ການຮັບປະທານອາຫານ ແມ່ນຂຶ້ນຢູ່ກັບຄວາມມັກຂອງໃຜລາວ ແຕ່ອາຫານບາງຊະນິດທີ່ເຮົາມັກນັ້ນ ອາດເປັນອັນຕະລາຍຕໍ່ສຸຂະພາບຂອງເຮົາໄດ້ ເມື່ອຮັບປະທານຫຼາຍຈົນເກີນໄປ ດັ່ງນັ້ນ ທາງທີ່ດີແມ່ນຄວນກິນໃນປະລິມານທີ່ພໍດີເພື່ອສຸຂະພາບຂອງເຮົາເອງ. ຕໍ່ໄປນີ້ແມ່ນອາຫານທີ່ເຮົາບໍ່ຄວນກິນຫຼາຍເກີນໄປ.
- ໄຂ່ຍ່ຽວມ້າ: ໄຂ່ຍ່ຽວມ້າມີສ່ວນປະກອບຂອງສານຕະກົ່ວ ການກິນໄຂ່ຍ່ຽວມ້າປະລິມານຫຼາຍໆ ແລະກິນເລື້ອຍໆ ອາດເກີດພິດຈາກສານຕະກົ່ວ. ນອກນັ້ນ ຍັງເຮັດໃຫ້ການດູດຊຶມແຄວຊຽມຫຼຸດໜ້ອຍລົງ, ເກີດພາວະຂາດແຄວຊຽມ ແລະເຮັດໃຫ້ກະດູກຜ່ອຍໄດ້.
- ເຂົ້າໜົມຄູ່: ຂະບວນການເຮັດເຂົ້າໜົມຄູ່ມີການໃຊ້ສານສົ້ມເປັນສ່ວນປະກອບ ແລະໃນສານສົ້ມມີສ່ວນປະກອບຂອງສານຕະກົ່ວ, ການກິນເຂົ້າໜົມຄູ່ທຸກມື້ຈະເຮັດໃຫ້ໄຂ່ຫຼັງເຮັດວຽກໜັກໃນການຂັບສານຕະກົ່ວ ຊຶ່ງເປັນພິດຕໍ່ສະໝອງ ແລະ ຈຸລັງປະສາດ, ເຮັດໃຫ້ເສື່ອມໄວ, ເປັນໂຣກຄວາມຈຳເສື່ອມ ນອກຈາກນີ້ຍັງເຮັດໃຫ້ຄໍແຫ້ງ, ເຈັບຄໍ ໂດຍສະເພາະຄົນທີ່ມີອາການຮ້ອນໃນງ່າຍ.
- ຊີ້ນປີ້ງ: ຊີ້ນປະເພດຕ່າງໆທີ່ຖືກຄວັນເປັນຕົ້ນແມ່ນໄຟ ຈະເກີດສານເບນໂຊໄພຣິນ ຊຶ່ງເປັນສານກໍ່ມະເຮັງຊະນິດນຶ່ງ.
- ຜັກດອງ: ການກິນຜັກດອງ ຫຼື ຂອງໝັກໃສ່ເກືອເປັນເວລາດົນ ຈະເກີດການສະສົມຂອງທາດເກືອ ເຮັດໃຫ້ຫົວໃຈເຮັດວຽກໜັກ, ເກີດໂຣກຄວາມດັນເລືອດສູງ ແລະໂຣກຫົວໃຈໄດ້ງ່າຍ. ນອກຈາກຂອງໝັກຂອງດອງແລ້ວ ຍັງມີສານກໍ່ມະເຮັງ ແລະແອມໂມນຽມໄນໄຕຣ.
- ຕັບໝູ: ໃນຕັບໝູ 1 ກິໂລ ມີຄໍເລດສະເຕີຣອນຫຼາຍກວ່າ 400 ມີລີກຣາມ, ການກິນອາຫານທີ່ມີຄໍເລດສະເຕີຣອນປະລິມານສູງຫຼາຍເປັນເວລາດົນຈະເຮັດໃຫ້ຫຼອດເລືອດແຂງໂຕ, ມີຄວາມສ່ຽງຕໍ່ໂຣກຫົວໃຈ ແລະໂຣກຫຼອດເລືອດທາງສະໝອງລວມເຖິງໂຣກມະເຮັງອີກດ້ວຍ.
- ຜັກຫົມ, ຜັກປວຍເລ້ງ: ມີສານອາຫານອຸດົມສົມບູນ ແຕ່ມີກົດອອກຊາເລດຫຼາຍ ຈະເຮັດໃຫ້ມີການຂັບສັງກະສີ ແລະແຄວຊຽມອອກຈາກຮ່າງກາຍຫຼາຍ, ເກີດພາວະຂາດແຄນແຄວຊຽມ ແລະສັງກະສີ.
- ໝີ່ສຳເລັດຮູບ: ໝີ່ຫຼາຍຊະນິດມີສານກັນບູດ, ສານປຸງແຕ່ງຣົດທີ່ບໍ່ມີປະໂຫຍດຕໍ່ຮ່າງກາຍ. ການກິນໝີ່ສຳເລັດຮູບເລື້ອຍໆຈະເຮັດໃຫ້ຂາດສານອາຫານ ແລະເກີດການສະສົມສານພິດໃນຮ່າງກາຍ.
- ແກ່ນຕາເວັນ: ມີສ່ວນປະກອບຂອງກົດໄຂມັນບໍ່ອີ່ມໂຕ, ການກິນແກ່ນຕາເວັນໃນປະລິມານຫຼາຍ ຈະເຮັດໃຫ້ລະບົບເມຕາບໍລິຊຶມ ຂອງໄຂມັນຜິດປົກກະຕິ ເຮັດໃຫ້ມີການສະສົມໄຂມັນທີ່ຕັບ ແລະໄຂ່ຫຼັງ; ເປັນອັນຕະລາຍຕໍ່ອະໄວຍະວະອີກດ້ວຍ.
- ເຕົ້າຮູ້ໝັກ, ເຕົ້າຮູ້ຕ່ອນ: ຂະບວນການໝັກເຕົ້າຮູ້ ມີໂອກາດປົນເປື້ອນເຊື້ອໂຣກໄດ້ງ່າຍ ນອກຈາກນີ້ຍັງມີສານຍ່ອຍສະຫຼາຍໂປຣຕິນ, ໄຮໂດຣເຈນຊັນໄຟ ຊຶ່ງເປັນອັນຕະລາຍຕໍ່ຮ່າງກາຍ.
- ແປ້ງນົວ: ຄົນເຮົາບໍ່ຄວນກິນແປ້ງນົວເກີນກວ່າ 6 ກຣາມຕໍ່ມື້ ເພາະຈະເຮັດໃຫ້ກົດກລູຕາມິກໃນເລືອດສູງ ຊຶ່ງມີຜົນຕໍ່ການເຮັດວຽກຂອງແຄວຊຽມ ແລະແມັກນີຊຽມ, ເກີດອາການເຈັບຫົວ, ໃຈສັ່ນ ແລະປຸ້ນທ້ອງ. ນອກຈາກນີ້ ຍັງມີຜົນເສຍຕໍ່ອະໄວຍະວະສືບພັນອີກດ້ວຍ.