ພິທີເຊັນສັນຍາໃຫ້ການຊ່ວຍເຫຼືອລ້າ ໂຄງການເບິ່ງແຍງສຸຂະພາບເດັກນ້ອຍລາວຢູ່ແຂວງຫົວພັນ ເປັນຈໍານວນເງິນ 281.222 ໂດລາສະຫະລັດ (ປະມານ 2,40 ຕື້ກີບ) ຈັດຂຶ້ນຢູ່ສະຖານທູດຍີ່ປຸ່ນ ລະຫວ່າງ ທ່ານ ຄູໂນະ ຄາຊູຮີໂຣະ ອຸປະທູດຍີ່ປຸ່ນ ປະຈໍາລາວ ແລະ ທ່ານນາງ ຢູໂກະ ໂຢເນດະ ຜູ້ດໍາເນີນໂຄງການຂອງອົງການແພດຍີ່ປຸ່ນ (MdMJ) ໂດຍມີທ່ານ ພູໂຊນ ທໍາມະວິໄຊ ຮອງເຈົ້າແຂວງຫົວພັນ ແລະ ພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.
ໂຄງການສ້າງຄວາມເຂັ້ມແຂງໃຫ້ລະບົບການຮັກສາສຸຂະພາບເດັກນ້ອຍຢູແຂວງຫົວພັນ ໂດຍຜ່ານການສ້າງຄວາມສາມາດໃຫ້ພະນັກງານຢູ່ໂຮງໝໍເມືອງ ສຸກສາລາ ແລະ ຄະນະກໍາມະການຮັກສາສຸຂະພາບຂັ້ນບ້ານດັ່ງກ່າວ ຈະດໍາເນີນເປັນໄລຍະທີ 3 ມີເປົ້າໝາຍທີ່ຈະຫຼຸດຜ່ອນອັດຕາການເສຍຊີວິດຂອງເດັກນ້ອຍທີ່ມີອາຍຸຕໍ່າກວ່າ 5 ປີ ທີ່ເມືອງຊ່ອນ ແລະ ເມືອງຫົວເມືອງ ໃນການພັດທະນາລະບົບບໍລິການຮັກສາສຸຂະພາບເດັກນ້ອຍຢູ່ສຸກສາລາ ແລະ ການເສີມຂະຫຍາຍຄວາມເຂົ້າໃຈກ່ຽວກັບສຸຂະພາບຂອງເດັກນ້ອຍ ໃຫ້ກັບຄົນໃນກຸ່ມບ້ານໂດຍຜ່ານກິດຈະກໍາສົ່ງເສີມການຮັກສາສຸຂະພາບທີ່ຈັດຂຶ້ນ ໂດຍຄະນະກໍາມະການຮັກສາສຸຂະພາບຂັ້ນບ້ານ.
ນອກຈາກນີ້ ອົງການແພດໂລກຍີ່ປຸ່ນ ຍັງໄດ້ໃຫ້ການຊ່ວຍເຫຼືອກຸ່ມບ້ານທີ່ໄດ້ຮັບຜົນກະທົບຈາກອຸທົກກະໄພ ໃນປີ 2018 ຮ່ວມກັບການນໍາແຂວງຫົວພັນ ແລະ ຂັ້ນເມືອງອີກດ້ວຍ. ນັບຕັ້ງແຕ່ປີ 2012 ຫາ 2015 ອົງການແພດໂລກຍີ່ປຸ່ນ ຍັງເຄີຍໄດ້ຮ່ວມມືກັບອົງການແພດໂລກຝຣັ່ງ ດໍາເນີນໂຄງການສຸຂະພາບແມ່ ແລະ ເດັກ ຢູ່ແຂວງຈໍາປາສັກ ໂດຍເປັນຄັ້ງທໍາອິດທີ່ມີການບໍລິການທາງແພດ ໂດຍບໍ່ເສຍຄ່າໃຊ້ຈ່າຍໃຫ້ແກ່ແມ່ ແລະ ເດັກນ້ອຍທີ່ມີອາຍຸຕໍ່າກວ່າ 5 ປີ.
ທີ່ມາ: ວຽງຈັນໃໝ່