ສູນຂ່າວສານການແພດສຸຂະສຶກສາ Centre of Information and Education for Health ໄດ້ໃຫ້ຮູ້ວ່າ: ຈໍານວນຜູ້ຕິດເຊື້ອລວມທັງໝົດປະຈຳເດືອນ ທັນວາ 2022 ນັບຕັ້ງແຕ່ວັນທີ 1-30 ທັນວາ 2022 ມີຜູ້ຕິດເຊື້ອໃຫມ່ລວມທັງໝົດເຖິງ 1.101 ຄົນ, ມີຜູ້ຕິດເຊື້ອສະສົມທັງໝົດ 217.794 ຄົນ ແລະ ມີຜູ້ເສຍຊີວິດສະສົມທັງໝົດ 670 ຄົນ.
ເມື່ອທຽບໃສ່ເດືອນພະຈິກທີ່ຜ່ານມາ ຈະເຫັນໄດ້ວ່າ ຍອດຜູ້ຕິດເຊື້ອລວມປະຈຳເດືອນຢູ່ໃນ ສປປ ລາວ ຍັງເພີ່ມຂຶ້ນຫຼາຍເຖິງ 2 ເທົ່າ ແລະ ກໍມີຜູ້ເສຍຊີວິດສະສົມເພີ່ມ 5 ຄົນ, ການເພີ່ມຂຶ້ນຂອງຜູ້ຕິດເຊື້ອບໍ່ໄດ້ເກີດຂຶ້ນແຕ່ໃນບ້ານເຮົາ ເພາະໃນທ້າຍເດືອນທັນວາ 2022 ທີ່ຜ່ານມາ ມີສາ່ຍການບິນຈາກຈີນໄປອີຕາລີ ກໍພົບຜູ້ຕິດເຊືິ້ອໂຄວິດ-19 ເພີ່ມຂຶ້ນເປັນຈໍານວນຫຼາຍ ໃນສາຍການບິນທຳອິດມີທັງໝົດ 92 ຄົນ ມີຜົນບວນ 35 ຄົນ ແລະ ສາຍການບິນທີສອງມີທັງໝົດ 120 ຄົນ ມີຜົນເປັນບວກ 62 ຄົນ.
ເຖິງຢ່າງໃດກໍຕາມ ກົມກວດຄົນເຂົ້າເມືອງແຫ່ງຊາດຂອງຈີນ ຍັງໄດ້ໃຫ້ຮູ້ອີກວ່າ ໃນວັນທີ 8 ມັງກອນ 2023 ຈະເລີ່ມເຮັດໜັງສືເດີນທາງສຳລັບຜູ້ທີ່ຈະເດີນທາງໄປຕ່າງປະເທດໃຫ້ກັບປະຊາຊົນ ລວມໄປເຖິງອອກໜັງສືຮັບຮອງໃຫ້ນັກທ່ອງທ່ຽວ ແລະ ນັກທຸລະກິດໃຫ້ສາມາດໄປທີ່ປະເທດຈີນໄດ້.
ຈາກຂໍ້ມູນທີ່ກ່າວມາຂ້າງເທິງຈະຫັນໄດ້ວ່າ ຍັງມີເປີເຊັນທີ່ຜູ້ຕິດເຊື້ອອາດຈະມີເພີ່ມຂຶ້ນ ເມື່ອມີນັກທ່ອງທ່ຽວຈາກຈີນເຂົ້າມາທີ່ ສປປ ລາວ ເຊິ່ງປະເທດເຮົາເອງກໍຍັງບໍ່ມີມາດຕະການໃນການຮັບມືຢ່າງສະເພາະເຈາະຈົງໃນການປ້ອງກັນໂຄວິດ-19 ແລະ ການຄັດກອງຄົນທີ່ຈະເດີນທາງມາທ່ອງທ່ຽວ, ເພາະ ສປປ ລາວ ເຮົາຫາກໍປະກາດເຫັນດີໃຫ້ລົບລ້າງການຢັ້ງຢືນການນໍາໃຊ້ໃບຢັ້ງຢືນສັກວັກຊີນຄົບໂດສ ແລະ ລົບລ້າງການກວດຫາເຊື້ອໂຄວິດ-19 ດ້ວຍເຄື່ອງກວດແບບໄວ (ATK) ພາຍໃນ 48 ຊົ່ວໂມງ ຕາມແຈ້ງການຈາກ ຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 1914/ຫສນຍ ລົງວັນທີ 23 ທັນວາ 2022.