ພິທີເຊັນບົດບັນທຶກຄວາມເຂົ້າໃຈກ່ຽວກັບການຮ່ວມມືທາງດ້ານການແພດ ແລະ ໂຄງການສຶກສາທາງດ້ານວິທະ ຍາສາດສຸຂະພາບທີ່ມະຫາວິທະຍາສາດສຸຂະພາບໄລຍະ 5 ປີ (2019-2024) ລະຫວ່າງມະຫາວິທະຍາໄລວິທະຍາສາດສຸຂະພາບ ສປປ ລາວ ແລະ ມະຫາວິ ທະຍາໄລທຳມະສາດ ຣາຊະອານາຈັກໄທ ຈັດຂຶ້ນທີ່ນະຄອນຫຼວງວຽງຈັນ ຮ່ວມລົງນາມລະຫວ່າງທ່ານ ພູທອນ ວັງກອນວິໄລ ອະທິການບໍດີມະຫາວິທະຍາໄລວິທະຍາສາດສຸຂະພາບ (ມວສ) ແລະ ທ່ານນາງ ເກສີນີ ວິທູນຊາດ ອະທິການບໍດີມະຫາວິທະຍາໄລທຳມະສາດ ມີທ່ານຫົວໜ້າຫ້ອງການກະຊວງສາທາລະນະສຸກ ຄະນະບໍດີ ຮອງຄະນະບໍດີຄະນະແພດສາດ ຄະນະທັນຕະແພດສາດ ຄະນະເພສັຊສາດ ຄະນະພະຍາບານສາດ ຄະນະເຕັກນິກການແພດຂອງສອງສະຖາບັນ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ສຳລັບການຮ່ວມມືຄັ້ງນີ້ເພື່ອແລກປ່ຽນສົນທະນາຮ່ວມມືດ້ານວິຊາການ ແລະ ກິດຈະກຳທີ່ສອງຝ່າຍຈະໄດ້ຈັດຕັ້ງປະຕິບັດຮ່ວມກັນ ຈະມີການຢ້ຽມຢາມ ແລະ ແລກປ່ຽນຄະນະວິຊາການ ພະນັກງານວິຊາການ ແລະ ພະນັກງານບໍລິຫານໃນຂົງເຂດການສຶກສາ ການຄົ້ນຄວ້າ ແລະ ການເຜີຍແຜ່ ເພື່ອສ້າງການເຝິກອົບຮົມລະດັບຫຼັງປະລິນຍາຕີ ແລະ ການເຝິກອົບຮົມໄລຍະສັ້ນ ຈັດກອງປະຊຸມ ສຳມະນາ ແລະ ກອງປະຊຸມທາງດ້ານວິທະຍາສາດ ໃນຫົວຂໍ້ທີ່ສົນໃຈຮ່ວມກັນ ແລກປ່ຽນຂໍ້ມູນຂ່າວສານທາງດ້ານວິຊາການ ແລະ ອຸປະກອນຕ່າງໆ ສ້າງຫຼັກສູດ ຫຼືໂຄງການແລກປ່ຽນນັກສຶກສາໃນໄລຍະພັກແລ້ງຮ່ວມກັນ ເພື່ອຊ່ວຍໃຫ້ນັກສຶກສາ ແລະ ພະນັກງານມີຄວາມກະຕືລືລົ້ນ ແລະ ສົນໃຈໃນການຮຽນຮູ້ໃນແຕ່ລະສະຖາບັນ ເພື່ອພັດທະນາການຮ່ວມມືການເຮັດບົດຄົ້ນຄວ້າວິທະຍາສາດຮ່ວມກັນ.
ແຫຼ່ງຂໍ້ມູນ: ໜັງສືພິມວຽງຈັນໃໝ່