ການຈັດຕັ້ງປະຕິບັດການເກັບລາຍຮັບເຂົ້າງົບປະມານລັດຂອງດ່ານສາກົນວັງເຕົ່າໃນ 3 ເດືອນຕົ້ນປີຖືວ່າເປັນວ່າການຈັດຕັ້ງປະຕິບັດຢ່າງເຂັ້ມແຂງ ແລະມີປະສິດທິພາບສູງຕໍ່ວຽກງານດັ່ງກ່າວຊຶ່ງສາມາດປະຕິບັດໄດ້ເກີນແຜນການທີ່ວາງໄວພ້ອມຈະສູ້ຊົນເຮັດໃຫ້ການຈັດເກັບລາຍຮັບໝົດປີບັນລຸໄດ້ 658 ກວ່າຕື້ກີບ.
ທ່ານ ສຸດໃຈ ຊາຕາກຸນ ຮັກສາການຫົວໜ້າດ່ານສາກົນວັງເຕົ່າ ເມືອງໂພນທອງ ແຂວງຈໍາປາສັກ ໄດ້ໃຫ້ສໍາພາດຕໍ່ນັກຂ່າວໜັງສືພິມເສດຖະກິດ-ສັງຄົມ ປະຈໍາແຂວງເມື່ອບໍ່ດົນມານີ້ໃຫ້ຮູ້ວ່າ: ເຖິງແມ່ນວ່າການຈັດຕັ້ງປະຕິບັດວຽກງານວິຊາສະເພາະໃນການຈັດເກັບລາຍຮັບເຂົ້າງົບປະມານລັດປີນີ້ຂອງດ່ານສາ ກົນວັງເຕົ່າຈະມີຫຼາຍສິນຄ້າທີ່ເຄີຍສ້າງລາຍຮັບໄດ້ສູງໄດ້ມີການຢຸດການນໍາເຂົ້າເນື່ອງຈາກສິນຄ້າເຫຼົ່ານັ້ນຢູ່ພາຍໃນປະເທດສະມາດຕອບສະໜອງໄດ້ເຮັດໃຫ້ຂະບວນການນໍາເຂົ້າບໍ່ຄ່ອຍຈະມີບັນຍາກາດຄືກຄື້ນຄືກັບປີຜ່ານມາ, ແຕ່ເຖິງຢ່າງໃດກໍ່ຕາມດ່ານສາກົນວັງເຕົ່າຂອງພວກເຮົາກໍ່ສູ້ຊົນຈັດຕັ້ງປະຕິບັດວຽກ ງານດັ່ງກ່າວຢ່າງເຂັ້ມແຂວງ ແລະມີຄວາມຮັດກຸມຫຼາຍຂຶ້ນເພື່ອປະຕິບັດຕາມແຜນປີໃນການຈັດເກັບລາຍຮັບເຂົ້າງົບປະມານໃຫ້ບັນລຸຄາດໝາຍທີ່ວາງໄວ້ຄື 658 ກວ່າຕື້ກີບ, ຊຶ່ງຜ່ານການຈັດຕັ້ງປະຕິບັດໄຕມາດ I ສາມເດືອນຕົ້ນປີ 2019 ດ່ານສາກົນວັງເຕົ່າສາມາດຈັດເກັບລາຍຮັບໄດ້ແລ້ວ 167 ກວ່າຕື້ກີບ, ທຽບໃສ່ແຜນການປະຕິບັດໄດ້ກວ່າ 100% ແລະທຽບໃສ່ແຜນການປີປະຕິບັດໄດ້ກວ່າ 25%, ຊຶ່ງລາຍຮັບສ່ວນໃຫຍ່ແມ່ນໄດ້ຈາກການນໍາເຂົ້ານໍ້າມັນເຊື້ອໄຟ, ນໍາເຂົ້າພາຫະນະ ແລະສິນຄ້າອື່ນໆ…ອີກຈໍານວນໜຶ່ງ.
ສໍາລັບວັກງານການຈັດເກັບລາຍຮັບເຂົ້າງົບປະມານລັດໃນ 9 ເດືອນທີ່ຍັງຂອງປີ 2019 ພວກເຮົາແມ່ນຈະໄດ້ສູ້ຊົນຈັດຕັ້ງປະຕິບັດຢ່າງຕັ້ງໜ້າເພື່ອເຮັດໃຫ້ຕົວເລກຄາດໝາຍບັນລຸຕາມເປົ້າເຖິງແມ່ນວ່າປີນີ້ແຫຼ່ງລາຍຮັບສິນຄ້າທີ່ເຄີຍສ້າງລາຍຮັບໃນປີຜ່ານມາໄດ້ມີການຢຸດການນໍາເຂົ້າຈາກຕ່າງປະເທດທີ່ເປັນຜະລິດຕະພັນກໍ່ຄືສິນຄ້າທີ່ທາງພາຍປະເທດໃນສະໜອງໄດ້ແຕ່ພວກກໍ່ຈະພະຍາຍາມເຮັດການຈັດເກັບລາຍຮັບບັນຕາມຄາດໝາຍຄື 658 ກວ່າຕື້ກີບ.
ຮຽບຮຽງຈາກ: ເສດຖະກິດ-ສັງຄົມ