ຫລັງເກີດເຫດໄຟໄໝ້ປ່າສະຫງວນແຫ່ງຊາດພູພະນັງ ເມືອງສັງທອງ ນະຄອນຫລວງວຽງຈັນແຕ່ວັນທີ 7 ມີນາເປັນຕົ້ນມາ, ອົງການປົກຄອງເມືອງສັງທອງ ແລະ ພາກສ່ວນກ່ຽວຂ້ອງໂດຍສະເພາະກຳລັງ ປກສ, ປກຊ ແລະ ພໍ່ແມ່ປະຊາຊົນເຂດໃກ້ຄຽງ ໄດ້ຮ່ວມກັນມອດໄຟຢ່າງເປັນເຈົ້າການ, ຂະນະທີ່ມາຮອດວັນທີ 12 ເດືອນດຽວກັນສາມາດຄວບຄຸມໄຟໄດ້ແລ້ວ 90%.
ຮ້ອຍເອກ ອຳຫລ້າ ສິງສະໄໝ ຫົວໜ້າການເມືອງກອງຮ້ອຍທະຫານຮາບ 303 ກ່າວວ່າ: ສາເຫດຕົ້ນຕໍຂອງການເກີດໄຟໄໝ້ລາມປ່າດັ່ງກ່າວ ແມ່ນຍ້ອນປະຊາຊົນຈຳນວນໜຶ່ງຈູດສວນ, ໄຮ່ ແລະ ເຂົ້າໄປທຳມາຫາກິນຂາດສະຕິ ລະມັດລະວັງ ໂດຍສະເພາະກ່ອນຈູດສວນ, ໄຮ່ ບໍ່ໄດ້ແກວກ ຫລື ເຮັດແລວປ້ອງກັນໄຟບໍ່ກວ້າງ ແລະ ບໍ່ມອດ
ໄຟຫລັງແຕ່ງຢູ່ຄົວກິນໃນປ່າ. ຂະນະທີ່ໄຟໄໝ້ສະເພາະປ່າສະຫງວນແຫ່ງຊາດພູພະນັງມີສອງຈຸດຄື: ປ່າສະຫງວນພູພະນັງເຂດບ້ານເພຍລາດ, ບ້ານທ່ານາຂາມ 20 ເຮັກຕາ; ປ່າສະຫງວນພູພະນັງເຂດບ້ານຫີນສິ່ວ, ບ້ານໄຮ່ໃຕ້ 10 ເຮັກຕາ. ນອກນີ້, ຍັງໄໝ້ພູຜາເດືອນເຂດບ້ານຫີນສິ່ວ, ບ້ານເພຍລາດ 30 ເຮັກຕາ, ດອນຫໍບ້ານອ່າງນ້ອຍ 15 ເຮັກຕາ, ບ້ານຊໍ້ 10 ເຮັກຕາ ແລະ ບ້ານຫ້ວຍຫາງ 10 ເຮັກຕາ.
ຮ້ອຍເອກ ອຳຫລ້າ ຍັງກ່າວຕື່ມວ່າ: ດ້ວຍຄວາມເອົາໃຈໃສ່ຂອງຫລາຍພາກສ່ວນໃນການສະກັດກັ້ນແຕ່ຫົວທີ ນັ້ນມາຮອດປັດຈຸບັນ ສາມາດດັບມອດໄຟລາມປ່າເຂດດັ່ງກ່າວໄດ້ແລ້ວ 90%, ແຕ່ກໍເຫລືອພຽງແຕ່ຕໍໄມ້ໄໝ້ເທົ່ານັ້ນທີ່ບໍ່ສາມາດເອົານ້ຳຂຶ້ນໄປຫົດໄດ້.
ແນວໃດກໍ່ຕາມຂໍຮຽກຮ້ອງພໍ່ແມ່ປະຊາຊົນຈົ່ງມີສະຕິລະມັດລະວັງການໃຊ້ຟືນໄຟໃນການທຳມາຫາກິນ ແລະ ກໍຄືການຈູດໄຮ່, ສວນ ເຊິ່ງຕ້ອງໄດ້ປ້ອງກັນຢ່າງປອດໄພເພື່ອບໍ່ໃຫ້ເກີດໄຟໄໝ້ລາມປ່າທີ່ສົ່ງຜົນກະທົບສ້າງຄວາມເສຍຫາຍຕໍ່ສິ່ງແວດລ້ອມກໍຄືລະບົບນະເວດວິທະຍາ.
ທີ່ມາ: ຂປລ