ທ່ານ ຄຳເຫລັກ ໃຈອີສານ ຫົວໜ້າພະແນກ ແຜນການ-ການລົງທຶນ ແຂວງຜົ້ງສາລີ ພ້ອມຄະນະ ​ໄດ້ຕ້ອນຮັບ ​ແລະ ພົບ​ປະ​ກັບ ກຸ່ມບໍລິສັດຢຸນນານຈຳກັດ ສປ ຈີນ ນຳໂດຍ ທ່ານ ຕີ ເວີນ ພ້ອມບັນດາ ຜູ້ອຳນວຍການ ສາຂາຂອງບໍລິສັດ ແລະ ຊ່ຽວຊານກ່ຽວຂ້ອງ ເພື່ອສຶກສາ ການລົງທຶນ ຢູ່​ແຂວງ​ຜົ້ງ​ສາລີ ທັງນີ້ ກໍເພື່ອດຶງດູດກຸ່ມບໍລິສັດ ຢຸນນານ ຈຳກັດ ສປ ຈີນ ເຂົ້າມາລົງທຶນປູກພືດ ທົດແທນ ການປູກຝິ່ນ ຢູ່ແຂວງຜົ່ງສາລີ, ທັງ​ເປັນ​ການ ສ້າງວຽກເຮັດ ງານທຳ, ສ້າງອາຊີບຄົງທີ່ ໃຫ້ແກ່ປະຊາຊົນ ໃນຊົນນະບົດ ໃຫ້ຫລຸດພົ້ນ ອອກຈາກ ຄວາມທຸກຍາກ ເທື່ອລະກ້າວ.

ການ​ພົບ​ປະ​ຄັ້ງ​ນີ້, ທ່ານ ຄຳເຫລັກ ໃຈອີສານ ກໍໄດ້ລາຍງານ​ໃຫ້​ຊາບ​ກ່ຽວ​ກັບ ສະພາບຈຸດພິເສດ, ການພັດທະນາເສດຖະກິດ-ສັງຄົມຂອງແຂວງ ໂດຍສະເພາະແມ່ນສະພາບການລົງທຶນຢູ່ແຂວງຜົ້ງສາລີ, ​ເຊິ່ງປັດຈຸບັນ ສປ ຈີນ ລົງທືນຢູ່ແຂວງຜົ້ງສາລີ ມີ 59 ໂຄງການມູນຄ່າ 250 ກວ່າລ້ານໂດລາສະຫະລັດ ເປັນຕົ້ນ ແມ່ນລົງທຶນ​ໃນ​ຂົງ​ເຂດກະສິກຳ, ບໍ່ແຮ່, ອຸດສາຫະກຳ-ການຄ້າ, ບໍລິການ ແລະ ອື່ນໆ, ​ໃນ​ນີ້,ລົງທຶນໃສ່ການສົ່ງເສີມກະກຳ 7 ບໍລິສັດ ມູນຄ່າ 19 ລ້ານໂດລາ, ພ້ອມ​ນີ້ ທ່ານຍັງໄດ້​ແຈ້ງ​ໃຫ້ບໍລິສັດ​ດັ່ງກ່າວ ​ໄດ້​ຮູ້​ເຖິງບັນດານະໂຍບາຍສົ່ງເສີມການລົງທຶນຂອງລາວ ແລະ ຂອງແຂວງຜົ້ງສາລີ ຕື່ມ​

ແຫຼ່ງຂໍ້ມູນ: ສຳນັກຂ່າວສານປະເທດລາວ