ບິກບລູ ເອເຈນຊີ່ ຂະຫຍາຍທຸລະກິດ ຮັບ AEC ອອກຈາກລາວ-ໄທ ໄປສູ່ພູມິພາກອາຊຽນ ເລີ່ມຊິມລາງທີ່ກຸງພະນົມເປນ ປະເທດກຳປູເຈຍ ເປັນບ່ອນທຳອິດ ພ້ອມດ້ວຍປ້າຍ ບິລບອດ 2 ບ່ອນ ຢືນຢັນຄວາມພ້ອມຈັບມືກັບພັນທະມິດລາຍໃຫຍ່ ທັງລາວ, ໄທ ແລະກຳປູເຈຍ ຂະຫຍາຍພື້ນທີ່ໂຄສະນາ ປະຊາສຳພັນໃນໂລກອອນລາຍ ແລະທຸລະກິດສື່ໃໝ່ໃນພູມິພາກໄປພ້ອມກັນ.
ທ່ານ ວັນນະເລດ ພິມພະຈັນ ຜູ້ຈັດການທົ່ວໄປ ບິກບລູ ເອເຈນຊີ່ ກ່າວວ່າ: “ເຮົານັບເປັນບໍລິສັດເອເຈນຊີ່ຂອງລາວເຈົ້າແລກ ທີ່ຂະຫຍາຍຕະຫຼາດສື່ໂຄສະນານອກເຮືອນ (OOH) ແລະການວາງແຜນປະຊາສຳພັນ (PR) ໃຫ້ລູກຄ້າທີ່ຢູ່ນອກ ສປປ ລາວ. ໂດຍເຮົາຈັບມືກັບພັນທະມິດລາຍໃຫຍ່ຂອງກຳປູເຈຍ ເປັນປະເທດທຳອິດ ແລະກຳລັງເຈລະຈາກັບພັນທະມິດໃນປະເທດອື່ນໆເປັນລຳດັບຕໍ່ໄປ”.
“ສຳລັບກຳປູເຈຍເຮົາມີລູກຄ້າສອງລາຍຄືເອັດສຊີຈີແລະການບິນໄທ ເຊິ່ງໃຊ້ບໍລິການໃຫ້ເຮົາຫາປ້າຍໃນຕຳແຫນ່ງທີ່ດີທີ່ສຸດໃນພະນົມເປນໃຫ້. ພ້ອມນີ້, ຕະຫຼອດສອງສາມປີທີ່ຜ່ານມາເຮົາຕັດສິນໃຈເຂົ້າໄປສຶກສາສື່ທີ່ໃຊ້ໃນພູມິພາກອາຊຽນອີກຫລາຍປະເທດ ແລະພົບວ່າ ບິກບລູ ມີສັກກະຍະພາບຫຼາຍພໍທີ່ຈະຮອງຮັບການຂະຫຍາຍຕົວຂອງອົງກອນຂະໜາດໃຫຍ່ໃນພູມິພາກອາຊຽນ. ໃນດ້ານການເຮັດໂຄສະນາປະຊາສຳພັນຜ່ານສື່ ທັງອອບລາຍແລະອອນລາຍ ເຊິ່ງມີຄວາມຫຼາກຫຼາຍ ແລະແຕກຕ່າງກັນໄປໃນແຕ່ລະປະ ເທດ” ທ່ານ ວັນນະເລດ ກ່າວ.
ບໍ່ພຽງແຕ່ຂະຫຍາຍໂຕໄປຍັງປະເທດເພື່ອນບ້ານໃນກຸ່ມ AEC ເທົ່ານັ້ນ, ບິກບລູ ຍັງເພີ່ມຕົວເລືອກສື່ຮູບແບບໃຫມ່ໆ ໃນ ສປປ ລາວ ເພື່ອຕອບສະໜອງຄວາມຕ້ອງການຂອງທຸລະກິດຫຼາກຫຼາຍຂະໜາດຫຼາຍຂຶ້ນເຊັ່ນ: ປ້າຍໂຄສະນາຂະໜາດກາງໃນປໍ້ານໍ້າມັນ ປຕທ ແລະການຈັດແຄມເປນທີ່ໃຊ້ສື່ດິຈິຕອນໃນການປະຊາສຳພັນເພື່ອໃຫ້ເຂົ້າເຖິງຄົນຮຸ່ນໃຫມ່ໃນ ສປປ ລາວ ໄດ້ຢ່າງແນ່ນອນແລະຊັດເຈນອີກດ້ວຍ.
