ແມ່ຍິງລາວໃນປະຈຸບັນແມ່ນມີບົດບາດສູງໃນຫລາຍໆຂົງເຂດເປັນຕົ້ນແມ່ນ: ດ້ານເມືອງ, ເສດຖະກິດ-ສັງຄົມ, ການປົກປັກຮັກສາສິ່ງແວດລ້ອມ, ການປ້ອງກັນຊາດ-ປ້ອງກັນຄວາມສະຫງົບ, ການຕ່າງປະເທດ, ການອະນຸລັກຮັກສາເສີມຂະຫຍາຍມູນເຊື້ອວັດທະນະທຳອັນດີງາມຂອງຊາດ ແລະ ໃນປະຈຸບັນນີ້ກໍມີແມ່ຍິງລາວທີ່ປະສົບຜົນສຳເລັດໃນດ້ານທຸລະກິດຫລາຍໆທ່ານ.
ໃນງານທ໊ອບໄທແບຣນ ປີນີ້, ແມ່ຍິງລາວກໍຍັງມີບົດບາດໃນຫລາຍໆພາກສ່ວນ ແລະ ຫນຶ່ງໃນນັ້ນກໍແມ່ນກຸ່ມແມ່ຍິງຈາກ ໂຮງຮຽນ ວັດທະນະທຳ ແລະ ເດັກກຳພ້າ ຫລັກ 67 ເຊິ່ງເປັນໂຮງຮຽນທີ່ໄດ້ຮັບການຊ່ວຍເຫຼືອຈາກ ສົມເດັດພະເທບ ພະຣັດຣາຊະສຸດາ ສະຫຍາມບໍຣົມຣາຊະກຸມາຣີ ແຫ່ງ ຣາຊະອານາຈັກໄທ ທີ່ໄດ້ນຳເອົາຜະລິນຕະພັນຂອງຕົນເອງມາວາງສະແດງໃນງານ ເຊັ່ນ: ກະຕິບເຂົ້າ, ກະຕ່າ, ຂັນໃສ່ບາດ ແລະ ອື່ນໆ.
ທ່ານ ນາງອາດອຳໄພ ຮອງຫົວຫນ້າຄະນະແມ່ຍິງຂອງໂຮງຮຽນໄດ້ເລົ່າໃຫ້ເຮົາຟັງວ່າ: ຜະລິດຕະພັນເຄື່ອງຫັດຖະກຳຈັກສານຂອງກຸ່ມພວກເຮົາແມ່ນສ່ວນໜຶ່ງ ທີ່ນັກຮຽນພາຍໃນໂຮງຮຽນໃຊ້ເວລາຫວ່າງໃຫ້ເປັນປະໂຫຍດໂດຍຜະລິດເຄື່ອງຫັດຖະກຳ ເພື່ອກຽມສົ່ງອອກຂາຍ ແລະ ອີກສ່ວນໜຶ່ງແມ່ນໄດ້ຮັບຊື້ຈາກປະຊາຊົນພາຍໃນບ້ານ ນາຍາງ ເມືອງໂພນໂຮງ ແຂວງວຽງຈັນ ເພື່ອເຮັດໃຫ້ເຂົາເຈົ້າມີລາຍຮັບເພີ່ມຂຶ້ນ ແລະ ເງິນທີ່ໄດ້ຈາກການຂາຍເຄື່ອງແມ່ນຈະເອົາກັບໄປໃຊ້ໃນວຽກງານບໍລິຫານໂຮງຮຽນ.
ບັນຍາກາດພາຍໃນງານ ທ໊ອບໄທແບຣນ ແມ່ນມີຄວາມຄຶກຄື້ນຫລາຍພໍສົມຄວນ ເຊິ່ງຫົວຫນ້າຄອບຄົວຈະພາ ພັນລະຍາ ແລະ ລູກ ອອກມາທ່ຽວຊົມງານ ບາງທ່ານກໍໄດ້ພາແມ່ ພາພໍ່ ອອກມາທ່ຽວໃນມື້ພັກຜ່ອນແບບນີ້.