ຊຸດອົບຮົມການປ້ອງກັນ ແລະ ກຳຈັດບົ້ງຝູງງສາລີໃຫ້ພະນັກງານຂະແໜງປູກຝັງທົ່ວແຂວງໄຊຍະບູລີ ໄດ້ຈັດຂຶ້ນໃນວັນທີ 27 ມິຖຸນາ ນີ້ຢູ່ທີ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງໄຊຍະບູລີ, ໃຫ້ກຽດເປັນປະ ທານຮ່ວມຂອງທ່ານ ວິໄລສຸກ ເຄນນະວົງ ຫົວໜ້າກົມປູກຝັງກະຊວງກະສິກຳ ແລະ ປ່າໄມ້, ທ່ານ ຄຳເກິງ ພັນລັກ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີບັນດາຫົວໜ້າ, ຮອງຫົວໜ້າຂະແໜງປູກຝັງ ແລະ ໜ່ວຍງານປູກຝັງ 11 ເມືອງ, ພ້ອມດ້ວຍວີຊາການທີ່ກ່ຽວຂ້ອງເຂົ້າຮ່ວມ.
ຊຸດອົບຮົມຄັ້ງນີ້ໃຊ້ເວລາ 2 ວັນ, ນັກສຳມະນາກອນຈະໄດ້ຄົ້ນຄ້ວາ, ຮຽນຮູ້ກ່ຽວກັບຫຼັກການປ້ອງກັນພືດແບບປະສົມປະສານ, ການປ້ອງກັນ ແລະ ການກຳຈັດບົ້ງສາລີ, ການນຳໃຊ້ສານເຄມີເຂົ້າໃນການປ້ອງກັນ ແລະ ກຳຈັດບົ້ງຝຸງສາລີ, ຫຼັກການປ້ອງການ ແລະ ກຳຈັດສັດຕູພືດ, ພຶ້ນຖານການຈັດການສັດຕູພືດ, ລະບົບນິເວດວິທະຍາ, ວິທິການຈັດການສັດຕູພຶດ, ການຕິດຕັ້ງວົງຈອນຂອງພຶດ, ການຄວບຄຸມວິທິແບບທຳມະຊາດ, ການຄວບຄຸມດ້ວຍຊີວະວິທະຍາ, ການອານຸລັກສັດຕູທຳມະຊາດ, ວິທີການຮັກສາສັດຕູທຳມະຊາດ, ການຄວບຄູມວິທີເຂດຕະກຳ, ການຄວບຄຸມດ້ວຍວິທີກົນ, ການປ້ອງກັນດ້ວຍວິທີກາຍຍະພາບ ແລະ ການຄວບຄຸມດ້ວຍການນຳໃຊ້ສະໝຸນໄພຈາກພືດ.
ຈາກນັ້ນກໍ່ໄດ້ລົງສາທິດຕົວຈິງໃນພຶ້ນທີ່ລະບາດຂອງບົ້ງຝູງສາລີຢູ່ເມືອງໄຊຍະບູລີຕື່ມອີກ, ເນື່ອງຈາກວ່າແຂວງໄຊຍະບູລີໄດ້ມີການລະບາດບົ້ງຝູງສາລີທົ່ວແຂວງ, ໃນລະຫວ່າງກາງເດືອນພຶດສະພາ ຜ່ານມາຈົນເຖິງປະຈຸບັນຍັງບົ້ງຝູງສາລີແຜ່ລະບາດອອກໄປຈົນຄົບ 11 ເມືອງທົ່ວແຂວງ, ຍ້ອນແຂວງຂາດງົບປະມານ ແລະ ຂາດຢາຂ້າຝູງບົ້ງທາງກົມປູກຝັງສູນປ້ອງກັນພຶດໄດ້ນຳເອົາອຸກປະກອນ ແລະ ຢາປາບສັດຕູພືດມອບໃຫ້ພະແນກກະສິກຳ ແລະ ປ່າໄມ້ແຂວງໄຊຍະບູລີ.
ເພື່ອນຳໃຊ້ເຂົ້າໃນການປ້ອງກັນກຳຈັດບົ້ງຝູງສາລີ, ເຄື່ອງທີ່ມອບໃນຄັ້ງນີ້ມີເຄື່ອງອຸຕະກະເສດ 1 ຊຸດ, ກັບດັກແມງໄມ້ 1 ຊຸດ ແລະ ຢາປາບສັດຕູພືດ 3 ແກັດ, ລວມມູນຄ່າທັງໝົດ 10.300$ ແລະ 16 ລ້ານ 8 ແສນກີບເປັນສະກຸນເງິນກີບ, ກ່າວມອບຂອງທ່ານ ວິໄລສັກ ເຄນນະວົງ ຫົວໜ້າກົມປູກຝັງ ແລະ ກ່າວຮັບຂອງທ່ານ ຄຳເກິງ ພັນລັກ ຮອງຫົວໜ້າພະແນກກະສິກຳ ແລະ ປ່າໄມ້ແຂວງໂດຍຊ່ອງໜ້າພາກສ່ວນທີ່ກ່ຽວຂ້ອງ.
ແຫຼ່ງຂໍ້ມູນ: Media Laos