ພິທີເຊັນບົດບັນທຶກການຮ່ວມມື ສຶກສາຄວາມເປັນໄປໄດ້ທາງທຸລະກິດ ແລະ ພິທີເຊັນສັນຍາ ການຊໍາລະຄ່າໄຟຟ້າທົ່ວປະເທດຜ່ານ M-Money Application ລະຫວ່າງ ກຸ່ມບໍລິສັດ ລາວໂທລະຄົມມະນາຄົມ ມະຫາຊົນ (ລລທ) ລົງນາມໂດຍແມ່ນ ທ່ານ ອາລຸນນະເດດ ບານຈິດ ຮອງຜູ້ອໍານວຍການໃຫຍ່ ແລະ ລັດວິສາຫະກິດ ໄຟຟ້າລາວ (ຟຟລ) ລົງນາມໂດຍ ທ່ານ ວິລະພອນ ວິຊຸນນະລາດ ຮອງຜູ້ອໍານວຍການໃຫຍ່
ການຮ່ວມມືກັນສຶກສາຄວາມເປັນໄປໄດ້ທາງທຸລະກິດໃນຄັ້ງນີ້ ປະກອບດ້ວຍໜ້າວຽກດັ່ງຕໍ່ໄປນີ້:
- ການສ້າງບົດວິພາກ ເສດຖະກິດ-ເຕັກນິກ ກ່ຽວກັບ ແຜນການດໍາເນີນທຸລະກິດ ໄລຍະສັ້ນ, ກາງ ແລະ ໄລຍະຍາວ ໂດຍນຳໃຊ້ໂຄງຂ່າຍລະບົບສາຍໄຍແກ້ວ OPGW ຂອງ ຟຟລ ໃນຂອບເຂດທົ່ວປະເທດ ເພື່ອໃຫ້ບໍລິການລູກຄ້າທັງພາຍໃນ ແລະ ຕ່າງປະເທດ.
- ສຶກສາການນໍາໃຊ້ເຕັກໂນໂລຊີ ຂອງ ລາວໂທລະຄົມ ເພື່ອສົ່ງຂໍ້ຄວາມສັ້ນ (SMS) ໃນການເເຈ້ງເຕືອນໄຟມອດ ຫຼື ເເຈ້ງຂ່າວສານຂໍ້ມູນຕ່າງໆ ໃຫ້ຜູ້ຊົມໃຊ້ໄຟຟ້າ ແລະ ສຶກສາ Package internet ມານໍາໃຊ້ໃນໝໍ້ນັບໄຟທັນສະໄໝ ແລະ ສໍາລັບໃຊ້ກັບອົງກອນ.
- ສຶກສາການນໍາໃຊ້ພື້ນຖານໂຄງລ່າງ ຂອງ ຟຟລ ທີ່ສາມາດໃຊ້ຮ່ວມກັບ ລລທ ໃນການຂະຫຍາຍອຸປະກອນ ຮັບ-ສົ່ງສັນຍານໂທລະຄົມ ແລະ ສຶກສາການນໍາໃຊ້ສາຍໄຍແກ້ວ ຂອງ ຟຟລ ທີ່ມີຢັ່ງຢາຍຢູ່ໃນນະຄອນຫຼວງ ເພືີ່ອໃຫ້ບໍລິການອິນເຕີເນັດ ຄວາມໄວສູງແກ່ສັງຄົມ.
- ຄົ້ນຄວ້າວິທີການເກັບມ້ຽນສາຍເກາະຫ້ອຍເສົາໄຟຟ້າ ຂອງ ບັນດາບໍລິສັດ ໂທລະຄົມຕ່າງໆ ຢູ່ຕາມເສົາໄຟຟ້າ ໃຫ້ມີຄວາມເປັນລະບຽບຮຽບຮ້ອຍ.
- ສຶກສາຄວາມເປັນໄປໄດ້ຂອງການສ້າງລະບົບ Billing, ແລກປ່ຽນ ແລະ ຄົ້ນຄ້ວາ ການປະຕິບັດງານຂອງ ລະບົບສູນຄວບຄຸມເຄືອຂ່າຍ ຂອງ ລາວໂທລະຄົມ (Network Operation Center = NOC) ເພື່ອມາຮ່ວມມືໃນການນໍາໃຊ້ຮ່ວມກັບ ຟຟລ ແລະ ແລກປ່ຽນການຮ່ວມມື Call Center – ການປະຊາສໍາພັນລູກຄ້າ.
- ສຶກສາຄວາມເປັນໄປໄດ້ ໃນການສ້າງສະຖານີສາກລົດໄຟຟ້າ (EV Charging Station).
- ແລກປ່ຽນບົດຮຽນຂອງສູນຮຽນຮູ້ Learning Centers ຂອງ ລລທ, ແລກປ່ຽນວັດທະນະທໍາອົງກອນ ແລະ ການຝຶກອົບຮົມ ພັດທະນາບຸກຄະລາກອນດ້ານຕ່າງໆ ຂອງທັງສອງຝ່າຍ ເຊັ່ນ: ດ້ານການບໍາລຸງຮັກສາ ແລະ ສ້ອມແປງລະບົບໂຄງຂ່າຍ, ດ້ານການເງິນ ແລະ ການບັນຊີ ຂອງ ລະບົບ SAP (Sytstem Application and Products).
ນອກຈາກ ການຮ່ວມມືສຶກສາຄວາມເປັນໄປໄດ້ທາງທຸລະກິດ ທີ່່ໄດ້ກ່າວມາຂ້າງເທິງແລ້ວ ໂດຍອີງໃສ່ທ່າແຮງ ຂອງ ບໍລິສັດ ລາວໂມບາຍມັນນີ ຈໍາກັດຜູ້ດຽວ ທີ່ເປັນບໍລິສັດໃນເຄືອ ຂອງ ບໍລິສັດ ລາວໂທລະຄົມມະນາຄົມ ມະຫາຊົນ, ລັດວິສາຫະກິດໄຟຟ້າລາວແມ່ນເຫັນດີ ເຊື່ອມຕໍ່ລະບົບການຊໍາລະສະສາງຄ່າໄຟຟ້າ ແລະ ຄ່າບໍລິການອື່ນໆ ຂອງ ຟຟລ ຜ່ານບໍລິການ ກະເປົາເງີນເອເລັກໂຕຣນິກ (Mobile Wallet) M-Money ແລະ ການເຊື່ອມຕໍ່ M-Money App ກັບ EDL App ເພື່ອເປັນການອຳນວຍຄວາມສະດວກ ໃນການຊຳລະຄ່າໄຟຟ້າໃຫ້ແກ່ຜູ້ໃຊ້ບໍລິການໃນທົ່ວປະເທດ.
ຂໍ້ມູນຈາກ: Lao Telecom