ. ແຕ່ທັງນີ້ທັງນັ້ນ ຄວນຄວບຄຸມປະລິມານບໍ່ໃຫ້ຫຼາຍເກີນຄວາມຈຳເປັນຕໍ່ຮ່າງກາຍ. ເຮົາຄວນຄິດງ່າຍໆ ຄື ໃນ 1 ຄາບ ກິນໄດ້ 1 ປັ້ນ, ກິນອາຫານໃຫ້ຄົບ 3 ຄາບ, ຄາບແລງຄວນຈະຫຼຸດແປ້ງ ແຕ່ເພີ່ມຊີ້ນ, ຜັກ ແລະ ໝາກໄມ້ເຂົ້າທົດແທນກໍໄດ້ ແຕ່ບໍ່ໃຫ້ເຖິງຂັ້ນງົດກິນແປ້ງ ແລະນຳ້ຕານເລີຍ.
ແຕ່ຖ້າຕ້ອງການທີ່ຈະຫຼຸດປະລິມານຂອງອາຫານທາດແປ້ງ ທີ່ຈະສົ່ງຜົນດີຕໍ່ຮ່າງກາຍ ຄື ການກິນນຳ້ຕານຫຼາຍເກີນໄປ ຊຶ່ງເຮົາບໍ່ຄວນກິນເກີນມື້ລະ 6 ບ່ວງກາເຟ ເພາະຮ່າງກາຍຈະນຳນຳ້ຕານໄປໃຊ້ບໍ່ທັນ ເຮັດໃຫ້ເກີດການສະສົມໄຂມັນໃນຕັບ, ເຮັດໃຫ້ຕັບອັກເສບ ແລະ ເປັນສາເຫດໜຶ່ງຂອງການເກີດຕັບແຂງໄດ້ ລວມທັງນຳ້ຕານທີ່ເກີນຈະກາຍເປັນໄຂມັນທີ່ສະສົມຢູ່ຕາມພຸງຂອງເຮົາ. ສິ່ງທີ່ຄວນຮູ້ກໍຄື ນຳ້ອັດລົມ 1 ປ໋ອງ ມີຄ່ານຳ້ຕານປະມານ 9-14 ບ່ວງກາເຟ.
ສິ່ງສຳຄັນທີ່ຄົນຕ້ອງການຢາກຫຼຸດຄວາມອ້ວນເບິ່ງຂ້າມ ກໍຄື ນອກຈາກການຄວບຄຸມປະລິມານອາຫານ ທີ່ກິນໃນແຕ່ລະມື້ແລ້ວ ເຮົາຄວນເຜົາຜານພະລັງງານທີ່ມີຢູ່ ອອກໄປດ້ວຍການອອກກຳລັງກາຍ. ດັ່ງນັ້ນ ຖ້າຕ້ອງການອອກກຳລັງກາຍ ຮ່າງກາຍຂອງເຮົາຈຶ່ງຈຳເປັນຕ້ອງມີພະລັງງານເພື່ອເຜົາຜານໄຂມັນສ່ວນເກີນນຳ.